Ebereei 4 - ꞌBuuk cĩ Thõõth cĩ Nyekuci

Kõr cĩ ꞌYiomman cĩ eet cĩg Nyekuci

¹ Nga abũnnaa thõõth baa aduha Nyekuci aĩ ꞌcĩ hadukni nĩngĩtĩ ꞌyiommaanõ nẽ adiim harrĩcana naag, hátĩ hiittiõõ hõllõngaa abacĩ eet umwaa ngaatĩ adukni nĩngĩtĩ ꞌyiommaanõ ho hõrggẽẽnaa cunuung.

² Baa hĩthĩhĩt naag nyeemuut ꞌcĩ abũnnaa ho, hĩ baa athĩhĩ eeta cĩg Ĩꞌthĩraẽlĩ. Nẽ baa ũtũbũrĩt nẽẽg thõõth baa ĩthĩhĩt ẽlẽk. Ma ho, iittiõõ nyeemuut ciee hõllõngaa ẽẽl ĩhõõggõ, hĩnĩngĩtĩ hõllõngaa aꞌnyak nẽẽg lemiinit.

³ Ngagĩĩt ꞌcĩg hẽlẽmĩ Nyeemuut icci ĩĩn Ngeju ho, ꞌcĩg occa haduhun nĩngĩtĩ ꞌyiomman tĩho, hĩ baa aduha Nyekuci aĩ, “Hũbũtana lĩĩlĩẽẽtta hĩĩna, ‘Aitiõõ hatĩ nẽẽg hõllõngaa aduhun nĩngĩtĩ haayyi naa hiita hiyyiomanit.’ ” Baa aduha Nyekuci thõõth icci, tananga baa ẽdẽcaak nẽẽ ngaatĩ ẽhẽnytaanĩ looc.

⁴ Õthõõth Nyekuci kõr ꞌcĩ ĩĩn tũkĩramma ꞌBuuhaa cĩnnĩ aĩ, “Ikia iyyioman Nyekuci dtiicaa cĩnnĩ.”

⁵ Nẽ tarĩ uduha ĩĩ, “Aitiõõ hatĩ nẽẽg hõllõngaa aduhun nĩngĩtĩ haayyi naa hiita hiyyiomanit.”

⁶ Nga abbuuhi nĩngĩtĩ ꞌyiommaanõ ho, hátĩ huduhunit eeta ũgẽẽgĩ, aitiõõ eeta baag ĩthĩhĩt nyeemuut ꞌcĩ abũnnaa nẽ ũtũbũrĩt hõllõngaa aduhuni.

⁷ Nẽẽthĩ tarĩ, aarĩk Nyekuci kõr umwa ꞌcĩ hadukni nĩngĩtĩ ꞌyiomman cĩnnĩ nẽ ĩĩn kõrra niccia, “Kõr nicci.” Baa aduha Nyekuci thõõth icci ũtũũgaa cĩ Daavide uruta ꞌrĩng, hĩ baa adukiaa thooꞌthiohĩĩ ꞌcĩg oou aĩ, “Má athiknu molook cĩ Nyekuci kõr nicci, ma haburru.”

⁸ Má baa aaꞌnyĩk ꞌJooꞌthua baa ĩĩn lemmioohit ĩhõõggõ ꞌyiomman, occa hõllõngaa õthõõth Nyekuci kõr umwa cĩ ꞌyiommaanõ tarĩ.

⁹ Nẽẽthĩ, baa uduhaaheet Nyekuci ngagĩĩt ĩĩnnĩheet haaꞌnyuung hatĩ Kõr cĩ ꞌYiommaanõ, ꞌcĩ hatĩ hiyyiomanĩ naaga, tananga nga hikia kõrra tĩho.

¹⁰ Kõr tĩho, iyyioman hatĩ eeta cĩg Nyekuci dtiicanẽẽnnĩĩ cĩggĩĩng, hĩnĩngĩtĩ uduhunit nẽẽg nĩngĩtĩ ꞌyiomman cĩ Nyekuci, hĩ baa iyyioman Nyekuci dtiicaa cĩnnĩ.

¹¹ Nẽẽthĩ ꞌyioko, hidticatõ gẽrrẽẽt, hátĩ huduhunit nĩngĩtĩ ꞌyiomman tĩho, hiittiõõ ẽẽtĩ ꞌcĩ abacĩ tõõ. Nẽẽthĩ, má habũrĩ Nyekuc hĩ baa abũrĩ eeta cĩg Ĩꞌthĩraẽlĩ, hadhukiaa hatĩnĩ.

¹² Hĩnĩngĩtĩ arũgĩ thõõth cĩ Nyekuci nẽ attiranĩ. ꞌLẽhẽd hĩllõõan nyetuboot ꞌcĩ ꞌlẽhẽdĩ gẽrrẽẽt, ẽttẽẽd thõõth cĩ Nyekuci loriẽẽt hõdõlan lobulẽẽt hĩ õnyõ, ĩꞌthõng hũmmũda mũyan hĩ muhẽẽnĩt cĩ ꞌthinneeti cĩggaac.

¹³ Aitiõõ ꞌgii baa ẽhẽnyta Nyekuci hõllõngaa occa aguꞌthi hẽbẽrẽẽnnĩĩ cĩgĩnnĩg, acĩn nẽẽ ꞌgii vẽlẽk cũrũmũũm, hĩnĩngĩtĩ haduhaak hatĩ naag ĩnõõnnõ thõõth ꞌcĩ ĩĩn dĩdĩ ꞌcĩ baa hidticanit naaga.

Ĩĩn Yeesu paadĩr cobbi ꞌcĩ ĩllõõan vẽlẽk

¹⁴ Nẽẽthĩ, haꞌnyak naag paadĩr cobbi ꞌcĩ ũũk hẽẽtahujjieen, ĩnõõnnõ Yeesu Ngeertĩ Nyekuci. Ĩnõõ ꞌcĩ haĩ, huꞌthuutti thõõth ꞌcĩ haduha naag, hĩnĩngĩtĩ hẽlẽmĩ ĩnõõnnõ.

¹⁵ Aga paadĩrĩ cobbi pĩĩrnanĩt cĩnaac vẽlẽk, hĩnĩngĩtĩ baa ĩttĩmanĩ nẽẽ pĩĩrnatta ꞌgoolliohĩ vẽlẽk hĩ naaga, nẽẽthĩ aitiõõ ĩnõõnnõ ꞌthẽccanĩ tõõ!

¹⁶ Hõõt naag vẽlẽk dtaaba cĩ bulẽẽttõ cũrũmũũm, hátĩ hummuddia tamaati hĩ bũnnai ꞌcĩ eelleet nẽẽ ngagĩĩt, hatĩ hadiim eliinit.