Ebereei 2 - ꞌBuuk cĩ Thõõth cĩ Nyekuci

Aaut dĩkĩĩm

¹ Huꞌthuutti naag thõõth baa illimanoothĩheet nẽ hĩthĩhĩt jurrung, hátĩ hiittiõõ hõllõngaa hĩꞌthanni tahatak nẽ hũtũngteek thõõth ꞌcĩ ĩĩn dĩdĩ.

² Hĩnĩngĩtĩ thõõth baa aduha aajĩlẽẽta, ĩĩn thõõth dĩdĩ nẽ má baa ẽꞌthẽcan ẽẽtĩ umwaanĩ, uuki eet tĩho thõng.

³ Nẽẽthĩ, má hũtũbũrĩt naag thõõth icci tiiri ꞌcĩ aꞌnyaha Makayyioohiti Yeesu ꞌcĩ occa heellianĩ ho, occa hatĩ halĩĩta naag ukẽẽnĩt nicci hutuno? Makayyioohit Yeesu ꞌcĩ baa aduha ĩĩcĩ oou thõõth ꞌcĩ heellianĩ naag ko, nẽ uduktaaheet eeta baag ĩthĩhĩt ĩnõõnnõ ĩĩttĩheet, ĩĩn thõõth ciee thõõth dĩdĩ.

⁴ Aduha Nyekuci nẽẽ dẽẽdẽ aĩ thõõth ꞌcĩ ĩĩn dĩdĩ cieeni, ꞌgõõlaa ꞌcĩ adticanĩ thooꞌthiok ꞌcĩg mẽẽlĩg ꞌcĩg ĩnaat eeta nẽ aaꞌnyĩk eet Lori ꞌcĩ Ẽllẽẽmĩth hĩ ꞌbaaninit hĩcĩ adiim nẽẽnĩ.

⁵ Baa hõllõngaa aajĩlẽẽt ꞌcĩg aaꞌnyĩk Nyekuci haggamit looc ꞌcĩ ĩĩn ngeju ꞌcĩ hõthõõth naag ꞌcĩ hatĩ aku horumwa ho.

⁶ Nẽẽthĩ, aaĩ nĩngĩmwaa ꞌcĩ eheeddi ꞌBuuhaa cĩ Nyekuci aĩ, “Inni nii Nyekuci ꞌmuuk eet gẽrrẽẽt nẽ ũꞌthũũtĩ ngeertĩ eet ꞌcĩ holli õõ buúk gẽrrẽẽt ko?

⁷ Hĩnĩngĩtĩ irritanaa nii ĩnõõnnõ hĩdĩhĩdĩĩc hĩllõõan aajĩlẽẽt nẽ itihimẽẽhĩ ĩnõõnnõ temedek cĩ bulẽẽttõ hĩ ꞌcĩ iꞌngoliini eeta ĩnõõnnõ.

⁸ Aaꞌnyĩhuu nii ĩnõõnnõ ꞌtirrian ꞌcĩ aggamĩ hẽlẽggĩ vẽlẽk.” Aggam nẽẽ hẽlẽggĩ vẽlẽk ꞌyioko, nẽ nga hũtũngeek Nyekuci ꞌgiimwa battaala. Nẽẽthĩ nẽẽꞌthẽk ꞌyioko, nga hĩcĩnĩt hẽlẽggĩ vẽlẽk ꞌcĩg aggam nẽẽ ho, ngaatĩ edeeꞌnyianĩ.

⁹ Hĩcĩnĩt naag Yeesu baa arritanniaa hĩdĩhĩdĩĩc hĩllõõan aajĩlẽẽt. Nẽẽthĩ ꞌyioko, itihimoothĩk ĩnõõnnõ tẽmẽdẽhĩ cĩ bulẽẽttõ hĩcĩ tẽẽlꞌthĩtõõ, hĩnĩngĩtĩ baa adaak nẽẽnĩ. Bũnnaiittaa cĩ Nyekuci dĩdĩ, ikia atar Yeesu daahĩth hĩnĩngĩtĩ eet vẽlẽk.

¹⁰ Baa Nyekuc ꞌcĩ ẽhẽnyta hẽlẽggĩ vẽlẽk ꞌtirriaanaa cĩnnĩ nẽ ikia ẽbẽan nẽẽ dioo ngaatĩ aaꞌnyĩkĩ Yeesu hũbũna ꞌcannaana, hátĩ hũũppan Yeesu ngaatĩ ẽẽlanĩ eet nẽ otholit bulẽẽnĩt cĩnnĩ.

¹¹ Yeesu hĩ eet ꞌcĩg aaꞌnyĩk nẽẽ helleemito ho, odoyyii Maaꞌnyia. Ĩnõõ ꞌcĩ hõllõngaa aꞌngaaõnnĩ Yeesu ngaatĩ avvĩyyĩ ĩhõõggõ annẽẽkĩ ꞌgõtõõnõgĩ hĩ ngõõnõgĩ.

¹² Baa anneek Yeesu Nyekuc nẽẽ, “Haduhaahi hatĩ naa lothippit cĩ lemmioohu ꞌthaar cugunnig nẽ hẽbẽna dĩhĩthẽẽnĩt cunni, hatĩ au alayyi nẽẽg nganiita.”

¹³ Nẽ uduha Yeesu ĩĩ, “Haarihi hatĩ naa ꞌthĩnĩt caannĩ hĩ ĩnõõnnõ.” Nẽ tarĩ, õthõõth Yeesu ĩĩ, “Nganĩĩt ciee hĩ lõhõlĩ baag aaꞌnya Nyekuci.”

¹⁴ Hĩĩgĩn naag vẽlẽk eet ꞌcĩg haꞌnyak eleeti. Ĩnõõ ꞌcĩ aku ĩĩnnĩ Yeesu eet hĩ naag ko. Baa adaahĩ nẽẽ, hátĩ huruk habu cĩ loriẽẽt ꞌcĩg abathĩ, baa aꞌnyak ꞌtirrian ꞌcĩ aruhi eet.

¹⁵ Nẽ ꞌgõõlaa cĩ, occa õõga eet baag aalla ĩĩn appahacaaꞌnya ũdũt, hĩnĩngĩtĩ iꞌngolli nẽẽg ngaatĩ adaaknĩ.

¹⁶ Nẽ dĩdĩ, baa hõllõngaa aku nẽẽ aĩ hẽẽla aajĩlẽẽt, baa aku ẽẽla lõhõlĩ cĩg Abũrahamĩ vẽlẽk.

¹⁷ Nẽẽthĩ hoti ho, baa ikia aau nẽẽ hĩ ꞌgotoonoggia hĩ ngõõnõgĩ ꞌgoolliohĩ vẽlẽk, hátĩ hikia hĩĩ nẽẽ tamaattiohit nẽ ũꞌthũũtĩ thõõth hĩ paadĩrĩ cobbi dtiicaa cĩ Nyekuci, hátĩ hĩbbõõr ꞌgaarrieenit ꞌcĩ ũũnnõthõõthĩkĩ ꞌthẽccanẽẽta cĩg eetuk.

¹⁸ Hĩnĩngĩtĩ baa accananni nẽẽ baa attĩmanni, occa ũũlũ nẽẽ ngaatĩ ẽẽlanneet ngagĩĩt buúk hatĩ hattĩmanni.