Eevvetho 5 - ꞌBuuk cĩ Thõõth cĩ Nyekuci

ꞌGõõl ꞌcĩ haattiyyi lanyita

¹ Nẽẽthĩ hoti ho, ĩthahithit Nyekuc hĩ lohollia cĩgĩnnĩg ꞌcĩg ammĩnan nẽẽnĩ

² nẽ ĩmmĩnattoou hĩ baa ammĩnanneet Krĩstõ ngagĩĩt nẽ ẽlẽmana ẽlẽ cĩnnĩ hĩĩ ꞌgaarrieenit ꞌcĩ õꞌngõlĩ ẽmmẽdĩ, ꞌcĩ abũnnaa ꞌcĩ aaꞌnyĩhoothĩk Nyekuc.

³ Ma haaꞌnyiku thooꞌthiok ꞌcĩg ĩĩn ꞌriiring hẽdẽẽnyta hõrggẽẽnaa cunuung hode ainnu ngaam ngaam, hĩnĩngĩtĩ ĩĩn cieeg thooꞌthiok ꞌcĩg abathĩ ꞌcĩg occa hõllõngaa adĩman eeta ꞌcĩg ẽllẽẽmĩth cĩg Nyekuci.

⁴ Hode ma hothooꞌthu thooꞌthiok ꞌcĩg ĩĩn ꞌriiring ꞌcĩg occa aꞌnyaha ngaaoni, hode thooꞌthiok ꞌcĩg occa hõllõngaa eelluunga, ꞌcĩg hõllõngaa abũnnaa, nẽẽthĩ, othoothit thooꞌthiok ꞌcĩg occa anneeku Nyekuc ĩlaallẽ.

⁵ Hĩnĩngĩtĩ thooꞌthiok iccig agaac jurrung ĩĩtõ, aitiõõ ẽẽtĩ ꞌcĩ adĩman hẽlẽggĩ ꞌcĩg ĩĩn ꞌriiring hode ẽẽtĩ ꞌcĩ aĩ ngaam ngaam, hõllõngaa hatĩ arigith ꞌgiimwa habuccieetaa cĩ Krĩstõ hĩ ĩcĩ Nyekuci, hĩnĩngĩtĩ ala eet ꞌcĩ aaĩ hoti, hẽlẽggĩ ꞌcĩg aar eeta hĩĩtõ nyekuꞌnya.

⁶ Ma haaꞌnyiku eet umwa higgooluung õlõnga haaga, hĩnĩngĩtĩ thooꞌthiok iccig, alĩĩllĩk Nyekuci eet ꞌcĩg hõllõngaa athĩhĩ thõõth cĩnnĩ.

⁷ Nẽẽthĩ hoti ho, ma hadĩmannu thooꞌthiok ꞌcĩg adĩman nẽẽgĩ.

⁸ Hĩnĩngĩtĩ baa gõõng aattiyyu niig hĩ eeta ꞌcĩg aattĩg muguuratõõ, nẽẽthĩ ꞌyioko, iittu eet cĩg lanyitaak, hĩnĩngĩtĩ iittu eet cĩg Makayyiooktak. Nẽẽthĩ ꞌyioko, aaut hĩ lohollia cĩg lanyitaak,

⁹ hĩnĩngĩtĩ aꞌnyaha lanyit ciee aaĩ hĩ ngagiit ko, thõõth ꞌcĩ abũnnaa hĩ ꞌcĩ aũlanĩ hĩ ꞌcĩ ĩĩn dĩdĩ diooni.

¹⁰ Nẽ ummuddia thõõth ꞌcĩ aaꞌnyĩk Makayyioohit haccamanoothĩk.

¹¹ Ũtũbũrĩt thooꞌthiok cĩg muguurak ꞌcĩg aꞌnyaha thooꞌthiok ꞌcĩg hõllõngaa abũnnaa, etereꞌthieek eet vẽlẽk hagaacõ bathi cĩnĩĩng.

¹² Hĩnĩngĩtĩ thooꞌthioha ꞌcĩg adĩman eeta ꞌcĩg hõllõngaa athĩhĩ Nyekuc burkiitina, haꞌngaaõn ngaatĩ occa habbũũngĩ.

¹³ Nẽ ꞌgii vẽlẽk ꞌcĩ attũhũl lanyita, appulanniaa hedeeꞌnyia,

¹⁴ hĩnĩngĩtĩ lanyit ꞌcĩ aaꞌnyĩk ꞌgii vẽlẽk hedeeꞌnyia. Ĩnõõ ꞌcĩ aĩnnĩ ꞌBuuhi cĩ Nyekuci, “Anneek uꞌnyaakiahit tĩnga, rũga daahĩtha, hátĩ haaꞌnyi Krĩstõ lanyit.”

¹⁵ Nẽẽthĩ, ĩcĩnĩt authet ꞌcĩ aattiyyu jurrung. Ma haattiyyu hĩ ꞌgiiꞌthiaha, aaut hĩ ꞌgeeꞌnyiaha.

¹⁶ Ĩdĩmanit thooꞌthiok ꞌcĩg abũnnaa hõdõõkõthĩ, hĩnĩngĩtĩ ĩĩn cieeg korriook ꞌcĩg abathĩ.

¹⁷ Nẽ ma haggiithennu, agaac tabiinit cĩ Makayyiookto.

¹⁸ Aanytĩk Lori ꞌcĩ Ẽllẽẽmĩth haggam rũgẽt cunuung. Ma hiꞌnyiathanaannu eleeti dũũtĩtha, hĩnĩngĩtĩ aĩnanaakuung dũũtĩthĩ ĩdĩmanit thooꞌthiok ꞌcĩg mẽẽlĩg ꞌcĩg abathĩ.

¹⁹ Ma alũteennu hõdẽĩ laiitta, ebenit tegellwa cĩg laiittak nẽ idihiꞌthu Makayyioohit ꞌthinneetinii cugguung vẽlẽk.

²⁰ Ĩĩttĩk Nyekuc Baangeet ĩlaallẽ hõdõõkõthĩ, hĩnĩngĩtĩ thooꞌthiok vẽlẽk, ꞌthaarĩĩ cĩg Makayyioohit cĩnaac Yeesu Krĩstõ.

Ngaaĩ hĩ maaccwa

²¹ Ĩthĩhĩt ꞌgoonogu ꞌcĩg ĩĩn lemmiook tẽẽlꞌthĩtaa cĩ Krĩstõ.

²² Ĩnõõ ꞌcĩ occa athiknu niig ngaaĩ maaccwa cugguung, haau hĩcĩ occa athiknu Makayyioohit ko.

²³ Hĩnĩngĩtĩ maac ꞌcĩ ĩĩn makayyioohit cĩ ngaa cĩnnĩ, hĩcĩ ĩĩn Krĩstõ makayyioohit cĩ lothippit cĩ lemmiook ꞌcĩg ĩĩn ẽlẽ cĩnnĩ nẽ ĩĩ Ellioohit cĩnĩĩng.

²⁴ Hĩcĩ athĩhĩ lothippiti cĩ lemmioohu Krĩstõ, noho buúk aꞌnyĩĩk ngaaĩ hĩthĩhĩt maaccwa cĩggĩĩng thooꞌthiohĩ vẽlẽk.

²⁵ Niig maaccwaana, ĩmmĩnanit ngaaĩ cugguung hĩ baa ammĩnan Krĩstõ lothippit cĩ lemmioohu nẽ ẽlẽmana ẽlẽ cĩnnĩ, hĩnĩngĩtĩ ĩhõõggõ.

²⁶ Baa aaꞌnyĩk Krĩstõ lemmiook helleemito ngaatĩ ũũnyĩ ĩhõõggõ maamĩ, ꞌtirriaanaa cĩ thõõth cĩ Nyekuci.

²⁷ Baa adĩman Krĩstõ hoti, hátĩ haaꞌnyĩk lothippit cĩ lemmioohu ꞌcĩ ĩĩn ẽlẽ cĩnnĩ, hĩĩ lothippit ꞌcĩ abuli ꞌcĩ ẽllẽẽmĩthĩ, ꞌcĩ aitiõõ thooꞌthioha ꞌcĩg ĩĩn ꞌriiring ꞌcĩg abathĩ tõõ. Nẽẽthĩ hinnia, ẽllẽẽmĩth hatĩ nẽẽ nẽ iittiõõ bathi tõõ.

²⁸ ꞌGõõlaa ꞌcĩ aduhõõ thõng, adiim ammĩnan maaccwaana ngaaĩ cĩggĩĩng, haauto hĩcĩ ammĩnan nẽẽg eleeti cĩggĩĩng. Ẽẽtĩ ꞌcĩ ammĩnan ngaa cĩnnĩ, ammĩnan nẽẽ ẽlẽ cĩnnĩ buúk.

²⁹ Nẽẽthĩ nẽẽꞌthẽk, aitiõõ ẽẽtĩ ꞌcĩ occa aaburreek ẽlẽ cĩnnĩ tõõ, nẽẽthĩ hinnia, occa aꞌthũũnnĩ ẽẽtĩ ẽlẽ cĩnnĩ nẽ itirok haau hĩcĩ aꞌthũũnnĩ Krĩstõ lothippit cĩ lemmiook cĩgĩnnĩg,

³⁰ hĩnĩngĩtĩ hĩĩgĩn naag dhooriꞌnya cĩg ẽlẽ cĩnnĩ.

³¹ Hĩcĩ aduha ꞌBuuhi cĩ Nyekuci aĩ, “Ũũnnĩk hatĩ ẽẽtĩ maaꞌnyĩ hĩ aattĩnnĩ nẽ õõt ũrũmtĩ hĩ ngaa cĩnnĩ hĩĩtõ ẽlẽ hõdẽẽthõng.”

³² Ĩĩn ciee thõõth ꞌcĩ ĩllõõan ꞌgẽẽnyĩth cĩ eetu, nẽẽthĩ, hothoothi naa Krĩstõ hĩ lothippit cĩ lemmioohu.

³³ Nẽẽthĩ ꞌthẽk, adiim ammĩnan maac ngaa cĩnnĩ hĩcĩ ammĩnan nẽẽ ẽlẽ cĩnnĩ, nẽ adiim iꞌngolli ngaa maac cĩnnĩ.