ꞌJeemith 2 - ꞌBuuk cĩ Thõõth cĩ Nyekuci

Ma hammĩnannu balliook hĩ eet ꞌcĩg attiranĩ

¹ ꞌGotoonoga hĩ ngoonoga, hĩcĩ hẽlẽmĩ naag Makayyioohit cĩnaac Yeesu Krĩstõ ꞌcĩ abuli ho, ma hahallu eeta.

² Má occa hikia ballioohiti umwaa ꞌcĩ ahimit ceremwa ꞌcĩg ẽllẽẽmĩth hĩ ꞌralit ꞌcĩ ĩĩn ꞌdaab, nẽ ikia eet umwaa ꞌcĩ ĩĩn hullahaac buúk ꞌcĩ ahimit ceremwa ꞌcĩg ꞌthaꞌtharĩg;

³ má arrĩcanaannu niig eet ꞌcĩ ahimit ceremwa ꞌcĩg ẽllẽẽmĩth ko nẽ iittihu, “Avvi dtaaba ꞌcĩ abũnnaa cieeni,” nẽ iittihu hullahaac, “Bĩĩl nĩngaata hode ꞌcioloongan loota ngaati,”

⁴ nga thĩ ahalit niig eleeti hõrggẽẽnaa cunuung nẽ etteeddu thooꞌthiok muhẽẽttaa ꞌcĩ abathĩ?

⁵ ꞌGotoonoga hĩ ngoonoga ĩthĩktõ. Ẽbẽra Nyekuci hullaha nẽ aaꞌnyĩk ĩhõõggõ lemiinit ꞌcĩ maka loota nĩnga. Nẽ uduhaak ĩhõõggõ buúk thõõth ꞌcĩ hatĩ õthõlĩ nẽẽg hĩ ĩnõõnnõ habuccieet cĩnnĩ, ꞌcĩ hatĩ aaꞌnyĩk nẽẽ eet vẽlẽk ꞌcĩg ammĩnan ĩnõõnnõ.

⁶ Nẽẽthĩ, baa hinnia odoommu niig hullaha thõng. Hõllõngaa nooyyia balliook ꞌcĩg arratannuung ngagiita? Hõllõngaa noyyia ĩhõõggõ ꞌcĩg agurreekuung ngagiit lokihooa?

⁷ Hõllõngaa nooyyia ĩhõõggõ ꞌcĩg arannĩ ꞌthaar ꞌcĩg abuli cĩg Makayyioohit cunuung?

⁸ Má aꞌthuunnu niig nyattal ꞌcĩ aaddi ꞌcĩ eheeddi ꞌBuuhaa cĩ Nyekuci ꞌcĩ aĩ, “Mĩnnan eet ꞌcĩ aaronnu haau hĩcĩ ammĩnannu eleeti cugguung,” occa thĩ adĩmannu thõõth ꞌcĩ aũlanĩ.

⁹ Nẽẽthĩ, má accamanaannu niig eet ũgĩ hĩllõõanit ꞌgõõnõgĩ, ẽꞌthẽcannu nẽ allimanneet nyattalĩ cĩ Nyekuci aĩ, ẽꞌthẽcannu.

¹⁰ Hĩnĩngĩtĩ ẽẽtĩ ꞌcĩ aꞌthũũnnĩ nyattalliook vẽlẽk nẽ ẽꞌthẽcan hõdẽẽthõng, ẽꞌthẽcan nẽẽ nyattalliook cĩg Nyekuci vẽlẽk.

¹¹ Hĩnĩngĩtĩ Nyekuc ꞌcĩ aduha aĩ, “Ma hattihi ngaa cĩ eet umwa,” nẽ tarĩ ĩĩ, “Ma haruhi.” Má hõllõngaa attihi ngaa cĩ eeto, nẽ uruhu eet, nga ꞌthẽk ẽꞌthẽcannu nyattal noho.

¹² Othoothit nẽ idticattu thooꞌthiok hĩ eeta ꞌcĩg hatĩ etteedothoothĩk thooꞌthioha nyattaalaa ꞌcĩ õõga eet haauto lõꞌngõõc,

¹³ hĩnĩngĩtĩ aitiõõ hatĩ hõllõngaa ammaannothoothĩk ẽẽtĩ ꞌcĩ baa hõllõngaa ammaannĩk ꞌgõõnõgĩ. Nẽẽthĩ, má baa ammaannihi nii ꞌgoonogu, ammaannikii hatĩ Nyekuci nganiit kõr ꞌcĩ hatĩ ẽttẽẽdĩkĩ nẽẽ eet thooꞌthiok.

Lemiiniti ꞌcĩ aitiõõ dtiicanĩ ꞌcĩg abũnnaa tõõ adaahĩ

¹⁴ ꞌGotoonoga hĩ ngoonoga, ne ꞌcĩ occa abũnnaa, hatĩ aĩ ẽẽtĩ haꞌnyahi lemiinit nẽ hiꞌthihi dtiicanĩ ꞌcĩg abũnnaa ꞌcĩg adtican nẽẽnĩ? Occa ꞌyioko ꞌthẽk ẽẽla ĩnõõnnõ lemiiniti cĩnnĩ ho?

¹⁵ Má haau ꞌgõtõõnẽẽtĩ hode ngõõnẽẽtĩ ꞌcĩ hõllõngaa aꞌnyak ceremwa hĩ ꞌgẽẽn,

¹⁶ nẽ ĩĩnnĩk eet umwaa hõrggẽẽnaa cunuung, “Bĩtõ, bĩĩt au lõꞌngõõc, tihimi nẽ uduho jurrung,” nẽ hõllõngaa ĩbbaan ĩnõõnnõ ꞌgii ꞌcĩ adiim nẽẽ ũdũt, bũnnai ꞌyioko cĩ thõõth cĩnnĩ ho nii?

¹⁷ ꞌGõõlaa ꞌcĩ aduhõõ thõng, má hõllõngaa õõkõrõõ lemiiniti hĩ dtiicanĩ ꞌcĩg abũnnaa, ĩĩn lemiinit ꞌcĩ adaaha.

¹⁸ Nẽẽthĩ, occa õthõõth eet umwaa aĩ, “Aꞌnyahi nii lemiinit nẽ haꞌnyahi naa dtiicanĩ ꞌcĩg abũnnaa.” Teretheehaa daho lemiinit cunni ꞌcĩ aitiõõ dtiicanĩ ꞌcĩg abũnnaa tõõ ho, nẽ heteretheehii naa lemiinit caannĩ dtiicanẽẽnnĩĩ ꞌcĩg abũnnaa ĩcĩg hadĩmani naa ho.

¹⁹ Elemmu niig ngaatĩ aayyi Nyekuci hõdẽẽthõng. Abũnnaa! Ẽlẽmĩ loriẽẽta ꞌcĩg abathĩ buúk thõõth icci nẽ aaꞌnyĩk ĩhõõggõ habarritit tẽẽlꞌthĩta.

²⁰ Nii ꞌgiiꞌthiahiti, adiimi nii heterethoothihii thõõth ꞌcĩ aĩ, hõllõngaa ẽẽlannii nganiit lemiiniti ꞌcĩ aitiõõ dtiicanĩ ꞌcĩg abũnnaa tõõ?

²¹ Hõllõngaa nooyyia agayyi Abũrahamĩ baangẽẽtĩ cĩnaac, ngaatĩ ĩĩnnĩ eet ꞌcĩ abũnnaa, hĩnĩngĩtĩ thõõth baa occa ĩbbõõrĩ nẽẽ ngeerĩnĩ Iꞌthaako hĩĩ ꞌgaarrieenit altaarĩa?

²² Ĩcĩnĩt nõõ lemiinit cĩnnĩ ngaatĩ adticaniini hõdẽĩ hĩ dtiicanĩ cĩgĩnnĩg ꞌcĩg abũnnaa. Ikia ũttũbanoothĩk lemiiniti cĩnnĩ, hĩnĩngĩtĩ dtiicanĩ ꞌcĩg abũnnaa baag adĩman nẽẽnĩ.

²³ Nĩngĩtĩ aku edeeꞌnyianĩ thõõth baa aduha ꞌBuuhi cĩ Nyekuci dĩdĩ ꞌcĩ aĩ, “Baa ẽlẽmĩ Abũrahamĩ thõõth cĩ Nyekuci nẽ hĩnĩngĩtĩ thõõth icci, ikia accamana Nyekuci ĩnõõnnõ ngaatĩ ĩĩnnĩ eet ꞌcĩ abũnnaa.” ꞌGõõl ꞌcĩ baa aku ĩĩnnĩ Abũrahamĩ ꞌgõõnĩ Nyekuci ho niccia.

²⁴ Nẽẽthĩ hoti ho, hẽtẽrꞌtha naag ngaatĩ habũnnayyĩ hĩ Nyekuc, hĩnĩngĩtĩ dtiicanĩ ꞌcĩg abũnnaa ꞌcĩg hadĩman naaga, hõllõngaa hĩnĩngĩtĩ lemiinit diooni.

²⁵ Nẽẽthĩ hoti ho, hõllõngaa nooyyia baa agayyi ꞌwaaꞌngiahiti baa haĩ Rahab ngaatĩ abũnnayyĩ, hĩnĩngĩtĩ thõõth baa avvaanĩ nẽẽ eet baag ĩĩn ꞌrootti, nẽ utuguny ĩꞌthõng nẽ ĩꞌthooĩk hĩnĩhĩt ꞌgõõlaa ꞌcĩ ꞌrĩĩng?

²⁶ Hĩ ẽlẽ ꞌcĩ adaahĩ hĩnĩngĩtĩ aitiõõ lorii tõõ, nẽẽthĩ, lemiiniti ꞌcĩ aitiõõ dtiicanĩ ꞌcĩg abũnnaa tõõ, ĩĩn lemiinit ꞌcĩ adaaha.