Ebereei 13 - ꞌBuuk cĩ Thõõth cĩ Nyekuci

Dtiic ꞌcĩ aaꞌnyĩk Nyekuc hatal

¹ Aallattia ĩmmĩnanit ꞌgoonoggu haauto hĩ ꞌgotoonogu hĩ ngoonogu.

² Ma hataarroꞌthu ngaatĩ avvaannu eet ꞌcĩg ĩĩn tahan hatĩ au õlõ, hĩnĩngĩtĩ eeta ũgẽẽgĩ ꞌcĩg baag avva tahan, ĩko hinnia avva aajĩlẽẽt nẽ hõllõngaa aga ngaatĩ ĩĩnnĩ aajĩlẽẽt buúk.

³ Ummukta ꞌgoonogu ꞌcĩg aattĩg baabuuthatõõ, haau hĩcĩ ababuuthaniinnu hĩ ĩhõõggõ hõdẽĩ. Ummuhuttooth ꞌgoonoggu ꞌcĩg ẽhẽc eeta hippiirria nẽ má uuki nẽẽgĩ, aꞌnyĩĩk haau hĩcĩ uukennu niig buúk.

⁴ Aꞌnyĩĩk maac hĩ ngaa hũrũmtĩ ũdũt. Aallattia ũrũmtĩ ũdũt, hĩnĩngĩtĩ uuk hatĩ Nyekuci eet ꞌcĩ adĩman thooꞌthiok ꞌcĩg ĩĩn ꞌriiring ꞌthũwaana.

⁵ Ma haangallu ꞌrabbẽẽtĩ, aaꞌnyĩk ꞌrabbẽẽt ꞌcĩg abadtẽc ꞌcĩg aꞌnyaku hũũppattuunga. Hĩnĩngĩtĩ baa aĩ Nyekuci ꞌBuuhaa cĩnnĩ, “Hõllõngaa hatĩ halahaneekuung nẽ hudhuheehuung tuu.”

⁶ Occa aaꞌnyuung thõõth ciee othoothit ĩĩtõ, “Ĩĩn Makayyioohiti ellioohit caannĩ! Inni occa hatĩ hitingõlĩ naa thõõth ꞌcĩ adĩmaneeka eeta haaga ho?”

⁷ Ummuhuttooth makayyiook cugguung baag allimaneekuung ngagiit thõõth cĩ Nyekuci. Ummuhuttooth thooꞌthiok ꞌcĩg abũnnaa baag adĩman nẽẽg rũgẽtaa cĩnĩĩng nẽ unuyyu terethiinit cĩ lemiinit cĩnĩĩng.

⁸ Aitiõõ Yeesu Krĩstõ hõllõngaa ẽgẽẽranni. Aaĩ nẽẽ baalõ hĩ kõr nicci nẽ aalla ooo.

⁹ Nẽẽthĩ, ma haaꞌnyiku ꞌlimman ꞌcĩ abathĩ higgooluung ngagiita. Mẽẽn ngaatĩ hammũdaanĩ ꞌtirrian tarbalꞌthẽẽtaa cĩ Nyekuci, hĩllõõan ꞌgeenniok ũgĩ ꞌcĩg hadahĩ. Nẽẽthĩ, aitiõõ ꞌgeennioha cieeg hõllõngaa ẽẽl eet ꞌcĩg adak ko.

¹⁰ Haꞌnyak naag altaarĩ ꞌcĩ hõllõngaa aduhẽẽnĩ paadĩrꞌnya ꞌcĩg adticanni ꞌCieethaa cĩ Nyekuci.

¹¹ Baa õkõõĩ paadĩrĩ cobbi biyyi cĩg heleggeennu hĩĩtõ ꞌgaarriẽẽn cĩg ꞌthẽccaneetu ꞌCieetõõ cĩ Nyekuci, Ngaatĩ Aꞌngirannii Ẽllẽẽmĩth Gẽrrẽẽt nẽ ĩwaaddi hẽlẽggĩ niccieeg ĩꞌthõng huturumit hĩĩ hatiꞌtheet, battaala ngaatĩ aitiõõ eeta tõõ.

¹² Baa accananni Yeesu nẽẽ buúk battaalaa cĩ ꞌtaaũn cobbi, hátĩ haanytĩk biyyieeta cĩgĩnnĩg eet helleemito.

¹³ Ĩnõõ ꞌcĩ adiim hõõĩ naag buúk battaalaa cĩ ꞌtaaũnõõ hõõt hummuddioothĩk Yeesu, hátĩ hotholit pĩĩrnanĩt cĩnnĩ.

¹⁴ Hĩnĩngĩtĩ aitiõõ lõõcĩ ciee hõllõngaa ĩĩn õlõ cĩnaac ꞌcĩ aalla ũdũt, nga hẽrẽ naag õlõ ꞌcĩ nga aayyiaa.

¹⁵ Nẽẽthĩ hoti ho, haanytĩk Nyekuc ꞌgaarrieenit ꞌcĩ hadĩkꞌthĩ ĩnõõnnõ nẽ huduktaak hĩĩttĩk hathĩhĩ naag ĩnõõnnõ.

¹⁶ Nẽ ma hatarroꞌthu ngaatĩ eellu ꞌgoonogu nẽ othollu ijjio cugguung hĩ ĩhõõggõ. Aduhõõ thõõth ciee hĩ ngaatĩ aaꞌnyiku Nyekuc ꞌgarrieenit ꞌcĩ atalĩ nẽẽ thõng.

¹⁷ Niig lemmioha, ĩthĩhĩt makayyiook cugguung nẽ ĩdĩmattu thooꞌthiok ꞌcĩg aduhaakuung nẽẽgĩ. Ebekuung nẽẽg ngagiit nẽ Nyekuc ꞌcĩ hatĩ ẽttẽẽd thooꞌthiok cĩggĩĩng. Nẽẽthĩ, ma haaꞌnyiku ĩhõõggõ hõngõõngõõcõ dtiicaa cĩnĩĩng. Aanytĩk ĩhõõggõ haccamattoothĩk, hĩnĩngĩtĩ aitiõõ hinnia hatĩ hõllõngaa eelluung ngagiit ũdũt.

¹⁸ Alayyiooyyieetu ngagĩĩta. Tẽllĩg ꞌthinneeti cĩggaang nẽ hattĩmanna hõdõõkõthĩ ngaatĩ hadĩmanna thooꞌthiok ꞌcĩg aũlanĩ.

¹⁹ Hadiimi naa laiinit cunuung hĩ Nyekuc, hátĩ hẽhẽẽrõnaahuung ngagiit tarĩ hĩdĩĩkoothong.

²⁰ Aꞌnyĩĩk Nyekuc cĩ ganõõnõ baa arũgtha Makayyioohit cĩnaac Yeesu, ꞌcĩ ĩĩn tũhayyioohit cobbi cĩ aꞌthaannu, hikia hadak lõhõt ꞌcĩ aalla ũdũt hĩ eet cĩgĩnnĩg.

²¹ Halayyi naa haini, aꞌnyĩĩk Nyekuc haaꞌnyuung ĩthĩhĩt ĩnõõnnõ nẽ hatĩ gõõng ĩdĩmattu thooꞌthiok ꞌcĩg aũlanĩ. Aꞌnyĩĩk Yeesu heeluung ĩdĩmanit thõõth ꞌcĩ aaꞌnyĩk Nyekuc haccamanoothĩk. Aꞌnyĩĩk bulẽẽnĩt haau hĩ Yeesu Krĩstõ ooo! Aamẽn.

²² ꞌGotoonoga hĩ ngoonoga, hẽhẽẽdakuung naa ngagiit waraga ꞌcĩ huturi haaga, hátĩ hũkũtanuung ngagiita nẽ halayyuung ngagiit ĩthĩhĩt thõõth ꞌcĩ haduha naa ho jurrung.

²³ Hadiimmuung naa ngagiit ꞌyioko agaac ĩĩtõ, ooggia ꞌgõtõõnẽẽtĩ cĩnaac Timotteeo baabuutha. Má ikia nẽẽ ngaati hĩdĩĩkoothong, hõthõkta hatĩ ĩnõõnnõ hikia hicinuung ngagiita.

²⁴ Hõlõ, ĩꞌthaayyihaangu makayyiook cugguung hĩ eet cĩg Nyekuci vẽlẽk. Ĩꞌthaayyuung lemmiooha cĩg Nyekuci ꞌcĩg aattĩg Itali buúk ngagiita.

²⁵ Hala naa Nyekuc hĩĩ tarbal nẽ aggatanuung ngagiit vẽlẽk.