ꞌGalaaꞌthia 6 - ꞌBuuk cĩ Thõõth cĩ Nyekuci

Heelit eet vẽlẽk

¹ ꞌGotoonoga hĩ ngoonoga, má ẽꞌthẽcanõõ ẽẽtĩ umwaa hõrggẽẽnaa cunuung, oboddiaaĩ niig ꞌcĩg okomtu Loriiaa cĩ Nyekuci ho eet nicci nẽ irrioottihu haau ꞌgõõlaa ꞌcĩ abũnnaa. Ma hataarroꞌthu ngaatĩ occa ẽꞌthẽcannu niig buúk kõr umwa.

² Eellio nyaagwaana hatĩ adĩddĩngĩĩ thooꞌthioha nẽ ꞌgõõlaa cĩ, adĩmannu thooꞌthiok ꞌcĩg õthõõth nyattalĩ cĩ Yeesu Krĩstõ.

³ Má ammuk ẽẽtĩ umwaa aĩ hĩllõõani ꞌgõõnõgĩ nẽ hõllõngaa ĩllõõan buúk, ĩggõõl eet tĩho ẽlẽ cĩnnĩ.

⁴ Dticcian dtiic cunni jurrung, nẽẽthĩ hatĩ irrianu. Nẽ ma hĩthakꞌtheehi ẽlẽ cunni hĩ cĩ ꞌgoonogu ũgĩ.

⁵ Hadiim naag hõdẽĩ hõdẽĩ, huꞌthuutti dtiicanĩ cĩggaac.

⁶ Abũnnaa eeta ꞌcĩg allimanoothĩk thõõth cĩ Nyekuci ngaatĩ õthõlĩ hẽlẽggĩ vẽlẽk ꞌcĩg abũnnaa, hĩ eet ꞌcĩg alliman ĩhõõggõ ho.

Tiboolaniinit hĩ janiinit

⁷ Ma higgoollu eleeti cugguung ẽmmẽn. Aitiõõ ẽẽtĩ ꞌcĩ occa aggiith Nyekuc tõõ, hĩnĩngĩtĩ ajana hatĩ ẽẽtĩ ꞌgii ꞌcĩ baa ꞌthẽk athacĩ nẽẽnĩ.

⁸ Ẽẽtĩ ꞌcĩ athacĩ hinyomo cĩg thooꞌthiok ꞌcĩg abathĩ, hĩnĩngĩtĩ abũraneek ẽlẽ cĩnnẽẽnĩ, ajana ꞌthẽk hatĩ nẽẽ bathi. Nẽẽthĩ, ẽẽtĩ ꞌcĩ athacĩ hinyomo, hátĩ hatal Lorii ꞌcĩ Ẽllẽẽmĩthĩ, ajana ꞌthẽk hatĩ nẽẽ rũgẽt ꞌcĩ aalla ooo.

⁹ Ma haharru ngaatĩ eellu ꞌgoonogu, hĩnĩngĩtĩ ajanaannu hatĩ niig ꞌbaaninit, kõr ꞌcĩ uduhaaĩ Nyekuci, hatĩ hõllõngaa aireeku dtiic cĩnnĩ.

¹⁰ Nẽẽthĩ, hĩdĩmanit eet vẽlẽk jurrung, hatĩ hummuddia ꞌrõtĩ ꞌcĩ hadĩmanĩ ĩhõõggõ jurrung, ettebehini hatĩ ĩĩn nẽẽg eet ꞌcĩg ẽlẽmĩ Makayyioohit Yeesu.

Tilooinit cĩ Paaulo ꞌcĩ adtuurna

¹¹ Akatti hẽbẽrĩ ꞌgõõl ꞌcĩ hẽhẽẽdakuung naa ngagiit waraga nyamacaarwaanĩĩ ꞌcĩg obbitig attiaa caannĩ ho jurrung.

¹² Eeta ꞌcĩg aduhaakuung ngagiit anneekuung etteedit eleeti cĩg eet ꞌcĩg maacĩg ko, adiim nẽẽg ẽtẽrꞌtha makaaꞌthĩt cĩ eleeti cĩggĩĩng. Nẽ adiim alĩĩta nẽẽg ukẽẽnĩt ꞌcĩ allimanĩ thõõth cĩ hurucce cĩ Krĩstõ.

¹³ Aitiõõ eeta ꞌcĩg etteeddi eleeti hõllõngaa anũ nyattal nẽ adiimmuung nẽẽg ngagiit etteeddi, hátĩ hirrianit nẽẽg, hĩnĩngĩtĩ eleeti cugguung.

¹⁴ Occa hirriani, hĩnĩngĩtĩ hurucce cĩ Makayyioohit cĩnaac Yeesu Krĩstõ diooni, hĩnĩngĩtĩ hurucce cĩnnĩ, ikia adaak lõõcĩ hĩ thooꞌthiok ꞌcĩg abathĩ vẽlẽk hĩ nganĩĩta nẽ hadaaha naa buúk hĩnĩngĩtĩ thooꞌthiok ꞌcĩg abathĩ cĩg looc nicci.

¹⁵ Aitiõõ hõllõngaa aaddi hatĩ etteeddi ẽẽtĩ hode nga hẽttẽẽdĩ, thõõth ꞌcĩ aaddi hĩ Nyekuc diooni, ꞌcĩ occa hĩĩgĩnnĩ naag ngeju.

¹⁶ Aaꞌnyĩk hatĩ Nyekuci eet vẽlẽk ꞌcĩg anũ thõõth icci, authet ꞌcĩ aattiyyi lõꞌngõõc hĩ tamaati cĩnnĩ, tananga eet cĩg Ĩꞌthĩraẽlĩ cĩg Nyekuci.

¹⁷ Nẽẽthĩ, dtuurnattaa cĩnnĩ, hõllõngaa hadiimi eet ꞌcĩ accanannaa nganĩĩta, hĩnĩngĩtĩ haꞌnyahi naa ẽllaa caannĩ carrahulit, hĩnĩngĩtĩ hanũ Yeesu.

¹⁸ ꞌGotoonoga hĩ ngoonoga ꞌcĩg iiginnu lemmiook cĩgannĩg ko, aꞌnyĩĩk bũnnai cĩ Makayyioohit Yeesu Krĩstõ haau loriẽẽtĩĩ cugguung vẽlẽk. Aamẽn.