ꞌJeemith 4 - ꞌBuuk cĩ Thõõth cĩ Nyekuci

Aanytĩk eleeti cugguung Nyekuc

¹ Ne ꞌcĩ ĩkõõtha jore hĩ ꞌgẽrẽnyõõn hõrggẽẽnaa cunuung ko? Hõllõngaa nooyyia au nẽẽg hẽlẽggẽẽnnĩĩ ꞌcĩg abũraneeku niig ĩcĩg aruhõõ ꞌthinneetinii cugguung?

² Adiimmu niig hẽlẽggĩ ꞌcĩg hõllõngaa aꞌnyaku, nẽ atattaamattu ꞌgõõl ꞌcĩ occa ammũdaannu. Occa aruku eet, hátĩ ummuddia ꞌgii tĩho. Nẽẽthĩ, aalla hõllõngaa occa ammũdaannu hẽlẽggĩ ꞌcĩg adiimmu ho noho, nẽ occa hõllõngaa ammũdaannu jora hode nyappẽha. Adiim occa alayyu Nyekuc, hátĩ ummuddia ꞌgii ꞌcĩ adiimmu ho.

³ Nẽ má alayyu Nyekuc, hõllõngaa ammũdaannu ꞌgii tĩho, hĩnĩngĩtĩ alayyu ĩnõõnnõ ꞌthinneetinii ꞌcĩg abathĩ, hátĩ udukteek ꞌgii ꞌcĩ ammũdannu ꞌgoolliohĩĩ ꞌcĩg atabbu niiga.

⁴ Niig eeta ꞌcĩg adĩmannu hẽlẽggĩ ꞌcĩg ĩĩn ꞌriiring ko, hõllõngaa agayyu niig ngaatĩ aaꞌnyuung ꞌgõnnaꞌthẽẽt cĩ lootu ĩĩtõ mĩrõk cĩg Nyekuci? Nẽ má eberriaau ngaatĩ iiginnu ꞌgõõnõgĩ lootu, iittu niig mĩrõk cĩg Nyekuci.

⁵ Ĩccaaddu niig thõõth ꞌcĩ aduha ꞌBuuhi cĩ Nyekuci aĩ, “Aꞌthũũnnĩ Nyekuci lori baa aarĩk nẽẽ ꞌthinneetinii cĩggaac jurrung?”

⁶ Nẽẽthĩ, aaꞌnyeet Nyekuci ngagĩĩt tarbalꞌthẽẽt cobbi. Ĩnõõ ꞌcĩ aĩnnĩ ꞌBuuhi cĩ Nyekuci, “Abũrĩ Nyekuci eet ꞌcĩg athĩngõõnyanĩ nẽẽthĩ, aaꞌnyĩk nẽẽ eet ꞌcĩg hõllõngaa athĩngõõnyan bũnnai.”

⁷ Aanytĩk eleeti cugguung Nyekuc! Aꞌnyamanit habu cĩ loriẽẽt ꞌcĩg abathĩ, hátĩ hukul hutungeehuung ngagiita.

⁸ Iita õbõktõ hĩ Nyekuc, hátĩ hikia nẽẽ buúk õbõktõ hĩ ngagiita. Niig ꞌthẽccanniooha, ũtũũnyĩt authet cunuung ꞌcĩ aattiyyu. Ĩtĩllahit ꞌthĩnneeti cugguung, hĩnĩngĩtĩ eꞌngerri ꞌthinneeti cugguung ngaatĩ athiknu Nyekuc hĩ looc nicci.

⁹ Ommoꞌthi nẽ ahayũngatteeu nẽ okollieehu ulwa. Ma nga hararru iꞌthiattaaĩ ulwa. Ahayũngattĩ, hĩĩ nĩngĩtĩ accamanoothiku thõng.

¹⁰ Ma hathĩngõõnyannu muumaa cĩ Nyekuci, hátĩ hodonguung nẽẽ ĩĩtõ makatĩg.

Bathi ꞌcĩ hẽttẽẽdĩkĩ eet ũgĩ thõõth

¹¹ ꞌGotoonoga hĩ ngoonoga, ma hetteediku ꞌgoonogu thooꞌthiok. Ẽẽtĩ ꞌcĩ etteedĩk ꞌgõõnĩ thõõth, aaĩ hĩcĩ etteedĩk nyattal cĩ Nyekuci thõõth. Ma etteedihi nii nyattal thõõth, aitiõõ hõllõngaa aꞌthũũnnĩ nyattal, nẽẽthĩ, aburi ngaatĩ anũĩ ĩnõõnnõ.

¹² Nyekuc dioo, baa aaꞌnyĩk eet nyattal ꞌcĩ ẽttẽẽd thõõth. Ĩnõõnnõ dioo ꞌcĩ aꞌnyak ꞌtirrian ꞌcĩ ẽẽlanĩ eet, hode aruhi eet hadaahito. Thõõth iina ꞌcĩ aũlan ꞌcĩ aꞌnyahi nii, ꞌcĩ occa ẽttẽẽdĩkĩĩ eet ꞌcĩ aaronnu thõõth ko?

Tilooinit cĩ thĩngõõnyaniitto

¹³ Ĩthĩktõ da nõõ niig eeta ꞌcĩg ainnu, “Hooyyia hatĩ naag kõr nicci hode lohotha ꞌtaaũnaa nĩĩcĩ hode ꞌtaaũna cobbi. Hõõ hatĩ hadĩmanna tũũẽnĩt ĩĩca irkit hõdẽĩ hummuddiawa ꞌrabbẽẽt ꞌcĩg mẽẽlĩg.”

¹⁴ Ne ꞌcĩ agayyu niig cĩ lohotha ho? Ĩcca occa agayyu niig aaĩ hatĩ rũgẽtĩ cunuung lohotha hutuno? Aaĩ rũgẽtĩ cunuung hĩ ꞌrĩꞌnyaati aa gõõng uppwaanna ngerrenita hĩdĩhĩdĩĩc nẽ ikia iꞌnginõõthĩ haaga.

¹⁵ Occa othooꞌthu niig ainnu, “Má adiim Makayyioohiti, harũgĩ hatĩ nẽ hĩdĩmanit hẽlẽggĩ ꞌcĩg hadiimi.”

¹⁶ Nẽẽthĩ, athĩngõnyannu hinnia niig, hĩnĩngĩtĩ muhẽẽnĩt cunuung, abathĩ thĩngõõnyani ꞌcĩ aaĩ noho.

¹⁷ Nẽẽthĩ, ẽẽtĩ ꞌcĩ aga thõõth ꞌcĩ abũnnaa ꞌcĩ occa adĩman nẽ hõllõngaa adĩmanĩ, ĩĩn ꞌthẽccannioohit.