Ebereei 9 - ꞌBuuk cĩ Thõõth cĩ Nyekuci

Laiinit ꞌcĩ hũnũũk hĩ ꞌcĩ ĩĩn ngeju

¹ Nẽ ꞌyioko, lõhõt ꞌcĩ oou baa aarĩk Nyekuci hĩ eet cĩg Ĩꞌthĩraẽlĩ, aꞌnyak nyattalliook ꞌcĩg laiittak, nẽ tarĩ, aꞌnyak ꞌCieeth cĩ Nyekuci horrwaa ꞌcĩ õdõhõhĩĩ kak.

² Baa ẽhẽnytĩ ꞌCieeth ciee Nyekuci ho, haꞌnyak ꞌgoolliok ꞌramma. Aꞌnyak ꞌcĩ oou ꞌthiihit ꞌcĩ aꞌnyak ꞌlõõmẽẽt hĩ tẽrẽmẽẽja ꞌcĩ ataadõõthĩkĩ ũbũnĩ ꞌcĩ aꞌngirannii cĩ Nyekuci nẽ baa haĩ nĩngĩtĩ icci, Nĩngĩtĩ ꞌcĩ Ẽllẽẽmĩthĩ.

³ Nẽ ꞌCieetõõ ĩĩcĩ gõlla, baa aaĩ cẽrẽm ꞌcĩ ẽꞌngẽr ꞌcieeth hõrggẽẽna nẽ cẽrẽmaa ĩĩcĩ gõlla, aaĩ Nĩngĩtĩ Aꞌngirannii ꞌcĩ Ẽllẽẽmĩth Gẽrrẽẽt.

⁴ Aꞌnyak nĩngĩtĩ ciee altaarĩ ꞌcĩ ĩĩn ꞌdaab ꞌcĩ ĩwaadini mõhõõkacĩ nẽ aꞌnyak cadduk ꞌcĩ ĩĩn ꞌdaab cĩ lohoto. Nẽ cadduha ĩĩtõ, aꞌnyak hutuba ꞌcĩ ĩĩn ꞌdaab ꞌcĩ abbĩꞌthĩĩ ꞌgẽẽn ꞌcĩ haĩ manna, nẽ baa aaĩ hĩbahĩtĩ cĩ Arõõnẽ ꞌcĩ appuuha bõllõõk, nẽ aauto biyyiẽẽna cĩg lõhõtaak tõõ.

⁵ Cadduhaa cĩ lohoto ho lokora, abĩlĩ aajĩlẽẽta ꞌramma cĩg bulẽẽttak nẽ ẽbbẽttaanito havvuuto hithidit loriẽẽta cĩggĩĩng cadduk ꞌcĩ urwacanoothĩk biyyieeta ꞌcĩg ũũnnõthõõthĩkĩ ꞌthẽccanẽẽta nẽ occa hõllõngaa hẽddẽẽba thooꞌthiok iccig vẽlẽk ꞌyioko.

⁶ Nẽ ꞌgõõl ꞌcĩ baa aattiyyi hẽlẽggĩ vẽlẽk cieeni. Aduhun paadĩrꞌnya hõdõõkõthĩ Nĩngĩtĩ Ẽllẽẽmĩth ko, hõõt halayyio thõng.

⁷ Nẽẽthĩ, baa paadĩr cobbi dioo ꞌcĩ aduhun Nĩngĩtĩ Aꞌngirannii ꞌcĩ Ẽllẽẽmĩth Gẽrrẽẽt ko tabattĩ hõdẽẽthõng irkita. Aꞌnyak paadĩrĩ biyyi ꞌcĩg õkõ aꞌnyĩĩk Nyekuc hũtũũny ꞌthẽccanẽẽt cĩgĩnnĩg hĩ cĩg eetuk, ꞌthẽccanẽẽt baag adĩman nẽẽg nẽ hõllõngaa aga.

⁸ Nẽ ꞌgõõlaa cĩ, ẽtẽrꞌtha Lorii ꞌcĩ Ẽllẽẽmĩth aĩ, aitiõõ ẽẽtĩ ꞌcĩ occa aduhun Nĩngĩtĩ Aꞌngirannii ꞌcĩ Ẽllẽẽmĩth Gẽrrẽẽt ko, nga abĩlĩ ꞌCieeth cĩ Nyekuci tõõ.

⁹ Nẽ kõr nicci buúk, ẽtẽrꞌtha thõõth ciee aĩ, hõllõngaa naag hũũny ꞌthinneeti hĩĩtõ tẽllĩg, ꞌgõõlẽẽ ꞌcĩ haaꞌnyĩkĩ ꞌbaaninit hĩ ngaatĩ hĩbbõõrĩkĩ Nyekuc ꞌgaarriẽẽn.

¹⁰ Ĩĩn nyattalliooha cieeg ꞌgõõl ꞌcĩ adahĩ eeta ꞌgeenniok hĩ cĩg ahũdẽẽnĩ hĩ tũũnyẽnĩt cĩ eleetinu haaga. Nẽ nyattalĩ cĩ tũũnyẽnĩt cĩ eleetinu, adticanni hatĩ hĩdĩhĩdĩĩc haaga, ĩꞌthõng hikia hẽgẽẽran nyattalĩ ꞌcĩ ĩĩn ngeju.

Biyyi cĩg Krĩstõ

¹¹ Nẽẽthĩ ꞌyioko, ikia ĩĩ Krĩstõ paadĩr cobbi cĩ hẽlẽggĩ vẽlẽk ꞌcĩg abũnnaa ꞌcĩg aauto loota nĩnga ho. Nẽ uduhun nẽẽ ꞌCieeth cĩ Nyekuci hẽẽtahujjieen, ꞌcĩ baa hõllõngaa ẽhẽnyta ẽẽtĩ ꞌcĩ holli õõ nẽ hõllõngaa ĩĩn dhoorit cĩ looc ꞌcĩ ẽhẽnytaa thõng ko.

¹² Aitiõõ hõllõngaa aduhun Krĩstõ Nĩngĩtĩ Aꞌngirannii ꞌcĩ Ẽllẽẽmĩth Gẽrrẽẽt ko, biyyiẽẽtĩĩ cĩg ẽẽthak hĩ cĩg maala ꞌcĩg ĩĩn ꞌgaarriẽẽn. Baa aduhun Krĩstõ nĩngĩtĩ nicci tabattĩ hõdẽẽthõng biyyiẽẽtĩĩ cĩgĩnnĩg, hátĩ hõõgaeet ngagĩĩt ꞌthẽccanẽẽtĩ cĩggaac ũdũt.

¹³ Nyattaala baa ꞌrẽẽnĩ, baa gõõng adticaniini eeta biyyi cĩg ẽẽthak hĩ cĩg olĩꞌnyaannu hĩ hatiꞌtheet ꞌcĩ ĩwaadini moolĩtĩ, hũtũũnytĩ ꞌthẽccanẽẽt eleetinii cĩg eetuk.

¹⁴ Ummuhit dako nõõ ꞌgõõl ꞌcĩ ũũnyĩ biyyieeta cĩg Krĩstõ muhẽẽnĩt cĩ ꞌthinneeti cĩggaac, hĩnĩngĩtĩ ꞌthẽccanẽẽt ꞌcĩg hadĩman naag, hátĩ halaac Nyekuc ꞌcĩ arũgĩ ũdũt. ꞌTirrianaa cĩ Lori ꞌcĩ aalla ũdũt, ikia ẽlẽmana Yeesu ẽlẽ cĩnnĩ hĩ ꞌgaarrieenit ꞌcĩ ẽllẽẽmĩth, hĩnĩngĩtĩ ꞌthẽccanẽẽt cĩggaac.

¹⁵ Ĩnõõ ꞌcĩ ĩĩnnĩ Yeesu jayyio ꞌcĩ õthõõthĩ eet hĩ Nyekuc lõhõtaa ꞌcĩ ĩĩn ngeju, hátĩ hiita hummuddia eeta vẽlẽk baag avvaa, rũgẽt ꞌcĩ aalla ooo baa aduha Nyekuci. Hĩnĩngĩtĩ baa ꞌthẽk adaahĩ Krĩstõ, hátĩ hõõga ĩhõõggõ ukẽẽttaa cĩ ꞌthẽccanẽẽt baag adĩman lõhõtaa baa ꞌrẽẽnĩ.

¹⁶ Nẽẽthĩ ꞌyioko, má ũũnnĩk eet umwaa lõhõt, adiim agayyi jurrung ngaatĩ adaahĩ ẽẽtĩ ꞌcĩ baa aarĩk lõhõt ko.

¹⁷ Aku adticanni lõhõt urutaa cĩ daahĩth cĩ eet ꞌcĩ baa aarĩk lõhõt ko. Má nga arũgĩ ẽẽtĩ ꞌcĩ baa aarĩk lõhõt ko, aitiõõ lõhõt buúk hõllõngaa adticanni.

¹⁸ Ĩnõõ ꞌyioko baa aarĩhõõthĩkĩ lõhõt baa oou, hidticanõõ biyyiẽẽtĩĩ cĩg idiingak ko.

¹⁹ Urutaa baa itigiilihi Mũũꞌtha nyattalliook cĩg Nyekuci eet vẽlẽk, ikia ittiha nẽẽ biyyi cĩg maala hĩ cĩg ẽẽthak hĩ maam urwacanĩ ꞌbuuk cĩ nyattal cĩ Nyekuci hĩ eet buúk. Baa urwacaniini Mũũꞌtha cẽrẽm ꞌcĩ õlõõ hĩ bõllõõk.

²⁰ Ma ho, uduhaak eet ĩĩnnĩk, “Biyyi cĩg lõhõtaak cieegi, baa aduhaakuung ngagiit Nyekuci anneekuung uꞌthuutti.”

²¹ ꞌGõõlaa nĩĩcĩ dioo, ikia urwacan Mũũꞌtha ꞌCieeth cĩ Nyekuci horrwaa ꞌcĩ õdõhõhĩĩ kak, hĩ hẽlẽggĩ vẽlẽk ꞌcĩg adticaniini paadĩrꞌnya laiitta.

²² Nẽ dĩdĩ nyattaalaa cĩ Mũũꞌtha, ũũnyĩ hẽlẽggĩ vẽlẽk biyyiẽẽtĩ. Ma nga hibboorria biyyieeta, aitiõõ hõllõngaa ũũnnothoothĩk ꞌthẽccanẽẽta.

²³ Ĩnõõ ꞌcĩ ũũnyẽnĩ hẽlẽggĩ ꞌcĩg aattĩg ꞌCieethaa cĩ Nyekuci horrwaa ꞌcĩ õdõhõhĩĩ kak, ꞌcĩg ĩthakꞌthoothĩk hẽlẽggĩ ꞌcĩg aattĩg hẽẽtahujjieen, biyyiẽẽtĩĩ cĩg idiꞌngwaanu ho. Nẽẽthĩ, hẽlẽggĩ ꞌcĩg ĩĩn dĩdĩ ꞌcĩg aattĩg hẽẽtahujjieen, ũũnyĩ nẽẽg ꞌgaarriẽẽnĩĩ ꞌcĩg ẽllẽẽmĩth ĩĩcĩg ĩllõõan biyyi cĩg idiꞌngwaanu.

²⁴ Ĩnõõ baa hõllõngaa adukni Krĩstõ ꞌCieeth cĩ Nyekuci, baa ẽhẽnyta ẽẽtĩ ꞌcĩ holli õõ nẽ ꞌcieeth tĩho, ĩthakꞌthoothĩk ꞌcieeth ꞌcĩ ĩĩn dĩdĩ. Nẽẽthĩ, baa aduhun Krĩstõ hẽẽtahujjieen nẽ ꞌyioko arũmĩ nẽẽ hĩ Nyekuc heeleet ngagĩĩta.

²⁵ Baa hõllõngaa aduhun Krĩstõ hẽẽtkujjieen hũũk hẽlẽmana ẽlẽ cĩnnĩ tabattĩ hiriiri, hĩ paadĩrĩ cobbi loota nĩnga ꞌcĩ aduhun Nĩngĩtĩ Aꞌngirannii ꞌcĩ Ẽllẽẽmĩth Gẽrrẽẽt, biyyiẽẽtĩĩ cĩg idiꞌngwaanu noho tabattĩ hõdẽẽthõng irkiꞌnyia hĩ irkiꞌnyia ho.

²⁶ Má baa hẽlẽmana Yeesu ẽlẽ cĩnnĩ irkiꞌnyia vẽlẽk, occa baa appĩĩrna nẽẽ tabattĩ mẽẽlĩg nganĩngĩtĩ ẽhẽnytaanĩ lõõcĩ. Nẽẽthĩ, baa ẽlẽmana nẽẽ ẽlẽ cĩnnĩ tabattĩ hõdẽẽthõng diooni dtuurnattaa cĩ kõr tĩho, hátĩ hĩĩ nẽẽ ꞌgaarrieenit ꞌcĩ ũũny ꞌthẽccanẽẽta.

²⁷ Hĩgõõng adaahĩ ẽẽtĩ tabattĩ hõdẽẽthõng nẽ ẽttẽẽd Nyekuci thõõth cĩnnĩ,

²⁸ adaahĩ thĩ Krĩstõ buúk tabattĩ hõdẽẽthõng hĩĩ ꞌgaarrieenit ꞌcĩg attik ꞌthẽccanẽẽt cĩg eet ꞌcĩg mẽẽlĩg. Õbõda hatĩ Krĩstõ tarĩ, hõllõngaa õbõda hikia hittik ꞌthẽccanẽẽt cĩggaac diooni, õbõda Krĩstõ aꞌnyaha elliaanĩt cĩg eet ꞌcĩg ẽrẽ ĩnõõnnõ.