ꞌJeemith 1 - ꞌBuuk cĩ Thõõth cĩ Nyekuci

ꞌThaainit ꞌcĩ aku hĩ ꞌJeemith

¹ Waraga ꞌcĩ aku hĩ ꞌJeemith, dticciannioohit cĩ Nyekuci hĩ cĩ Makayyioohit cĩnaac Yeesu Krĩstõ cieeni. Hehedihi naa waraga icci habuccieeꞌnya ꞌcĩg ĩĩn õmmõtõ hĩ ꞌramma cĩg eet cĩg ꞌJudeei ꞌcĩg ĩĩn lemmiook ꞌcĩg ĩꞌthanothoothĩk loonyin vẽlẽk.

ꞌTĩmman cĩ lemiitto

² ꞌGotoonoga hĩ ngoonoga, má attĩmaniinnu niig ꞌgoolliohĩ cũũmõ cũũmõ, aanytĩk hĩĩ ꞌgõõl ꞌcĩ occa accamanoothiku niig gẽrrẽẽt.

³ Hĩnĩngĩtĩ agayyu niig aĩ, má ĩttĩmanĩ lemiiniti cunuung, occa hatĩ ammũda temeethi cunuung ꞌgõõl ꞌcĩ alĩꞌthĩ.

⁴ Nẽ illimanit ngaatĩ emmeeꞌthu thooꞌthiok vẽlẽk ũdũt, hátĩ ĩtĩlĩthĩt okomit dĩdĩ nẽ iitiõõ ꞌgii ꞌcĩ occa aꞌnyamannuung tõõ.

Laiinit lemiitta

⁵ Má adiim eet umwaa hõrggẽẽnaa cunuung ꞌgẽẽnyĩth, aꞌnyĩĩk hala Nyekuc ꞌcĩ aaꞌnyĩk eet vẽlẽk ꞌgẽẽnyĩth ꞌthĩnĩtaa ꞌcĩ alalĩ nẽ hõllõngaa eggerꞌnyeek eet umwa, nẽẽthĩ hatĩ aaꞌnyĩhoothĩk ĩnõõnnõ.

⁶ Nẽẽthĩ, má alayyu niig Nyekuc ꞌgiimwa, adiim elemmu aĩ, aaꞌnyuung hatĩ nẽẽ ꞌgii tĩho dĩdĩ. Ma hĩccaaddu thõõth umwa, hĩnĩngĩtĩ ẽẽtĩ ꞌcĩ ĩccaad thõõth, aaĩ nẽẽ hĩ maama cĩg bũlũcaak ꞌcĩg uuhan ngõõtĩ.

⁷ Nẽẽthĩ, ẽẽtĩ ꞌcĩ ĩccaad thõõth, occa hõllõngaa ammuk aĩ, hammũda hatĩ ꞌgiimwa hĩ Nyekuc;

⁸ hĩnĩngĩtĩ aꞌnyak nẽẽ muhẽẽnĩt ꞌgoolliok ꞌramma nẽ iittiõõ hõllõngaa ũũlũ ngaatĩ occa adĩmanĩ ꞌgii ꞌcĩ aũlanĩ.

Hullaha hĩ balliook

⁹ Lemmiooha ꞌcĩg ĩĩn hullaha, aꞌnyak ꞌgiimwa ꞌcĩ occa irrianĩ, hĩnĩngĩtĩ ẽlẽm Nyekuci ĩhõõggõ.

¹⁰ Nẽẽthĩ, eeta ꞌcĩg aballi, occa irrian nẽẽg, hĩnĩngĩtĩ aaꞌnyĩk Nyekuci ĩhõõggõ hĩĩtõ eet ꞌcĩg hõllõngaa tiirik, adaahĩ hatĩ nẽẽg hĩ nyetturi cĩg moru.

¹¹ Hĩnĩngĩtĩ uppwaanna kõrra hĩ abuurꞌthet nẽ ũtũũth hẽẽt, hutururriaa bõllõõha ꞌcĩg nga allaaꞌtha thõng nẽ ĩꞌthaanĩ ꞌlẽẽmĩthĩ cĩnnẽẽnĩ. ꞌGõõlaa nĩĩcĩ dioo, aꞌnginoothi hatĩ ballioohiti hĩ baliinit cĩnnĩ vẽlẽk.

ꞌTĩmman cĩ ꞌThĩttaanõ

¹² Aggatan Nyekuci eet ꞌcĩg aꞌnyaman ꞌtĩmman, hĩnĩngĩtĩ má ĩllõõanit nẽẽg ꞌtĩmman tĩho, ammũda hatĩ nẽẽg dũman cĩ rũgẽtõ, baa aduhaak Nyekuci eet ꞌcĩg ammĩnan ĩnõõnnõ.

¹³ Ma attĩmaniinnu niiga, occa aitiõõ ẽẽtĩ ꞌcĩ õthõõth aĩ, “Attĩmannaa Nyekuci nganĩĩt tõõ.” Hĩnĩngĩtĩ hõllõngaa occa attĩman ꞌThĩttaanĩ Nyekuc, hode aitiõõ Nyekuci hõllõngaa occa attĩman eet umwa.

¹⁴ Aku ꞌtĩmmanĩ hĩ ngagĩĩt, hĩnĩngĩtĩ thooꞌthiok ꞌcĩg abathĩ ꞌcĩg habũraneek naaga, ꞌcĩg arahanneet ngagĩĩt nẽ edettieet hẽꞌthẽcattõ.

¹⁵ Nẽẽthĩ, ahĩĩnakeet thooꞌthioha ꞌcĩg abathĩ ho ngagĩĩt hẽꞌthẽcattõ nẽ ma ĩtĩlĩth ꞌthẽccanĩ ĩĩ maka, ikia ĩtĩhĩĩnaheet daahĩth.

¹⁶ ꞌGotoonoga hĩ ngoonoga, ma haaꞌnyiku eet umwa higgooluung ngagiita.

¹⁷ Aku ꞌbaaniniti ꞌcĩ abũnnaa ꞌcĩ tẽllĩ hẽẽtahujjieen hĩ Baangeet ꞌcĩ ẽhẽnyta lanyit cĩ hẽẽtkujjieen, aalla nẽẽ hõdõõkõthĩ ꞌgõõla hõdẽẽthõng nẽ hõllõngaa ũũkcĩ hĩ ꞌriiyyiẽta.

¹⁸ Adiimmeet Nyekuci ngagĩĩt hĩĩtõ eet cĩgĩnnĩg nẽ ĩꞌthõõa nyeemuut ꞌcĩ ĩĩn dĩdĩ haaꞌnyeet ngagĩĩt rũgẽt ꞌcĩ ĩĩn ngeju.

Thõõth cĩ hathĩknĩ nyeemuut cĩ Nyekuci

¹⁹ ꞌGotoonoga hĩ ngoonoga, ĩthĩhĩt thõõth icci, aꞌnyĩĩk eet hõdẽĩ hõdẽĩ hĩthĩktõ hĩdĩĩkoothong nẽ ma hothooꞌthu hĩdĩĩkoothong nẽ ma haliilliyyu hataman.

²⁰ Hĩnĩngĩtĩ hõllõngaa aꞌnyaha liilii cĩ eeto rũgẽt ꞌcĩ aũlan ꞌcĩ accamana Nyekuci.

²¹ Nẽẽthĩ hoti ho, ũtũngĩt thooꞌthiok vẽlẽk ꞌcĩg ĩĩn ꞌriiring hĩ bathi ꞌcĩ ũdaan looc ko, ma hathĩngõõnyannu, elemit nyeemuut baa allimanoothikuung ngagiit ꞌcĩ hatĩ ẽẽlannuung ngagiita.

²² Nẽẽthĩ, ma hathiknu thõõth cĩ Nyekuci thõng diooni. Adiim adĩmannu thõõth ꞌcĩ adukiaa ho. Má aitiõõ hõllõngaa adĩmannu, iggoollu hinnia eleeti cugguung haaga.

²³ Ẽẽtĩ ꞌcĩ athĩhĩ thõõth nẽ hõllõngaa adtican ꞌgii ꞌcĩ aduha thõõth ko, aaĩ hinnia hĩ ẽẽtĩ ꞌcĩ acĩn muum cĩnnĩ maadaraawa.

²⁴ Nẽ ma ĩcĩn muum cĩnnĩ maadaraawa ẽlẽk, ũũk nĩĩcĩ noho nẽ ataarõthĩ aaĩ hatĩ muum cĩnnĩ hutuno.

²⁵ Nẽẽthĩ, ẽẽtĩ ꞌcĩ arrĩcanaa ngaatĩ ammũdaanĩ thõõth ꞌcĩ aduha nyattalĩ ꞌcĩ abũnnaa, baa õõga eet haauto lõꞌngõõc nẽ aala ĩdĩman thõõth icci nẽ hõllõngaa ataarrothi thõõth baa athĩhĩ nẽẽnĩ nẽ ĩdĩmana, aggatan hatĩ Nyekuci ĩnõõnnõ, hĩnĩngĩtĩ thõõth ꞌcĩ adĩman nẽẽ ho.

²⁶ Má ammuk eet umwaa aĩ hĩĩnĩ eet cĩ Nyekuci nẽ õthõõth tahatak, ĩggõõl nẽẽ ẽlẽ cĩnnĩ nẽ iittiõõ hõllõngaa adticanni thõõth cĩ Nyekuci hĩ ĩnõõnnõ.

²⁷ Thõõth cĩ Nyekuci ꞌcĩ tẽllĩ ꞌcĩ ẽlẽmĩ Nyekuci Baangẽẽtĩ cieeni, ꞌcĩ haꞌthũũnnĩ booyyiok hĩ ngaatĩbõyyĩꞌnya pĩĩrnattaa cĩnĩĩng nẽ huꞌthuutti eleeti ngaatĩ ẽꞌthẽcanneet lõõcĩ niccieeni.