Ebereei 3 - ꞌBuuk cĩ Thõõth cĩ Nyekuci

Maka Yeesu ĩllõõan Mũũꞌtha

¹ Niig ꞌgotoonoga hĩ ngoonoga cieegi, ẽbẽraauung Nyekuci ngagiit ĩĩtõ eet cĩgĩnnĩg ꞌcĩg ẽllẽẽmĩthĩ. Nẽẽthĩ, ummuhit Yeesu ꞌcĩ hanneek naag ꞌthooyyiahit cĩ Nyekuci nẽ ĩĩ paadĩr cobbi ꞌcĩ hẽlẽmĩ naag ko.

² Baa athĩhĩ Yeesu Nyekuc baa ẽbẽra ĩnõõnnõ, haau hĩ baa athĩhĩ Mũũꞌtha Nyekuc, ngaatĩ adticanõõthĩkĩ eet vẽlẽk cĩg Nyekuci.

³ Nẽẽthĩ, adiim Yeesu bulẽẽnĩt ꞌcĩ maka hĩllõõan Mũũꞌtha, haau hĩcĩ adiim ẽẽtĩ ꞌcĩ ẽhẽnyĩt ꞌcieeth dĩhĩthẽẽnĩt, hĩllõõan ngaatĩ hadĩkꞌthĩ ꞌcieeth ẽlẽ cĩnnĩ.

⁴ Hĩnĩngĩtĩ aꞌnyak ꞌcieethi vẽlẽk teheꞌnyioohit, nẽẽthĩ, eet ꞌcĩ ẽhẽnyta hẽlẽggĩ vẽlẽk Nyekuci.

⁵ Baa ẽlẽmĩ Mũũꞌtha ngaatĩ adticanõõthĩkĩ eet ꞌCieethaa cĩ Nyekuci nẽ uduha cũrũmũũm thooꞌthiok ꞌcĩg hatĩ au edeeꞌnyia horumwa.

⁶ Nẽẽthĩ, ĩĩn Krĩstõ Ngeertĩ Nyekuci ꞌcĩ aggam eet cĩg Nyekuci. Nẽ hĩĩgĩn naag eet tĩko, hatĩ haalla haꞌthĩlan nẽ huꞌthuutti muhẽẽnĩt ꞌcĩ abũnnaa.

ꞌYiomman cĩ eet cĩg Nyekuci

⁷ Nẽẽthĩ, hĩcĩ aduha Lorii ꞌcĩ Ẽllẽẽmĩth aĩ, “Má ithiktu molook cĩ Nyekuci kõr nicci,

⁸ ma haburru, hĩ baa abũrĩ eeta cĩg Ĩꞌthĩraẽlĩ, baag attĩman Nyekuc horrwatõõ ꞌcĩ õdõhõhĩĩ kak,

⁹ nga baa attĩmanna nganĩĩt nyakangaaꞌnya cugguung, tananga baa ĩcĩnĩt nẽẽg thooꞌthiok ꞌcĩg ĩnaat eeta, baag hadticani naa irkiꞌnyia hẽẽn ꞌwec.

¹⁰ Ĩnõõ ꞌcĩ baa halĩĩllĩkĩĩ naa eet tĩko irkiꞌnyia nicciag, nẽ hĩĩna nẽẽ, ‘Gõõng abũrra nẽẽg nganĩĩta. Nẽ ũtũbũrĩt thõõth ꞌcĩ haduhaahi naa ĩhõõggõ hidticanit.’

¹¹ Nẽ hũbũtana lĩĩlĩẽẽtta hĩĩna, ‘Aitiõõ hatĩ nẽẽg hõllõngaa aduhun nĩngĩtĩ hiyyiomanĩĩ naana.’ ”

¹² ꞌGotoonoga hĩ ngoonoga, ĩcĩnĩt jurrung ma hakidannu hode haꞌnyaku ꞌthinneeti ꞌcĩg abathĩ ꞌcĩg aaꞌnyuung ũtũngteek thõõth cĩ Nyekuc ꞌcĩ arũgĩ.

¹³ Eellio nyaagwaana hõdõõkõthĩ hĩcĩ ꞌyioko adukiaakeet kõr nicci ho, hátĩ hiittiõõ ẽẽtĩ ꞌcĩ hatĩ ĩggõõl ꞌthẽccanĩ nẽ õkõm ngaatĩ athĩknĩ thõõth cĩ Nyekuci tõõ.

¹⁴ Hĩnĩngĩtĩ má haꞌthũũnnĩ naag thõõth cĩ Nyekuci ĩꞌthõng hadaahit, haau hĩ baa hẽlẽmĩ ĩĩcĩ oou, hõthõl hatĩ hẽlẽggĩ vẽlẽk cĩg Krĩstõ hõdẽĩ.

¹⁵ Nẽ aĩ ꞌBuuhi cĩ Nyekuci nẽẽ, “Má ithiktu molook cĩ Nyekuci kõr nicci, ma haburru, hĩ baa abũrĩ eeta cĩg Ĩꞌthĩraẽlĩ.”

¹⁶ Hĩ nganĩ baa ꞌcĩg ĩthĩhĩt molook cĩ Nyekuci nẽ ũtũbũrĩt ko? Hõllõngaa nooyyia eet baag aꞌnyaha Mũũꞌtha looccaa cĩ Ijjibi baag abũrĩ molook cĩ Nyekuci ho?

¹⁷ Hĩ nganĩ nooyyia baag aaꞌnyĩk Nyekuc hĩlĩĩlĩ ĩꞌthõng irkiꞌnyia hẽẽn ꞌwec ko? Hõllõngaa nooyyia ĩhõõggõ eeta baag ẽꞌthẽcattõõ nẽ adaahito horrwatõõ ꞌcĩ õdõhõhĩĩ kak nẽẽgĩ?

¹⁸ Hĩ nganĩ baag abũtaneek Nyekuci irkiꞌnyia hẽẽn ꞌwec anneek, hõllõngaa hatĩ aduhun nẽẽg nĩngĩtĩ aayyi nẽẽ, hátĩ hõõt hiyyiomanit, hõllõngaa nooyyia ĩhõõggõ eeta baag abũrĩ thõõth cĩ Nyekuci?

¹⁹ Hĩcĩnĩt naag ngaatĩ hõllõngaa adukni nẽẽg nĩngĩtĩ ꞌyiommaanõ ho, hĩnĩngĩtĩ abũrĩ nẽẽg thõõth cĩ Nyekuci.