Eevvetho 4 - ꞌBuuk cĩ Thõõth cĩ Nyekuci

Rũmẽẽnĩt ẽllaa cĩ Krĩstõ

¹ Halayyuung naa ngagiit baabutheeniti cĩ Makayyiookto, aaut ꞌgõõlaa ꞌcĩ abũnnaa hĩ baa ẽbẽraauung Nyekuci ngagiit ĩĩtõ eet cĩgĩnnĩg.

² Ĩĩtõ tarbalĩg gẽrrẽẽt nẽ aꞌnyaktu ꞌthinneeti ꞌcĩg alalĩ, aꞌnyahit ꞌthinneeti ꞌcĩg makatĩg hĩ ꞌgoonogu nẽ etemeeꞌthu thooꞌthiok vẽlẽk mĩnnaniitta.

³ Ĩttĩmanit ngaatĩ aꞌthuunnu rũmẽẽnĩt cĩ Lori cĩ Nyekuci ꞌthinneetinii cugguung. Ĩdĩmanit hoti, ꞌgõõlaa ꞌcĩ aattiyyu lõꞌngõõc.

⁴ Iiginnu niig vẽlẽk eet cĩg ẽlẽ hõdẽẽthõng. Ĩĩn Lorii cĩ Nyekuci hõdẽẽthõng, hĩ baa aaꞌnyuung ngagiit Nyekuci muhẽẽnĩt hõdẽẽthõng ꞌcĩ abũnnaa.

⁵ Haꞌnyak naag Makayyioohit hõdẽẽthõng diooni hĩ lemiinit hõdẽẽthõng hĩ baattithimo hõdẽẽthõng.

⁶ Aaĩ Nyekuci hõdẽẽthõng ꞌcĩ ĩĩn Maaꞌnyĩ eet vẽlẽk. Hõllõngaa ĩllõõan nẽẽ eet vẽlẽk diooni, adticaninneet nẽẽ ngagĩĩt vẽlẽk nẽ aaĩ nẽẽ hĩ ngagĩĩt vẽlẽk.

⁷ Baa eꞌngereeheet Krĩstõ ꞌthĩnĩtaa cĩnnĩ ꞌcĩ callĩ ꞌbaaninit ngagĩĩt vẽlẽk.

⁸ Hĩcĩ aduha ꞌBuuhi cĩ Nyekuci aĩ, “Ma baa ũũk nẽẽ lokora ngaatĩ uuni gẽrrẽẽt, ikia ũũhĩ nẽẽ baabuuthnya ꞌcĩg mẽẽlĩg nẽ aaꞌnyĩk eet ꞌbaaninit.”

⁹ Ma aĩ, “Baa õtõd nẽẽ hẽẽtahujjieen,” aĩ thõõth ciee, baa aaĩ Krĩstõ loota nĩnga.

¹⁰ Nẽ tarĩ ĩĩ thõõth ciee buúk, ẽẽtĩ baa aaĩ loota, ĩnõõnnõ ꞌcĩ õtõd hũũk hẽẽtahujjieen ko, hátĩ haau nẽẽ hẽẽtahujjieen hĩ loota vẽlẽk.

¹¹ Baa ĩnõõnnõ ꞌcĩ ẽbẽra eet ũgĩ hĩĩtõ ꞌthooyyiak nẽ ẽbẽra ũgĩ hĩĩtõ põrõvẽtaaꞌnya nẽ ẽbẽra ũgĩ hĩĩtõ eet ꞌcĩg allimaneek eet thõõth cĩ Nyekuci nẽ ẽbẽra ũgĩ hĩĩtõ paadĩrꞌnya hĩ ꞌlimmanniook,

¹² hillimanit eeta cĩg Nyekuci ꞌgõõl ꞌcĩ adticanõõthĩkĩ eet ũgĩ, hátĩ hĩtĩlĩth ẽlẽ cĩ Krĩstõ hittiran.

¹³ Õkõ hatĩ dtiici ciee ĩĩcĩ oou ĩꞌthõng hũrũmeet lemiiniti nẽ hagaacõ Ngeertĩ Nyekuci. Nẽẽthĩ hatĩ hiita hĩtĩlĩthĩt naag hĩĩtõ makatĩg, lemiittaa hĩ Yeesu Krĩstõ nẽ hiita haauto naag hĩ nẽẽnĩ.

¹⁴ Occa hõllõngaa haattĩg naag hĩ lohollia ꞌcĩg hidiciẽẽgĩ. Occa hõllõngaa haaꞌnyĩk eet ꞌcĩg ĩĩn oloꞌngiaak higgoollieet ꞌlimmaanaa cĩnĩĩng ĩcĩ ĩĩn õlõng, ĩcĩ aaĩ hĩ ngõõtĩ ꞌcĩ uuhan tahatak.

¹⁵ Nẽẽthĩ hinnianĩ, ma hõthõõth naag thõõth ꞌcĩ ĩĩn dĩdĩ mĩnnaniitta, halĩthĩ hatĩ naag thooꞌthiohĩ vẽlẽk, hiita haauto hĩ nẽẽ ꞌcĩ ĩĩn Makayyioohit, ĩnõõnnõ Krĩstõ.

¹⁶ Arũm Krĩstõ ẽlẽ cĩnnĩ ho hĩĩ hõdẽẽthõng nẽ aaꞌnyĩk hidticattõõ dhooriꞌnya vẽlẽk jurrung, hĩcĩ alĩthĩ hokomit hĩnĩngĩtĩ mĩnnani.

Aꞌnyaha Yeesu rũgẽt ꞌcĩ ĩĩn ngeju

¹⁷ Hĩ nuyyioohiti cĩ Makayyiookto, haduhaakuung hanneekuung ibilli authet ꞌcĩ aattiyyu hĩ eeta ꞌcĩg aggiithi ꞌcĩg hõllõngaa aga Nyekuc.

¹⁸ Adĩĩtĩ ĩhõõggõ ooti pĩd nẽ ĩĩtõ ꞌrẽẽttĩg hĩ authet cĩ Nyekuci, hĩnĩngĩtĩ aggiithi nẽẽg nẽ aalla õkõmĩ ĩhõõggõ ooti kak.

¹⁹ Aitiõõ ĩhõõggõ ngaaoni tõõ. Ara nẽẽg adĩman thooꞌthiok ꞌcĩg ĩĩn ꞌriiring nẽ aalla arĩnyaneek ngaatĩ adĩmanĩ thooꞌthiok ꞌcĩg ĩĩn ꞌriiring vẽlẽk ko diooni.

²⁰ Nẽẽthĩ niiga, baa hõllõngaa au agayyu niig Krĩstõ ꞌgõõlaa nĩĩca.

²¹ Dĩdĩ, iita agayyu niig ĩnõõnnõ nẽ baa illimatteeu niig thõõthaa cĩnnĩ ꞌgõõlaa cĩ thõõth ꞌcĩ ĩĩn dĩdĩ, ꞌcĩ aaĩ hĩ Yeesu.

²² Udhukteek authet baalluung ꞌthẽccaneetu baa ꞌrẽẽnĩ tuu, ꞌcĩ ẽꞌthẽcan thooꞌthioha ꞌcĩg ĩĩn ꞌriiring hĩ õlõng.

²³ Aanytĩk muhẽẽnĩt cunuung hũtũhũĩ hĩĩ ngeju,

²⁴ nẽ aaꞌnyuung ĩĩtõ eet ꞌcĩg ĩĩn ngeju. Baa ẽhẽnytaannuung Nyekuci ngagiit aaut hĩ nẽẽnĩ, abũnnaa adĩmannu thooꞌthiok ꞌcĩg adiim nẽẽnĩ nẽ elleemtu dĩdĩ.

Nyattalliook cĩg rũgẽt ꞌcĩ ĩĩn ngeju

²⁵ Ma nga hoolongeeku ꞌgoonogu, iꞌthiattaaĩ uduktaak ĩhõõggõ thõõth ꞌcĩ ĩĩn dĩdĩ, hĩnĩngĩtĩ hĩĩgĩn naag ũbũtĩ cĩ ẽlẽ hõdẽẽthõng.

²⁶ Ma haaꞌnyĩku liilii hĩĩnanaahuung ꞌthẽccan. Ma hooyyu ũꞌnyaahĩ lĩĩlĩẽẽtta,

²⁷ nẽ ma hẽlẽmaaku habu cĩ loriẽẽt ꞌcĩg abathĩ huduhunaahuung ngagiita.

²⁸ Ẽẽtĩ ꞌcĩ baa gõõng ĩgõrꞌthĩ, aꞌnyĩĩk hũtũngeek ĩgõr, adiim ꞌthẽk adtican ẽẽtĩ dtiic ꞌcĩ occa ẽẽl ĩnõõnnõ athĩnĩĩ cĩgĩnnĩg ẽmmẽn, hátĩ hũmmũda ꞌgii ꞌcĩ occa õthõl hĩ pĩĩrnatttiaak.

²⁹ Ma hothooꞌthu thooꞌthiok ꞌcĩg abathĩ. Aanytĩk thooꞌthiok ꞌcĩg aduhaannu hĩĩ ꞌcĩg abũnnaa, hátĩ hẽẽl eet ꞌcĩg athiknuunga.

³⁰ Nẽ ma haaꞌnyiku Lori ꞌcĩ Ẽllẽẽmĩth cĩ Nyekuci hĩlĩĩlĩ, Lori baa amacaaraniinnu niig, hĩnĩngĩtĩ kõr ꞌcĩ hatĩ ooggiannu ꞌthẽccanẽẽtĩĩ cugguung.

³¹ Ũtũngteek tõngõrõrẽẽꞌthĩt hĩ liilii hĩ ngoongoi hĩ jore hĩ thõõth ꞌcĩ othooꞌthu ꞌgoonogu ꞌbuth hĩ thooꞌthiok vẽlẽk ꞌcĩg abathĩ.

³² Nẽẽthĩ hinnianĩ, ĩĩtõ tarbalĩg nẽ atamaattihu ꞌgoonogu, hĩ baa ammaannikuung Nyekuci ngagiit, hĩnĩngĩtĩ Krĩstõ.