Ebereei 12 - ꞌBuuk cĩ Thõõth cĩ Nyekuci

Terethiinit cĩ authet cĩ Yeesu

¹ Nẽẽthĩ hoti ho, irriamaneekeet ngagĩĩt lothippiti cobbi cĩ eet ꞌcĩg ĩĩn hẽbẽrĩ cĩg rũgẽt cĩ lemiitto. Hadiim hũũnnĩk naag hẽlẽggĩ vẽlẽk hĩ ꞌthẽccanẽẽt ꞌcĩg alaammeet ꞌgõõlaa ꞌcĩ hõdõlanĩ rũgẽt ꞌcĩ aalla ooo. Hetemeethit thooꞌthiok ꞌcĩg abathĩ ꞌcĩg alaammeet ngagĩĩt ngaatĩ hanũĩ ꞌlimman cĩ Yeesu.

² Hakatti naag Yeesu hẽbẽrĩ, ĩnõõnnõ ꞌcĩ uwwatteekeet ngagĩĩt nẽ aaꞌnyĩk lemiinit cĩnaac hũttũbanoothĩk. Hĩnĩngĩtĩ taliinit ꞌcĩ ẽrẽ ĩnõõnnõ, ikia ẽtẽmẽẽth nẽẽ ngaaoni cĩ hurucceeo. Nẽ ꞌyioko, iccioloongan nẽẽ ĩĩcĩ aꞌthiit cobbi cĩ Nyekuci dtaabawaa cĩ bulẽẽttõ.

³ Ummuhuttooth thõõth baa ẽmmẽẽꞌthĩ Yeesu doominit ꞌcĩ õdõõmĩ eeta ꞌcĩg ĩĩn ꞌthẽccanniook ĩnõõnnõ. Nẽẽthĩ, aitiõõ hõllõngaa hatĩ appĩĩrnannu nẽ ũtũngteehu lemiinit cunuung.

⁴ Nẽẽthĩ, ꞌgõõlaa ꞌcĩ oꞌngonyoonnu niig kĩ ꞌthẽccanẽẽta, nga adaahit niiga.

⁵ Ataarrioꞌthu occa niig thooꞌthiok baag akũtannuung Nyekuci hĩ lohollia cĩgĩnnẽẽgĩ? Baa aduha nẽẽ aĩ, “Má hamaaccu tilooinit cĩ Makayyiookto, nẽ ma huunniku lemiinit hatĩ etereꞌthuung nẽẽnĩ.

⁶ Hĩnĩngĩtĩ iloot Makayyioohiti eet ꞌcĩg ammĩnan nẽẽnĩ, nẽ uuk eet vẽlẽk ꞌcĩg ẽlẽmĩ nẽẽ hĩ lohollia cĩgĩnnẽẽgĩ.”

⁷ Etemeethit ꞌcannan haau hĩ tilooiniti, iloottuung Nyekuci ngagiit hĩ lohollia cĩgĩnnẽẽgĩ. Nganĩ occa gõõng ꞌcĩ nga hitilo maaꞌnyia?

⁸ Iloot Nyekuci lõhõlĩ cĩgĩnnĩg vẽlẽk nẽ má aitiõõ hõllõngaa iloottuung nẽẽnĩ, ĩko thĩ hõllõngaa iiginnu lõhõlĩ cĩgĩnnĩg dĩdĩ.

⁹ Nẽẽthĩ, hiꞌngolli naag nyakangaaꞌnya cĩggaac hatĩ ilootteeta. Nẽẽthĩ ꞌyioko ĩcca occa aitiõõ hõllõngaa hiꞌngolli naag Baangeet ꞌcĩ loriẽẽt cĩggaac ꞌcĩ arũgĩ ooo hẽẽtahujjieen hatĩ ilootteeta?

¹⁰ Hĩnĩngĩtĩ ilootteet ngagĩĩt nyakangaaꞌnya loota nĩnga irkiꞌnyia ꞌcĩg abadtẽc haaga, ꞌgõõlaa ꞌcĩ aga nẽẽg aĩ mẽẽn. Nẽẽthĩ, abũnnaa hĩ ngagĩĩt hõdõõkõthĩ hatĩ ilootteet Nyekuci, hátĩ hotholit ꞌlẽẽmĩth cĩnnĩ.

¹¹ Ahuci hõdõõkõthĩ hatĩ nga ilootteet eeta thõng. Má hillimanit ngaatĩ hathĩknĩ thõõth hatĩ nga ilootteet eeta, hadĩman hatĩ thõõth ꞌcĩ aũlanĩ nẽ haauto lõꞌngõõc.

¹² Nẽẽthĩ ꞌyioko, ma habarrittu, aanytĩk ĩbaati hĩ huthungti cugguung hittiranit.

¹³ “Ũkũmatteek ꞌgõõl hũbũna,” hátĩ hiittiõõ eeta ꞌcĩg hõllõngaa attiran hĩ ꞌcĩg ahuuli lemiittaa cĩnĩĩng, hõllõngaa ẽttẽẽd looc.

Tilooinit hatĩ habũrĩ Nyekuc

¹⁴ Ĩttĩmanit gẽrrẽẽt ngaatĩ aattiyyu lõꞌngõõc hĩ eet vẽlẽk! Aaut rũgẽtaa ꞌcĩ tẽllĩ. Ma hõllõngaa adĩmannu noho, aitiõõ hatĩ hõllõngaa acinnu Makayyioohit.

¹⁵ Uꞌthuutti eleeti cugguung, hátĩ hiittiõõ ẽẽtĩ ꞌcĩ abacĩ bũnnai ꞌcĩ ẽllẽẽmĩth cĩ Nyekuci tõõ. Ma haaꞌnyiku eet umwa hĩlĩĩlĩ nẽ ĩkõõthahuung thooꞌthiok ꞌcĩg abathĩ.

¹⁶ Ma hẽlẽmaaku eet umwa ꞌcĩ adĩman thooꞌthiok ꞌcĩg ĩĩn ꞌriiring nẽ ũtũbũr Nyekuc hĩ baa Eꞌthaau, baa ũũtẽnĩ ꞌgattan cĩnnĩ cĩ ꞌtirriaattõ, hĩnĩngĩtĩ ahat ꞌcĩ baa aduk tabattĩ hõdẽẽthõng.

¹⁷ Agayyu niig urutaa cĩnnĩ ikia idiim Eꞌthaau haggatan maaꞌnyia ĩnõõnnõ, aku hinnia abũrĩ maaꞌnyia thõng. Nẽẽthĩ, baa aꞌnyaman Eꞌthaau ngaatĩ amammaayanĩ maaꞌnyĩ hõbõdaaĩ ꞌthĩnĩt haggatan ĩnõõnnõ, tananga baa arruui nẽẽ gẽrrẽẽt.

¹⁸ Nga iita niig ngaatĩ aaĩ hĩ muur ꞌcĩ ꞌThĩnaĩ, ꞌcĩ occa hacĩn nẽ huhumita. Aitiõõ ꞌgwaa ꞌcĩ alanyĩt hode diith ꞌcĩ ĩĩn muguur hode ngõõtĩ ꞌcĩ attiran,

¹⁹ hode tũũrĩ ꞌcĩ adtaki tõõ. Baa athĩhĩ eeta cĩg Ĩꞌthĩraẽlĩ molook ꞌcĩ õthõõthĩ. Nẽẽthĩ, baa alaacõ nẽẽg molook tĩho hĩjjaahõ,

²⁰ hĩnĩngĩtĩ baa iꞌngolli nẽẽg ngaatĩ athĩknĩ thõõth ꞌcĩ aduha mõlõõhĩ ho. Nẽ tarĩ, baa adukiaak ĩhõõggõ aĩ, “Uruhit iding umwa ꞌcĩ ahum muur.”

²¹ Baa abarrit Mũũꞌtha gẽrrẽẽt nẽ ĩĩ, “Habarriti naa tẽẽlꞌthĩtaa cobbi.”

²² Nẽ ꞌyioko, iitiaau niig muuraa cĩ ꞌThionĩ hĩ õlõõ cĩ Nyekuci ꞌJeruꞌthalẽma. ꞌTaaũn cobbi cĩ Nyekuc ꞌcĩ arũgĩ cieeni, nĩngĩtĩ au adahĩ aajĩlẽẽta ꞌcĩg ĩĩn aalibꞌnya hĩ aalibꞌnya karrama.

²³ Nẽ ꞌyioko, iitiaau niig lothippiti cĩ lemmiook ꞌcĩg ammĩnan Nyekuci gẽrrẽẽt, ꞌcĩg ĩĩgĩnnu lõhõlĩ ꞌcĩg oou ꞌcĩg eteheeddi ꞌthaara cugguung hẽẽtahujjieen. Iitiaau niig hĩ Nyekuc ꞌcĩ ẽttẽẽd thooꞌthiok vẽlẽk cĩg eetuk. Nẽ tarĩ, iitiaau hĩ loriẽẽt cĩg eet ꞌcĩg abũnnaa hẽẽtahujjieen, ꞌcĩg ꞌyioko aanytĩhoothĩk hũbũttaathõ.

²⁴ Nẽ iitiaau niig hĩ Yeesu ꞌcĩ ĩĩn jayyio ꞌcĩ õthõõthĩ lõhõt ꞌcĩ ĩĩn ngeju hõrggẽẽnaa cĩ Nyekuci hĩ eeta, hĩ biyyi ꞌcĩg urwacanni ꞌcĩg aꞌnyaha tũngẽẽnĩt cĩ ꞌthẽccaneetu, hõllõngaa aꞌnyaha oolo haauto hĩ biyyieeta baag Abeele.

²⁵ Ĩcĩnĩt jurrung nẽ ma haburru ngaatĩ athiknu Nyekuc ꞌcĩ õthõõth ko. Baa hõllõngaa avvir eeta cĩg Ĩꞌthĩraẽlĩ, baag abũrĩ ngaatĩ athĩknĩ eet baa othoothĩk ĩhõõggõ muuraa cĩ ꞌThĩnaĩ. Ammuku niig ainnu occa avvirru, hatĩ aburru ngaatĩ athiknu eet ꞌcĩ õthõõtha hẽẽtahujjieen?

²⁶ Ma baa õthõõth Nyekuci ĩĩcĩ oou, baa õmmõõnnĩ mõlõõhĩ cĩnnĩ looc diooni. Nẽ ꞌyioko aduha nẽẽ aĩ, “Hõmmõõnnĩ hatĩ looc hĩ hẽẽtkujjieen vẽlẽk.”

²⁷ Aĩ thõõth ciee nẽẽ, õmmõõnnĩ hatĩ Nyekuci hẽlẽggĩ vẽlẽk baag ẽhẽnytaa hiꞌngittõõthĩ, hátĩ hidionganit hẽlẽggĩ ꞌcĩg hõllõngaa õmmõõtĩ diooni.

²⁸ Hĩcĩ hummuddia naag habuccieet ꞌcĩ hõllõngaa õmmõõtĩ ho, hatalit nẽ hĩdĩhĩthĩt Nyekuc ngaatĩ halaĩ ĩnõõnnõ tẽẽlꞌthĩtaa ꞌcĩ ẽllẽẽmĩthĩ hĩ bulẽẽtta.

²⁹ Hĩnĩngĩtĩ, “Ĩĩn Nyekuci ꞌgwoo ꞌcĩ adũhan looc hĩĩ ꞌthĩĩ.”