Eevvetho 2 - ꞌBuuk cĩ Thõõth cĩ Nyekuci

Harũgĩ naag hĩnĩngĩtĩ Krĩstõ

¹ Nẽẽthĩ, baa adaaktu niig, hĩnĩngĩtĩ ꞌthẽccanẽẽt cugguung,

² ꞌgõõlaa baa gõõng aattiyyu nẽ unuyyu thooꞌthiok cĩg looc nicci nẽ ĩthĩktu ꞌThĩttaan makayyioohit cĩ makaaꞌthĩt cĩ looc ꞌcĩ hõllõngaa edeeꞌnyia. Ĩĩn ꞌThĩttaanĩ lori ꞌcĩ adticani ꞌthinneetinii cĩg eet ꞌcĩg hõllõngaa athĩhĩ Nyekuc.

³ Baa gõõng haattĩg naag vẽlẽk noho, ngaatĩ hanũĩ hẽlẽggĩ ꞌcĩg abũraneek eleeti cĩggaac. Nẽ hĩnĩngĩtĩ thooꞌthiok baag hadĩman naaga, ikia ĩlĩĩlĩeeheet Nyekuci ngagĩĩt haau hĩcĩ alĩĩllĩk eet vẽlẽk.

⁴ Nẽẽthĩ, hĩnĩngĩtĩ mĩnnan cĩnnĩ cobbi ꞌcĩ aꞌnyaheekeet nẽẽ ngagĩĩta, ikia Nyekuci ꞌcĩ aꞌnyak tamaati ꞌcĩ maka,

⁵ aaꞌnyeet ngagĩĩt hũrũgĩt hõdẽĩ hĩ Krĩstõ. Tananga baa hadaahito naag hĩnĩngĩtĩ ꞌthẽccanẽẽta, iita eelliau niig bũnnaiittaa cĩnnĩ.

⁶ Nĩngĩtĩ arũgthanneet Nyekuci ngagĩĩt daahĩtha, hõdẽĩ hĩ Krĩstõ nẽ aaꞌnyeet hũrũmtĩ hĩ Yeesu Krĩstõ hẽẽtahujjieen.

⁷ Baa adĩman Nyekuci thõõth icci hoti, hátĩ horumwa heteretheeheet ngagĩĩt ꞌgõõl ꞌcĩ ĩĩnnĩ bũnnai cĩnnĩ maka nẽ ĩĩ tarbal hĩ ngagĩĩt dĩdĩ, hĩnĩngĩtĩ thõõth ꞌcĩ ĩdĩman Yeesu Krĩstõ.

⁸ Baa eelliannu niig, hĩnĩngĩtĩ elemmu Nyekuc ꞌcĩ aꞌthũũnneet ngagĩĩt jurrung, hĩllõõan ꞌgii ꞌcĩ hadiim naaga. ꞌBaaninit cĩ Nyekuci hĩ ngagiit cieeni nẽ hõllõngaa ĩĩn ꞌgiimwa ꞌcĩ baa adĩmannu niig ẽmmẽn.

⁹ Hõllõngaa ĩĩn elliaanĩtĩ dũman cĩ dtiicanĩ ꞌcĩg baag hadĩman naaga, nẽ occa aitiõõ ẽẽtĩ ꞌcĩ irrian, hĩnĩngĩtĩ elliaanĩt tõõ.

¹⁰ Hĩĩgĩn naag eet ꞌcĩg ẽhẽnyta Nyekuci ꞌcĩg ĩĩn ngeju, baag hẽhẽnytaa haaut hõdẽĩ hĩ Yeesu Krĩstõ, hátĩ hĩdĩmanit dtiicanĩ ꞌcĩg abũnnaa baag ũkũmaneekeet Nyekuci ngagĩĩt baa ĩĩcĩ oou hĩdĩmanit.

Arũmmeet Krĩstõ hĩĩtõ hõdẽẽthõng

¹¹ Ma hataarroꞌthu ngaatĩ baa iiginnu niig eet ꞌcĩg hõllõngaa iiginnu ꞌJudeei. Baa gõõng aũũyyuung eeta cĩg ꞌJudeei anneekuung, “Eet ꞌcĩg nga hetteeddi eleeti ꞌcĩg hõllõngaa ĩĩn ꞌJudeei,” baa gõõng irrian nẽẽg, hĩnĩngĩtĩ ẽttẽẽd eleeti cĩggĩĩng.

¹² Baa nohota, baa erekuung ngagiit Krĩstõ. Baa iiginnu eet cĩg looc cĩrrĩĩng looccaa cĩ Ĩꞌthĩraẽlĩ nẽ hõllõngaa othollu lõhõt baa adak Nyekuci hĩ ĩhõõggõ. Baa aattiyyu niig loota nĩnga, baa aitiõõ Nyekuci hĩ ngagiit tõõ nẽ iittiõõ muhẽẽnĩtĩ ꞌcĩ abũnnaa buúk tõõ.

¹³ Nẽẽthĩ ꞌyioko, urumtu niig eleeti cugguung hõdẽĩ hĩ Yeesu Krĩstõ. Baa gõõng iiginnu niig ꞌrẽẽttĩg hĩ Nyekuc, nẽẽthĩ ꞌyioko, iita oboktoou niig hĩ ĩnõõnnõ, hĩnĩngĩtĩ biyyi cĩg Krĩstõ.

¹⁴ Hĩnĩngĩtĩ aꞌnyaha Krĩstõ ganõn cĩnaac, ikia ũrũm nẽẽ eet cĩg ꞌJudeei hĩ ꞌcĩg hõllõngaa ĩĩn ꞌJudeei, hĩĩtõ hõdẽẽthõng ẽllaa cĩnnĩ ĩbaa õdõõddĩ hurucceea. Baa ĩꞌthaan nẽẽ araan ꞌcĩ eꞌngerreet ngagĩĩt haaburro.

¹⁵ Daahĩthaa cĩnnĩ, ĩbĩlĩ nẽẽ ꞌgõõl ꞌcĩ adticaniini nyattalĩ cĩ Mũũꞌtha hĩ tilooinit cĩnnĩ vẽlẽk. Ikia ĩdĩman nẽẽ ganõn hõrggẽẽnaa cĩ eet cĩg ꞌJudeei hĩ ꞌcĩg hõllõngaa ĩĩn ꞌJudeei, ngaatĩ arũmĩ ĩhõõggõ hĩĩtõ hõdẽẽthõng.

¹⁶ Nẽ ẽllaa nĩĩcĩ dioo, ikia aganĩth Krĩstõ ĩhõõggõ hĩ Nyekuc, ngaatĩ adaaknĩ hurucceea nẽ ĩbĩlĩ mẽdẽr cĩnĩĩng.

¹⁷ Baa aꞌnyahaakuung nẽẽ ngagiit Nyeemuut icci Abũnnaa cĩ ganõnõõ ho, eet ꞌcĩg hõllõngaa iiginnu ꞌJudeei, baa iiginnu ꞌrẽẽttĩg hĩ ĩnõõnnõ nẽ aꞌnyahaak ganõn eet cĩg ꞌJudeei ꞌcĩg õbõhõõ hĩ ĩnõõnnõ.

¹⁸ Nẽ hĩnĩngĩtĩ Krĩstõ, hiita hummuddia naag ꞌJudeei hĩ eet ꞌcĩg hõllõngaa ĩĩn ꞌJudeei, ꞌgõõl ꞌcĩ hõõĩ hĩ Baangeet Loriia nĩĩcĩ dioo.

¹⁹ Hĩnĩngĩtĩ thõõth icci, iittiõõ niig hõllõngaa iiginnu eet cĩg looc cĩrrĩĩng, iittu niig eet cĩg halang cĩ Nyekuci,

²⁰ hõdẽĩ, hĩthakthoothĩk naag ꞌcieeth cĩnnĩ ꞌcĩ ẽhẽnytĩ nẽ aauto ꞌthooyyiaha hĩ põrõvẽtaaꞌnya hĩ õkõlakꞌnya nẽ aau Yeesu Krĩstõ hĩ miirihi.

²¹ Krĩstõ ꞌcĩ arũm ꞌcieeth nicci hĩĩ hõdẽẽthõng nẽ aaꞌnyĩk hĩtĩlĩth hĩĩ ꞌcieeth ꞌcĩ ẽllẽẽmĩth cĩ Makayyiookto ho.

²² Nẽ iiginnu niig dhoorit cĩ ꞌcieeth tĩho, ꞌcĩ baa ẽhẽnyĩt Krĩstõ hĩĩ nĩngĩtĩ aayyi Lorii cĩ Nyekuci.