ꞌGalaaꞌthia 1 - ꞌBuuk cĩ Thõõth cĩ Nyekuci

ꞌThaainit ꞌcĩ aku hĩ Paaulo

¹ Nganĩĩt Paaulo ꞌthooyyiahit ꞌcĩ ĩꞌthõõannaa Yeesu Krĩstõ hĩ Nyekuc Baangeet, baa arũgtha Yeesu daahĩtha. Baa hõllõngaa ĩꞌthõõannaa nganĩĩt eeta hode ẽẽtĩ umwaa haaga.

² Nẽ hĩꞌthaayyuung naag hõdẽĩ hĩ ꞌgotoonoga hĩ ngoonoga, ngagiit lothippiꞌnya cĩg lemmiook cĩg ꞌGalaaꞌthia. Waraga ꞌcĩ eheedothoothĩk lemmiook ꞌtaaũnnioohĩĩ cĩg looc cĩ ꞌGalaaꞌthia.

³ Hala naa Nyekuc Baangeet hĩ Makayyioohit Yeesu Krĩstõ, hátĩ haggatattuung ngagiit ĩĩtõ tarbalĩg nẽ aauttu lõꞌngõõc.

⁴ Hĩnĩngĩtĩ athĩhĩ Yeesu Krĩstõ Nyekuc Baangeet cĩnaac, ĩnõõ ꞌcĩ aku aaꞌnyĩkĩ nẽẽ ẽlẽ cĩnnĩ hĩĩ ꞌgaarrieenit cĩ ꞌthẽccanẽẽt cĩggaac ko, hatĩ hẽẽlaeet ngagĩĩt looccaa cĩ ꞌthẽccaneetu.

⁵ Aaꞌnyĩhoothĩk hatĩ bulẽẽnĩtĩ Nyekuc ꞌcĩ aalla ooo. Aamẽn.

Nyeemuut dĩdĩ ꞌcĩ odoyyii

⁶ Homoꞌthi naa thõõth ꞌcĩ utuburru niig Nyekuc hĩdĩĩkoothong, hĩnĩngĩtĩ baa ẽbẽraauung nẽẽ ngagiit bũnnaiittaa cĩ Krĩstõ, nẽẽthĩ, ma helemmu nyeemuut umwa cĩrrĩĩng,

⁷ ꞌcĩ hõllõngaa ĩĩn dĩdĩ. Nẽẽthĩ, aattĩg eeta ũgẽẽgĩ ꞌcĩg aaꞌnyuung ngagiit pĩĩrnanĩt nẽ adiimmuung ngagiit ũtũbũrĩt nyeemuut ꞌcĩ abũnnaa cĩ Krĩstõ.

⁸ Hala naa Nyekuc hĩccĩĩn eet umwa hode aajĩlõ ꞌcĩ aku hẽẽtahujjieen, hatĩ irrioon nyeemuut ꞌcĩ abũnnaa ꞌcĩ ꞌrĩĩng ꞌcĩ hõllõngaa aaĩ hĩ baa hirrioonna naaga.

⁹ Baa huduha naa ẽlẽk nẽ nga hõbõdẽẽkĩ tarĩ. Hammuhi accĩĩn hatĩ Nyekuci eet ꞌcĩg irrioon nyeemuut ꞌcĩ hõllõngaa ĩĩn nyeemuut ꞌcĩ abũnnaa, baa elemtu niig ẽlẽk.

¹⁰ Hõllõngaa haini naa, hátĩ hatalit eeta, hadiimi naa hatal Nyekuci. Ammuku niig ainnu hadiimi naa hatalit eeta? Má baa hĩdĩman naa noho, occa ꞌyioko hõllõngaa hĩĩnĩ appahaca cĩ Krĩstõ.

Ũtũvva Nyekuci Paaulo

¹¹ ꞌGotoonoga hĩ ngoonoga, hadiimmuung naa ngagiit agaac ĩĩtõ, nyeemuut ꞌcĩ abũnnaa ꞌcĩ hirriooni naa ho, hõllõngaa ĩĩn nyeemuut ꞌcĩ aku hĩ eet cĩ holli õõ.

¹² Baa hõllõngaa hammũda naa nyeemuut icci hĩ eet umwa haaga, baa eterꞌtheeka nganĩĩt Yeesu Krĩstõ Nyeemuut icci.

¹³ Ĩthĩktu niig baa hĩĩnĩ naa ꞌJudeeinit ꞌcĩ baa haga nyattal cĩ nyakangaaꞌnya cĩggaang gẽrrẽẽt. Baa haruhi naa eet ꞌcĩg ĩĩn lemmiook cĩg Yeesu nẽ hĩttĩmana ngaatĩ hĩꞌthaanĩ lothippit cĩ lemmiook cĩg Nyekuci.

¹⁴ Baa hĩĩnĩ naa ꞌJudeeinit ꞌcĩ habũnna gẽrrẽẽt, ngaatĩ haꞌthũũnnĩ nyepitee baa aarĩk nyakangaaꞌnya cĩgannĩg, hĩllõõan eet ꞌcĩg halĩꞌthaanna hĩ nganĩĩt hõdẽĩ vẽlẽk.

¹⁵ Nẽẽthĩ, baa nga hittirria naana, baa ẽbẽraawa Nyekuci nganĩĩt nẽ ũtũvvaawa bũnnaiittaa cĩnnĩ. Nĩngĩtĩ accamanõõthĩkĩ nẽẽ

¹⁶ ngaatĩ eterꞌtheeka nganĩĩt ngeerĩnĩ, hátĩ huduhaak eet vẽlẽk ꞌcĩg hõllõngaa ĩĩn ꞌJudeei nyeemuut cĩnnĩ ꞌcĩ abũnnaa nẽ nga hijina eet umwaa nyeemuut icci ũdũt.

¹⁷ Nẽ nga hũũk ꞌJeruꞌthalẽma, hũũk hijin ꞌthooyyiak cĩg Yeesu, baag uwwattaa hĩ nganĩĩt thõõth umwa. Hõkõ hinnia hedeceehi cũrũmũũm ĩĩcĩ battaali cĩ Arabia, ma baa uruta, hikia hobodootha ĩĩcĩ ꞌtaaũn cĩ Damaathĩko.

¹⁸ Ma baa urutaa cĩ irkiꞌnyia iyyio, hikia hidiimotha Pẽẽtũrũ ꞌJeruꞌthalẽma nĩngĩtĩ hau harũmeenna waathinniook õmmõtõ hĩ ꞌtur.

¹⁹ Baa aitiõõ hõllõngaa homotoonna hĩ ꞌthooyyiak baag ũgĩ, ꞌJeemith dioo ꞌgõtõõnõgĩ Makayyioohit cĩnaac Yeesu, ꞌcĩ baa homotoonna.

²⁰ Habũtani Nyekuc dĩdĩ, thõõth ꞌcĩ heheedi naa ho, ĩĩn thõõth dĩdĩ ꞌcĩ hiꞌthihi õlõng.

²¹ Ma baa uruta, hũũha ĩĩcĩ looc cĩ Thiiria, nĩngĩtĩ hõyõyyõrĩĩ ĩꞌthõng hõdõlan looc cĩ ꞌCilicia.

²² Nẽ korrioohĩ nĩĩcag buúk, baa nga hagayyia lothippiꞌnya ꞌcĩg lemmiook cĩg Yeesu Krĩstõ cĩg looc cĩ ꞌJudeea ho nganĩĩta.

²³ Athĩhĩ nuun nẽẽg haaga aĩ ngaana, ũtũhũĩ tarĩ ẽẽtĩ baa gõõng arukeet nĩnga, ikia irrioon nyeemuut ꞌcĩ abũnnaa, baa nga adiim acũda nẽẽ eet loota nĩnga.

²⁴ Nĩngĩtĩ au adĩkꞌthĩ nẽẽg Nyekuc, hĩnĩngĩtĩ nganĩĩta.