Ebereei 7 - ꞌBuuk cĩ Thõõth cĩ Nyekuci

Paadĩr Melkithẽdẽk

¹ Baa ĩĩn Melkithẽdẽhĩ habu cobbi cĩ ꞌtaaũn cĩ Thaalemĩ nẽ ĩĩ paadĩr cĩ Nyekuc ꞌcĩ ĩllõõan vẽlẽk. Melkithẽdẽk baa õõ õmmõtõõ hĩ Abũrahaamõ, nĩngĩtĩ aggatanĩ nẽẽ Abũrahaamõ baa õbõda joraa baa õõ aruhõõnĩ hĩ habuẽẽt ꞌcĩg mẽẽlĩg nẽ ĩllõõan ĩhõõggõ.

² Nẽ ikia aaꞌnyĩk Abũrahaamõ Melkithẽdẽk hẽlẽggĩ ũgĩ ꞌcĩg abadtẽc baag ammiira jora. Nẽ ꞌthaara ꞌcĩg haĩ Melkithẽdẽk ko, nĩngĩtĩ aĩ, “Bũnnai.” Nẽ haĩ Melkithẽdẽk ꞌthaar ũgĩ buúk, “Habu cĩ Ganõõnõ.” Nẽẽthĩ, aĩ ꞌthaara ꞌcĩg haĩ Thaalem ko, Ganõn.

³ Baa aitiõõ hõllõngaa agayyi maaꞌnyĩ Melkithẽdẽhĩ hode ngaannia hode maajiha cĩg baarkit hode ꞌtirriaanĩtĩ hĩ daahĩth cĩnnĩ. Ikia aala nẽẽ ĩĩ paadĩr ũdũt haau hĩ Ngeertĩ Nyekuci.

⁴ Ummuhit nõõ makaaꞌthĩt cĩ Melkithẽdẽhĩ, ẽꞌngẽraak aattĩ Abũrahamĩ ĩnõõnnõ ꞌgii umwa hẽlẽggẽẽnnĩĩ baag ammiira jora.

⁵ Nẽ ꞌyioko adiim nyattalĩ cĩ Mũũꞌtha paadĩrꞌnya ꞌcĩg hattũũg cĩ ꞌLeevi, huluttia ꞌbaaninit ꞌcĩ abadtẽc eetini vẽlẽk ĩcĩg Ĩꞌthĩraẽlĩ, ĩcĩg ĩĩn nẽẽg buúk lõhõlĩ cĩg lõhõlĩ cĩg Abũrahaamõ.

⁶ Baa aitiõõ hõllõngaa ĩĩn Melkithẽdẽhĩ eet cĩ hattũũg cĩ ꞌLeevi. Ma ho, ikia ẽꞌngẽraak Abũrahamĩ ĩnõõnnõ ꞌbaaninit ꞌcĩ abadtẽc, hẽlẽggẽẽnnĩĩ baag ammiira Abũrahamĩ jora. Nĩngĩtĩ aku aggatanĩ Melkithẽdẽhĩ Abũrahaamõ baa aꞌnyak thooꞌthiok ꞌcĩg aduhaak Nyekuci.

⁷ Nẽẽthĩ, hiꞌthihi eet ꞌcĩ akidan ngaatĩ aggatanĩ ẽẽtĩ cobbi eet ꞌcĩ hidici.

⁸ Paadĩrꞌnya ꞌcĩg alũta ꞌbaaninit ꞌcĩ abadtẽc ko, ĩĩn eet ꞌcĩg hatĩ adaahĩ, nẽẽthĩ, maka Melkithẽdẽhĩ ĩllõõan ĩhõõggõ, hĩnĩngĩtĩ adukiaakeet aĩ arũgĩ Melkithẽdẽhĩ ũdũt.

⁹ Occa horoong hõthõõth haĩ, eeta cĩg ꞌLeevi ꞌcĩg alũta ꞌbaaninit ꞌcĩ abadtẽc ko, adũmaneek Melkithẽdẽk ꞌbaaninit tĩho hĩ baa adũmaneek Abũrahamĩ baangẽẽtĩ cĩnĩĩng,

¹⁰ hĩnĩngĩtĩ baa nga hittirria ꞌLeevi baa õmmõtõõ Melkithẽdẽhĩ hĩ Abũrahaamõ.

Aduhõõ Yeesu hĩ Melkithẽdẽk

¹¹ Má baa ummuddia eeta ngaatĩ ũũnyĩ ꞌgaarriẽẽna cĩg paadĩrꞌthẽẽt cĩ hattũũg cĩ ꞌLeevi ꞌthẽccanẽẽt hĩ baa aduha nyattalĩ cĩ Mũũꞌtha, inni thĩ hidiim Nyekuci hĩꞌthõõa paadĩr umwa hattũũgaa cĩ Melkithẽdẽhĩ nẽ hõllõngaa ĩꞌthõõa hattũũgaa cĩ Arõõnẽ baa ĩĩn paadĩr ꞌcĩ oou ho?

¹² Nẽ ma ẽgẽẽranni ꞌgõõl ꞌcĩ eberriaanĩ paadĩrꞌnya, adiim ẽgẽẽranni nyattalĩ buúk.

¹³ Paadĩrĩ ꞌcĩ hõthõõth naag ko, ĩĩn eet cĩ hattũũg cĩrrĩĩng ꞌcĩ nga hidticattõõ eeta cĩgĩnnĩg altaarĩa hĩ paadĩrꞌnya.

¹⁴ Haga naag vẽlẽk aku Makayyioohiti cĩnaac hattũũgaa cĩ ꞌJuuda nẽ nga huduha Mũũꞌtha thõõth ꞌcĩ occa auuni paadĩrꞌnya hattũũgaa cĩ ꞌJuuda ũdũt.

¹⁵ Baa agaĩ gẽẽraniiniti ciee baa ikia edeeꞌnyia paadĩrĩ cĩrrĩĩng ꞌcĩ eberriaa ꞌcĩ aduhõõ hĩ Melkithẽdẽhĩ thõng.

¹⁶ Ikia ĩĩ Yeesu paadĩr, hõllõngaa hĩnĩngĩtĩ ĩĩn nẽẽ eet cĩ hattũũg cĩ ꞌLeevi, nẽẽthĩ, aku ĩĩn nẽẽ paadĩr ꞌtirriaanaa cĩ rũgẽt ꞌcĩ aalla ũdũt.

¹⁷ Uppulana ꞌBuuhi cĩ Nyekuci ĩĩ, “Iinu nii paadĩr ꞌcĩ aalla ũdũt hĩ Melkithẽdẽhĩ.”

¹⁸ Ikia ũtũngoothĩk ꞌgõõl ꞌcĩ ꞌrẽẽnĩ baa gõõng eberriaanĩ paadĩrꞌnya, hĩnĩngĩtĩ baa iittiõõ hõllõngaa attiranĩ nẽ hõllõngaa adticanni.

¹⁹ Hĩnĩngĩtĩ baa hõllõngaa akũmaneek nyattalĩ ꞌgii umwa hũbũna. Nẽẽthĩ ꞌyioko, okomit ngagĩĩt ꞌthĩnneeti, hĩnĩngĩtĩ muhẽẽnĩt ꞌcĩ abũnnaa ꞌcĩ hiita hõbõktõõĩ naag hĩ Nyekuc.

²⁰ Baa aku ꞌgõõl ꞌcĩ ĩĩn ngeju ꞌcĩ eberriaanĩ paadĩrꞌnya ho, lõbũtĩaa ꞌcĩ abũnnaa. Baa au ĩĩn lohollia cĩg lõhõlĩ cĩg Arõõnẽ paadĩrꞌnya haaga hiꞌthihi lõbũtĩ,

²¹ nẽẽthĩ, baa aaĩ lõbũtĩ cĩ Yeesu. Hĩnĩngĩtĩ baa anneek Nyekuci ĩnõõnnõ, “Baa abũtan Makayyioohiti nẽ hõllõngaa ẽꞌthẽcan lõbũtĩ cĩnnĩ ꞌcĩ aĩ, ‘Iinu nii paadĩr ꞌcĩ aalla ũdũt!’ ”

²² Nẽ hĩnĩngĩtĩ lõbũtĩ icci, ikia aaꞌnyeet Yeesu lõhõt ꞌcĩ abũnnaa hĩ Nyekuc.

²³ Baa mẽẽlĩg paadĩrꞌnya ꞌcĩg baag adticaniini nyattal baa ꞌrẽẽnĩ, hĩnĩngĩtĩ baa daahĩth ꞌcĩ alaam ĩhõõggõ ngaatĩ adticaniini ĩꞌthõng.

²⁴ Nẽẽthĩ, Yeesu ꞌcĩ arũgĩ ũdũt ko, aalla paadĩrꞌthẽẽt cĩnnĩ buúk ũdũt.

²⁵ Nẽẽthĩ hoti ho, ũũlũ Yeesu ngaatĩ ẽẽlanĩ eet ꞌcĩg ẽlẽmĩ Nyekuc hĩnĩngĩtĩ ĩnõõnnõ.

²⁶ Ĩĩn Yeesu paadĩr cobbi ꞌcĩ hadiim naag, hĩnĩngĩtĩ ẽllẽẽmĩth nẽẽnĩ, tẽlla nẽ hiꞌthihi ꞌthẽccan. Aitiõõ Yeesu ꞌthẽccanĩ tõõ nẽ aaꞌnyĩhoothĩk nĩngĩtĩ cobbi cĩ bulẽẽttõ hẽẽtahujjieen.

²⁷ Aitiõõ Yeesu hõllõngaa occa ĩbbõõr ꞌgarrieenit hõdõõkõthĩ hĩ gõõng ĩbbõõr paadĩrĩ umwaa cobbiẽẽnĩ. Ĩbbõõr paadĩrĩ cobbi ꞌgaarriẽẽn, hĩnĩngĩtĩ ꞌthẽccanẽẽt cĩgĩnnĩg ĩĩcĩ oou nẽ ikia ĩbbõõr, hĩnĩngĩtĩ ꞌthẽccanẽẽt cĩg eetuk uruta. Nẽẽthĩ ꞌyioko, ẽlẽmana Yeesu ẽlẽ cĩnnĩ tabattĩ hõdẽẽthõng hĩĩ ꞌgaarrieenit, hĩnĩngĩtĩ ꞌthẽccanẽẽt cĩg eetuk.

²⁸ Nẽẽthĩ, baa ẽbẽra nyattalĩ paadĩrꞌnya ꞌcĩg ĩĩn eet haaga ꞌcĩg hõllõngaa attiranĩ. Ma baa aaꞌnyĩhoothĩk eet nyattalĩ, ikia ẽbẽra Nyekuci Ngeerĩnĩ lõbũtĩĩa nẽ ikia ĩĩ Ngeerĩnĩ paadĩr cobbi ꞌcĩ ĩllõõan paadĩrꞌnya vẽlẽk ũdũt.