Eevvetho 3 - ꞌBuuk cĩ Thõõth cĩ Nyekuci

Paaulo ꞌlimmannioohit cĩ eet ꞌcĩg hõllõngaa ĩĩn ꞌJudeei

¹ Hikia hĩĩna naa Paaulo baabutheenit cĩ Krĩstõ, hátĩ heeluung ngagiit eet ꞌcĩg hõllõngaa iiginnu ꞌJudeei.

² Dĩdĩ, occa ithiktu niig tarbalꞌthẽẽt cĩ Nyekuci ngaatĩ ẽbẽraanna nganĩĩt hikia heeluung ngagiita.

³ Nẽ baa hẽhẽẽdakuung naa ngagiit waraga ꞌcĩ huturi, ꞌcĩ eterꞌtheeka Nyekuci nganĩĩt thooꞌthiok cĩgĩnnĩg ꞌcĩg baag gõõng ammiꞌthi.

⁴ Hĩcĩ agiillu niig waraga icci, ammũdaannu hatĩ jurrung ꞌgõõl ꞌcĩ hathĩknĩ naa thõõth cĩ Krĩstõ ꞌcĩ ammiꞌthi.

⁵ Baa nga haga eet umwaa thõõth icci ammiꞌthi ho, ĩꞌthõng hikia huduhaak Lorii cĩ Nyekuci ꞌthooyyiak hĩ põrõvẽtaaꞌnya cĩgĩnnĩg ꞌcĩg ẽllẽẽmĩthĩ.

⁶ Nẽ muhẽẽnĩt ꞌcĩ ĩllõõan ꞌgẽẽnyĩth cĩ eetu ho cieeni. Hĩnĩngĩtĩ Yeesu Krĩstõ, aaꞌnyĩk nyeemuut ꞌcĩ abũnnaa eet ꞌcĩg hõllõngaa ĩĩn ꞌJudeei, hotholit hĩ eet ꞌcĩg ĩĩn ꞌJudeei vẽlẽk, baliinit ꞌcĩ hatĩ arigith lohollia cĩg Nyekuci. Au hatĩ ĩĩn eeta cĩg ꞌJudeei hĩ eet ꞌcĩg hõllõngaa ĩĩn ꞌJudeei vẽlẽk, ẽlẽ hõdẽẽthõng nẽ accamanoothĩk hatĩ nẽẽg vẽlẽk ꞌgattaana, hĩnĩngĩtĩ iita ĩĩtõ nẽẽg vẽlẽk eet cĩg Yeesu Krĩstõ.

⁷ ꞌBaanittaa cĩ bũnnai cĩ Nyekuci hĩ ꞌtirriaanaa cĩnnĩ ĩcobbi, aaꞌnyĩhoothĩhaa nganĩĩt dtiici ꞌcĩ hadticanõõthĩkĩĩ ĩnõõnnõ nẽ hillimana nyeemuut ꞌcĩ abũnnaa.

⁸ Tananga hĩĩnĩ naa eet umwa haaga eetinii cĩg Nyekuci vẽlẽk, baa aaꞌnyĩhoothĩkaa nganĩĩt bũnnai ciee, hátĩ hillimaneek eet ꞌcĩg hõllõngaa ĩĩn ꞌJudeei baliinit cobbi gẽrrẽẽt ꞌcĩ aaĩ hĩ Krĩstõ.

⁹ Baa heberria naa, hátĩ hẽddẽẽbak eet vẽlẽk thooꞌthiok ꞌcĩg ĩllõõan ꞌgẽẽnyĩth cĩ eetu, baag agunyuth Nyekuci Teheꞌnyioohiti cĩ hẽlẽggĩ vẽlẽk, ngaanĩngĩtĩ ꞌthianaattõ.

¹⁰ Baa tabiinit cĩ Nyekuci vẽlẽk ꞌcĩ baa adticaniini nẽẽ lothippit cĩ lemmioohu, hẽtẽrẽthaak ꞌgẽẽnyĩth cĩnnĩ ꞌcĩ aaĩ cũũmõ cũũmõ, makayyiook hĩ habuẽẽt ꞌcĩg hõllõngaa edeeꞌnyia ꞌcĩg aggam hẽẽtkujjieen.

¹¹ Baa muhẽẽnĩt cĩ Nyekuci ciee baa nga hẽtẽhẽnya nẽẽ looc. Nẽ baa ũũlũ Nyekuci ngaatĩ ẽdẽcaakĩ dtiic baa ammuk nẽẽ, hĩnĩngĩtĩ hẽlẽggĩ vẽlẽk baag adĩman Yeesu Krĩstõ Makayyioohiti cĩnaac.

¹² Nẽẽthĩ ꞌyioko, ikia ũkũtaneet Krĩstõ ngagĩĩt, hĩnĩngĩtĩ athĩhĩ nẽẽ Nyekuc nẽ occa iittiõõ hõllõngaa hiꞌngolli naag ngaatĩ hõõĩ hĩ Nyekuc cũrũmũũm muumaa cĩnnĩ.

¹³ Ĩnõõ ꞌcĩ occa hõllõngaa aduulẽnĩ ngagiit ꞌthinneeti, hatĩ haccanannii naa hĩnĩngĩtĩ ngagiit ko. Nẽẽthĩ nẽẽꞌthẽk, aꞌnyahaakuung hatĩ ngagiit ꞌcannani caannĩ ho bulẽẽnĩt.

Mĩnnan cĩ Krĩstõ hĩnĩngĩtĩ ngagĩĩta

¹⁴ Ma hammuhi thooꞌthiok iccig vẽlẽk, hakati huruꞌnyia nĩngĩtĩ halaĩ Baangeet,

¹⁵ Teheꞌnyioohit ꞌcĩ akanneek ꞌthaar eet cĩg halang cĩnnĩ vẽlẽk hẽẽtahujjieen hĩ loota.

¹⁶ Ĩllõõan Nyekuci nẽ abuli. Halayyi naa haini, aꞌnyĩĩk haaꞌnyuung Lorii cĩnnĩ ngagiit, ĩĩtõ nuyyiook ꞌcĩg attirannu,

¹⁷ hatĩ haau Krĩstõ ꞌthinneetinii cugguung, hĩnĩngĩtĩ lemiinit cunuung. Uꞌthuutti thõõth cĩnnĩ jurrung nẽ okomit mĩnnaanaa cĩnnĩ.

¹⁸ Halayyi naa haini, aꞌnyĩĩk Nyekuc haaꞌnyuung agaac niig hĩ eet vẽlẽk cĩg Nyekuci thõõth ꞌcĩ aĩ, maka mĩnnanĩ cĩ Krĩstõ ĩllõõanĩ.

¹⁹ Hadiimmuung naa ngagiit agaac thõõth vẽlẽk cĩ mĩnnan cĩ Krĩstõ, tananga ĩllõõan ꞌgẽẽnyĩth ꞌcĩ occa appiimanni, nẽẽthĩ hatĩ aau Nyekuci rũgẽtaa cunuung.

²⁰ Nẽ ꞌyioko, aꞌnyĩĩk bulẽẽnĩt vẽlẽk haau hĩ Nyekuc. Ĩnõõnnõ ꞌcĩ ũũlũ ngaatĩ occa adticanĩ thooꞌthiok ꞌcĩg ĩllõõan ngaatĩ occa hajini ĩnõõnnõ hode hammuhi, ꞌtirrianaa ꞌcĩ adticaniini nẽẽ eleetinii cĩggaac.

²¹ Aꞌnyĩĩk lothippit cĩ lemmioohu hĩ Yeesu Krĩstõ haanytĩk Nyekuc bulẽẽnĩt irkiꞌnyia hĩ irkiꞌnyia! Aamẽn.