Ebereei 11 - ꞌBuuk cĩ Thõõth cĩ Nyekuci

Eet baag aꞌnyak lemiinit ꞌcĩ maka

¹ Aaꞌnyeet lemiiniti hagaac muhẽẽnĩt ꞌcĩ abũnnaa ꞌcĩ haꞌnyak naaga nẽ etereꞌtheet ꞌgii ꞌcĩ hõllõngaa hacĩnĩ.

² Baa aaꞌnyĩk lemiiniti hĩbaangĩ cĩggaac haccamana Nyekuci.

³ Hĩnĩngĩtĩ lemiinit, haga naag haĩ, baa ẽhẽnytaa lõõcĩ thõõthaa ꞌcĩ aduha Nyekuci. Nẽ tarĩ haga naag haĩ, baa ẽhẽnytaa ꞌgii ꞌcĩ hacĩn naag ꞌyioko ho, ꞌgiiaa ꞌcĩ hõllõngaa edeeꞌnyia.

⁴ Baa lemiinit cĩ Abeele ꞌcĩ aaꞌnyĩk Nyekuc hẽlẽm ꞌgaarrieenit cĩnnĩ, hĩllõõan cĩ Kaiino. Baa aaꞌnyĩk ꞌbaaniniti Abeele hĩĩ eet ꞌcĩ abũnnaa nẽ ẽlẽm Nyekuci ꞌbaaninit cĩnnĩ. Tananga adaak Abeele hũnũũk, nga hõthõõthõõ naag hĩ ĩnõõnnõ terethiittaa cĩ lemiinit cĩnnĩ.

⁵ Baa lemiinit ꞌcĩ aaꞌnyĩk Ẽẽnõk hũũk hẽẽtahujjieen rũgẽtẽẽt ko, “Baa aꞌnginoothi nẽẽ, hĩnĩngĩtĩ Nyekuc ꞌcĩ baa õkõõĩ ĩnõõnnõ ho.” Baa nga hũũk Ẽẽnõhĩ hẽẽtahujjieen, baa agayyi nẽẽ ngaatĩ ĩĩnnĩ eet ꞌcĩ aaꞌnyĩk Nyekuc haccamanoothĩk.

⁶ Má hiꞌthihi lemiinit, aitiõõ ẽẽtĩ ꞌcĩ occa aaꞌnyĩk Nyekuc haccamanoothĩk tõõ. Hadiim hẽlẽmĩ naag haĩ, aaĩ Nyekuci dĩdĩ nẽ hẽlẽmĩ ngaatĩ adũmanĩ Nyekuci eet vẽlẽk ꞌcĩg adiim ĩnõõnnõ.

⁷ Nẽ tarĩ, baa lemiinit ꞌcĩ aaꞌnyĩk Nõõa hẽtẽhẽnya haahũl cobbi, hẽẽla halang cĩnnĩ hiittiõõ hõllõngaa arũddĩ tawaanatõõ. Baa athĩhĩ nẽẽ Nyekuc baa eggerꞌnyeek ĩnõõnnõ thooꞌthiohĩĩ ꞌcĩg nga hẽdẽẽnyta ũdũt. Lemiittaa cĩnnĩ, ikia ũtũbũr nẽẽ eet cĩg lootu vẽlẽk nẽ ikia ĩĩ eet ꞌcĩ abũnnaa, hĩnĩngĩtĩ lemiinit.

⁸ Lemiinit ꞌcĩ baa aaꞌnyĩk Abũrahaamõ hĩthĩk Nyekuc, baa aduhaak Nyekuci ĩnõõnnõ hũtũngeek õlõ cĩnnĩ nẽ ũũk looccaa umwaanĩ ĩĩcĩ hatĩ aaꞌnyĩk Nyekuci ĩnõõnnõ hũũk hirigith. Baa ajanĩ nẽẽ weet haaga nẽ hõllõngaa aga ꞌgõõl ꞌcĩ õkõõĩ ho.

⁹ Hĩnĩngĩtĩ baa aꞌnyak Abũrahaamõ lemiinit, aau nẽẽ hĩ tahanit looccaa baa aduhaak Nyekuci ĩnõõnnõ. Baa õlõman nẽẽ tuggẽẽtĩ hĩ baa õlõman Iꞌthaako hĩ Yakobo buúk, baag ippotaneek Nyekuci looc nicci dioo noho.

¹⁰ Baa adĩman Abũrahamĩ hoti, hĩnĩngĩtĩ baa ẽrẽ nẽẽ ꞌtaaũn cobbi ꞌcĩ aalla ooo, baa ammuha Nyekuci nẽ ẽtẽhẽnya.

¹¹ Baa lemiinit ꞌcĩ aaꞌnyĩk Thaara haꞌnyak loholeec, tananga baa hõllõngaa aꞌnyaki nẽẽnĩ nẽ baa atahaany gẽrrẽẽt. Baa ẽlẽmĩ nẽẽ thõõth baa aduhaak Nyekuci ĩnõõnnõ.

¹² Baa õbõhĩ adaak maac cĩnnĩ Abũrahaamõ, nẽẽthĩ, baa ikia ĩĩ nẽẽ maaꞌnyĩ eet ꞌcĩg mẽẽlĩg ꞌrĩng. Nẽẽthĩ hoti ho, iita ittirria lohollia ꞌcĩg mẽẽlĩg gẽrrẽẽt ꞌcĩg aduhõõ hĩ mũnyũny cĩg hẽẽtkujjieen hode ꞌcĩg aduhõõ hĩ hathaac cĩ dẽmẽt cĩ bũlũcõ.

¹³ Baa adaahito eeta cieeg vẽlẽk nẽ nga ẽlẽmĩ thõõth baa aduhaak Nyekuci ĩhõõggõ. Baa nga hummuddia nẽẽg thõõth baa aduhaak Nyekuci ĩhõõggõ, nẽẽthĩ, baa accamanoothĩk nẽẽg ngaatĩ acĩnõõꞌthĩ thooꞌthiok tĩko ꞌrẽẽna nẽ elemita. Baa ẽlẽmĩ nẽẽg ngaatĩ ĩĩnnĩ tahan nẽ ĩĩtõ tũhayyiook loota nĩnga.

¹⁴ Nẽ dĩdĩ, eeta ꞌcĩg õthõõth hoti, adiim nẽẽg ꞌgõõl ꞌcĩ ammũdaanĩ looc cĩnĩĩng dẽẽdẽ.

¹⁵ Má baa hummukta nẽẽg looc baa aauuni, occa baa oboddioothĩ looccaa tĩho.

¹⁶ Nẽẽthĩ, baa adiim nẽẽg looc ꞌcĩ abũnnaa ꞌcĩ aaĩ hĩĩ hẽẽtkujjieen. Ĩnõõ ꞌcĩ hõllõngaa aꞌngaaõnĩ Nyekuci hatĩ avvĩ nẽẽg ĩnõõnnõ annẽẽkĩ Nyekuc cĩnĩĩng, hĩnĩngĩtĩ baa etehenyeek Nyekuci ĩhõõggõ ꞌtaaũn cobbi.

¹⁷ Baa lemiinit ꞌcĩ aaꞌnyĩk Abũrahaamõ hittiha Iꞌthaako hĩĩ ꞌgaarrieenit, baa attĩman Nyekuci ĩnõõnnõ. Abũrahaamõ baa ũmmũda thõõth baa aduha Nyekuci ho, ikia ẽlẽm ngaatĩ ĩbbõõrĩkĩ ngeerĩnĩ ꞌcĩ odoyyii Iꞌthaako Nyekuc hĩĩ ꞌgaarrieenit,

¹⁸ tananga baa aduhaak Nyekuci ĩnõõnnõ anneek, “Iꞌthaako ngeeruni, ꞌcĩ hatĩ arrittiaanĩ lohollia cĩg lõhõlĩ cugunnig.”

¹⁹ Baa ammuk Abũrahamĩ aĩ, má adaak Iꞌthaako, arũgtha hatĩ Nyekuci ĩnõõnnõ tarĩ. Nẽ dĩdĩ, õbõdaahĩ Nyekuci Abũrahaamõ ngeerĩnĩ haau hĩcĩ arũgthaa daahĩtha.

²⁰ Baa lemiinit ꞌcĩ aaꞌnyĩk Iꞌthaako huduha thõõth ꞌcĩ hatĩ aggataniini Yakobo hĩ Eꞌthaau horumwa ho.

²¹ Ma baa õbõhĩ Yakobo adaaha, ikia iitirõõĩ hĩbahĩt cĩnnĩ cĩ tohomiitto nẽ ala Nyekuc. Nẽ hĩnĩngĩtĩ lemiinit cĩnnĩ, ikia aggatan nẽẽ lõhõlĩ cĩg Yothebo hõdẽĩ hõdẽĩ.

²² Nẽ õõaa ꞌcĩ nga hadaahĩ Yothebo, baa ẽlẽmĩ nẽẽ Nyekuc aĩ, aluugi hatĩ Nyekuci eet cĩg Ĩꞌthĩraẽlĩ Ijjiba. Nĩngĩtĩ aduhaakĩ ĩhõõggõ hothohotit ẽmmẽ cĩgĩnnĩg hatĩ uluugito.

²³ Hĩnĩngĩtĩ lemiinit ꞌcĩ maaꞌnyĩ hĩ aattĩ Mũũꞌtha, iita utugunyit nẽẽg Mũũꞌtha ĩꞌthõng hĩĩtõ nyĩlõhĩ iyyio. Baa acĩn nẽẽg ngaatĩ ẽllẽẽmmĩ loholeec cĩnĩĩng ko gẽrrẽẽt, nẽ iittiõõ hõllõngaa iꞌngolli ngaatĩ abũrrĩ thõõth baa habuuo.

²⁴ Ma baa ĩtĩlĩtha Mũũꞌtha ĩĩ maka, ikia aaꞌnyĩk lemiiniti cĩnnĩ ĩnõõnnõ hũtũbũr ngaatĩ ĩĩnĩ ngeertĩ tĩnaatĩ habu cĩ Ijjibi.

²⁵ Baa ẽlẽmĩ nẽẽ ngaatĩ appĩĩrnanĩ hĩ eet cĩg Nyekuci hõdẽĩ, hĩllõõan ngaatĩ accamanõõthĩkĩ ꞌthẽccaana hĩdĩhĩdĩĩc.

²⁶ Baa ammuk Mũũꞌtha aĩ, mẽẽn ngaatĩ appĩĩrnanĩ nẽẽ hĩnĩngĩtĩ Krĩstõ, hĩllõõan ngaatĩ ammũdaanĩ baliinit cĩ Ijjibi, hĩnĩngĩtĩ ẽrẽ nẽẽ dũman cĩnnĩ cobbi ꞌcĩ hatĩ aku horumwa.

²⁷ Hĩnĩngĩtĩ lemiinit cĩnnĩ, ikia ũtũngeek Mũũꞌtha Ijjib. Baa adtuuha Mũũꞌtha Nyekuc ꞌcĩ hõllõngaa edeeꞌnyia nẽ hõllõngaa iꞌngolli liilii cĩ habuuo.

²⁸ Baa aaꞌnyĩk lemiiniti Mũũꞌtha hadak Karrama cĩ Kõr ꞌcĩ Haangittõõ. Baa urwacaneek nẽẽ biyyi cĩg heleggeennu hẽẽnĩĩ cĩg hattũũgetu, hátĩ hiittiõõ hõllõngaa aruk Nyekuci lõhõlĩ ꞌcĩg maacĩg ꞌcĩg oou cĩg Ĩꞌthĩraẽlĩ.

²⁹ Hĩnĩngĩtĩ lemiinit cĩnĩĩng, iita abaaktĩ eeta cĩg Ĩꞌthĩraẽlĩ Bũlũc ꞌcĩ Marihi ꞌgõõlaa ꞌcĩ õdõhõhĩĩ. Ma baa aĩ habaaktawa eeta cĩg Ijjibi ho, adũddĩ hinnia thõng.

³⁰ Hĩnĩngĩtĩ lemiinit, baa awanĩt eeta cĩg Ĩꞌthĩraẽlĩ ꞌtaaũn cobbi cĩ ꞌJeriko waathinniook tũkĩramma, nĩngĩtĩ aku arribaniini araanĩ cĩ ꞌtaaũnõõ hĩĩ lõõcĩ ꞌthĩĩ.

³¹ Baa ĩĩn Rahabĩ ꞌwaaꞌngiahit umwa, nẽẽthĩ, baa aꞌnyak nẽẽ lemiinit nẽ ikia utuguny hoppoccwa baag au Ĩꞌthĩraẽla. Ma ho, iittiõõ hõllõngaa aruhi nẽẽ hĩ eet baag abũrĩ Nyekuci.

³² Occa ꞌyioko haini naa ne? Aitiõõ ꞌthaa ꞌcĩ occa hẽdtẽbanaanĩ thõõth cĩ ꞌJideõõnẽ hĩ Barak hĩ Thamthõõnẽ hĩ ꞌJevatha hĩ Daavide hĩ Thamueele hĩ põrõvẽtaaꞌnya tõõ.

³³ Ẽẽl lemiiniti cĩnĩĩng ĩhõõggõ haggamit habuccieeꞌnya nẽ hĩnĩngĩtĩ adĩman thõõth ꞌcĩ aũlanĩ, umuddia thõõth baa aduha Nyekuci nẽ ecebit utugeeti cĩg ꞌmaaĩtu,

³⁴ nẽ iliittia lanyit cĩ ꞌgwoyyio nẽ iliittia nyetubooꞌnya cĩg mĩrõk cĩggĩĩng. Tananga baa appĩĩrna nẽẽgĩ, baa aaꞌnyĩhoothĩk ĩhõõggõ makaaꞌthĩt hĩ ꞌtirrian ꞌcĩ iiggiaĩ mĩrõk cĩggĩĩng hukulit.

³⁵ Ma ho, iita ũrũkta maaccwaana cĩg ngaainu daahĩtha. Nẽẽthĩ, baa accananni eeta cieeg ũgẽẽgĩ gẽrrẽẽt nẽ ũtũbũrĩt ngaatĩ ooggianĩ baabuuthatõõ. Baa aga nẽẽg jurrung ngaatĩ hatĩ ammũdaanĩ dũman ꞌcĩ mẽẽn, hatĩ ũrũgta eeta vẽlẽk daahĩtha.

³⁶ Baa arannĩ eeta ũgĩ nẽ ommogit ũgĩ thõng nẽ ecebit ũgĩ nyerikooꞌnyanĩ baabuuthatõõ.

³⁷ Nẽ baa aalla ohoddiaa ũgẽẽgĩ biyyiẽẽnĩ hadaahito, hode appaki ũgẽẽgĩ hĩĩtõ ꞌramma hode aruhi nyetubooꞌnyanĩ. Baa hiꞌthihi ũgĩ ceremwa nẽẽthĩ, baa ahimit nẽẽg ceremwa cĩg aꞌthaannu hĩ cĩg ẽẽthak. Baa ĩĩn nẽẽg hullaha nẽ accanattĩ, nẽ uukti thõng buúk.

³⁸ Baa abũrĩ lõõcĩ eet iccig abũnnaa ho, eet baag urwatan horrwaa ꞌcĩ õdõhõhĩĩ kak hĩ muurriõhĩ nẽ baa aauto ilomẽẽtĩ nẽ utuguꞌthi ꞌlõõhĩtĩtõõ.

³⁹ Nẽ baa aaꞌnyĩk nẽẽg vẽlẽk Nyekuc hatal, hĩnĩngĩtĩ lemiinit cĩnĩĩng! Baa adaahito nẽẽg nga hummuddia thõõth baa aduha Nyekuci.

⁴⁰ Baa aaĩ thõõth ciee hoti, hĩnĩngĩtĩ baa iyyiangtheekeet Nyekuci ngagĩĩt ꞌgii ꞌcĩ mẽẽn. Nẽ baa hõllõngaa adiim Nyekuci ĩhõõggõ hõdõlanit rũgẽt ꞌcĩ aalla ooo, nga haitiõõ naag tõõ.