Ebereei 10 - ꞌBuuk cĩ Thõõth cĩ Nyekuci

Odoyyii ꞌgaarrieeniti cĩ Yeesu

¹ Aaĩ nyattalĩ cĩ Mũũꞌtha hĩ lorii cĩ hẽlẽggĩ ꞌcĩg abũnnaa ꞌcĩg hatĩ nga au horumwa. Nẽ nyattalĩ ꞌcĩ aaĩ hĩ lorii ho, hõllõngaa ĩĩn hẽlẽggĩ ꞌcĩg abũnnaa eleetinii cĩggĩĩng ẽmmẽn, hĩnĩngĩtĩ hõllõngaa ũũny eet ꞌthẽccanẽẽtĩĩ cĩggĩĩng, hĩnĩngĩtĩ ꞌgarriẽẽn ꞌcĩg ibboorri hiriiri irkiꞌnyia hĩ irkiꞌnyia.

² Má baa hũtũũnyĩtõ ꞌgaarriẽẽna cieeg ꞌthẽccanẽẽt cĩg eet ꞌcĩg ala Nyekuc, occa ꞌyioko iittiõõ eeta hõllõngaa adiim ꞌgaarriẽẽn ũgĩ tarĩ, ꞌcĩg ũũny ꞌthẽccanẽẽt cĩggĩĩng.

³ Nẽẽthĩ, ꞌgaarriẽẽna nicciag, ammuhaak hinnia eet ꞌthẽccanẽẽt cĩggĩĩng irkiꞌnyia vẽlẽk.

⁴ Hĩnĩngĩtĩ hõllõngaa occa ũũny biyyieeta cĩg olĩꞌnyaannu hĩ cĩg ẽẽthak ꞌthẽccanẽẽt cĩg eetuk.

⁵ Ĩnõõ baa akuuni Krĩstõ loota nĩnga, hikia hĩĩnnĩk Nyekuc, “Baa hõllõngaa adiimi nii ꞌgaarriẽẽn cĩg idiꞌngwaanu hode atabi ꞌbaaninit ꞌcĩ ũũny ꞌthẽccanẽẽt. Nẽẽthĩ, baa aaꞌnyaa nii nganĩĩt ẽlẽ caannĩ hẽlẽmana hĩĩ ꞌbaaninit.

⁶ Baa iittiõõ nii hõllõngaa accamanoothihi, hĩnĩngĩtĩ idiꞌngwa hĩ ꞌgaarriẽẽn ꞌcĩg ĩwaaddi, hĩnĩngĩtĩ ꞌthẽccanẽẽta.

⁷ Nẽẽthĩ hĩĩna naa nẽẽ, ‘Nyekuc, baa hakuu naa hikia hĩdĩman tabiinit cunni, haau hĩcĩ eheeddi ꞌBuuhaa cĩ Nyekuci.’ ”

⁸ Aduha Krĩstõ ĩĩcĩ oou aĩ, “Baa hõllõngaa accamanoothihi nii, hĩnĩngĩtĩ ꞌbaaninit hĩ ꞌgaarriẽẽn ꞌcĩg baag aaꞌnyĩhoothikii nganiit, hĩnĩngĩtĩ ꞌthẽccanẽẽta” tananga baa hidiim nyattalĩ haanytĩhoothihii nganiit ꞌgaarriẽẽna hĩ ꞌbaaninit.

⁹ Nẽ tarĩ uduha Krĩstõ ĩĩ, “Cĩĩn nõõ, hikia hĩdĩmana naa thõõth baa adiimi niina.” Ikia ẽgẽẽran Krĩstõ lõhõt baa ꞌrẽẽnĩ nẽ irigitheek lõhõt ꞌcĩ ĩĩn ngeju.

¹⁰ Nẽ tabiittaa nĩĩca, hiita helleemito naag, hĩnĩngĩtĩ ẽlẽmana Yeesu Krĩstõ ẽlẽ cĩnnĩ ũdũt hĩĩ ꞌgaarrieenit tabattĩ hõdẽẽthõng, hĩnĩngĩtĩ eet vẽlẽk.

¹¹ Nyattaalaa baa ꞌrẽẽnĩ, abĩlĩ paadĩrĩ hõdõõkõthĩ ngaatĩ ĩbboorini ꞌgaarrieeniti, hĩbbõõr ꞌgaarriẽẽn ꞌcĩg aduhõõ thõng tabattĩ hiriiri, ꞌcĩg hõllõngaa attik ꞌthẽccanẽẽt cĩg eetuk battaala.

¹² Nẽẽthĩ, baa ẽlẽmanaak Krĩstõ paadĩrĩ cĩnaac ẽlẽ cĩnnĩ Nyekuc, hĩĩ ꞌgaarrieenit hõdẽẽthõng ꞌcĩ attik ꞌthẽccanẽẽta. Ma ho, ũũk iccioloongan nẽẽ ngaatĩ bulẽẽttõ ĩĩcĩ aꞌthiit cobbi cĩ Nyekuci.

¹³ Nĩngĩtĩ õkõ ereeini Krĩstõ nĩngaata, ĩꞌthõng hikia hĩllõõan Nyekuci mĩrõk cĩgĩnnĩg.

¹⁴ Hĩnĩngĩtĩ ꞌgaarrieenit cĩnnĩ ꞌcĩ odoyyii ho, ikia õõga Krĩstõ eet ꞌcĩg aꞌnyahaak nẽẽ Nyekuc ꞌthẽccaana.

¹⁵ Nẽ aduhaakeet Lorii ꞌcĩ Ẽllẽẽmĩth buúk ngagĩĩt aĩ,

¹⁶ “Ma ikia kõrra tĩho, lõhõt ꞌcĩ ĩĩn ngeju cieeni, ꞌcĩ hatĩ hadaka naag hĩ eet cĩgannĩg. Haaꞌnyihi hatĩ ĩhõõggõ huꞌthuutti nyattal caannĩ ootini nẽ aꞌnyahit ꞌthinneetini.”

¹⁷ Nẽ ĩttoorĩk thõõth icci ĩĩ, “Hataarothi hatĩ naa ꞌthẽccanẽẽt cĩggĩĩng hĩ thooꞌthiok cĩggĩĩng ꞌcĩg abathĩ.”

¹⁸ Ma ũtũngeek Nyekuci ꞌthẽccanẽẽt vẽlẽk, iittiõõ thĩ ꞌgaarriẽẽna ꞌcĩg ibboorri, hĩnĩngĩtĩ ꞌthẽccanẽẽt tõõ.

ꞌGõõl ꞌcĩ ĩĩn ngeju ꞌcĩ hadukni õlõ cĩ Nyekuci

¹⁹ ꞌGotoonoga hĩ ngoonoga, akũtanneet biyyieeta cĩg Yeesu ngagĩĩt ngaatĩ hadukni Nĩngĩtĩ Aꞌngirannii ꞌcĩ Ẽllẽẽmĩth Gẽrrẽẽt.

²⁰ Ubbuuhĩheet Yeesu daahĩthaa cĩnnĩ ngagĩĩt ꞌgõõl ꞌcĩ ĩĩn ngeju ꞌcĩ aaꞌnyeet rũgẽt. Nẽ aaꞌnyeet huduhunit Nĩngĩtĩ Aꞌngirannii ꞌcĩ Ẽllẽẽmĩth Gẽrrẽẽt, ngaatĩ ẽrrẽẽcĩ cẽrẽm ꞌcĩ ẽꞌngẽr ꞌCieeth cĩ Nyekuci ho hõrggẽẽna.

²¹ Nẽ hĩcĩ haꞌnyak naag paadĩr cobbi ꞌCieetõõ cĩ Nyekuci,

²² hõõt muumaa cĩ Nyekuci ꞌthinneetinii ꞌcĩg ĩĩn dĩdĩ ĩcĩg hẽlẽmmĩ ĩnõõnnõ. Hĩnĩngĩtĩ ũtũũnyĩ muhẽẽnĩtĩ cĩ ꞌthinneeti cĩggaac cĩg ꞌthẽccaanak, biyyiẽẽtĩĩ cĩg Krĩstõ, haanyteet ngagĩĩt hĩĩtõ tẽllĩg nẽ ũtũũnytĩ eleeti cĩggaac buúk maamĩĩ ꞌcĩg tẽllĩg.

²³ Hĩrrĩcatta naag ngaatĩ haꞌnyahĩ muhẽẽnĩt cĩnaac nẽ hõkõmtĩ thõõth baa aduhaakeet Nyekuci ngagĩĩta, hĩnĩngĩtĩ adĩman hatĩ nẽẽ thõõth baa aduha nẽẽnĩ.

²⁴ Huꞌthuutti ngaatĩ hakũtanĩ eleeti ꞌgõõlaa ꞌcĩ hammĩnanõõnĩ nẽ hĩdĩmanit thooꞌthiok ꞌcĩg abũnnaa.

²⁵ Hommottio hõdõõkõthĩ ngaatĩ laiitto nẽ occa hõllõngaa hadiim hĩthahĩth eet gõõng abũrĩ ngaatĩ adĩmanĩ noho, nẽẽthĩ, adiim hakũtan eleeti hõdõõkõthĩ, hátĩ gõõng homottio hĩ ꞌyioko ho, hĩcĩ acinnu niig buúk, õbõhĩ kõrra ꞌcĩ õbõdaanĩ Makayyioohiti ho.

²⁶ Hõlõ, má hara harĩnyaneek naag ꞌthẽccan noho baa hĩthĩhĩt ꞌgẽẽnyĩth ꞌcĩ thõõth ꞌcĩ ĩĩn dĩdĩ, iittiõõ ꞌgaarrieeniti ꞌcĩ hatĩ attik ꞌthẽccanẽẽt ꞌcĩg nga idiongan tõõ.

²⁷ Hitingolli naag thõõth ꞌcĩ etteedini thooꞌthioha dioo, hĩ ꞌgwoo ꞌcĩ hatĩ atũũth mĩrõk ꞌcĩg aharrieek Nyekuc.

²⁸ Nẽ ẽẽtĩ ꞌcĩ baa abũrĩ nyattal baa Mũũꞌtha, aruhi hiꞌthihi tamaati hẽbẽrẽẽnnĩĩ cĩg eet ꞌcĩg ĩĩn ꞌramma hode iyyio.

²⁹ Ummuhit dako nõõ ngaatĩ ahucci ukẽẽnĩtĩ ꞌcĩ hatĩ uukẽnĩ eeta ꞌcĩg abũrĩ thõõth cĩ Ngeertĩ Nyekuci nẽ ũtũbũrĩt biyyi cĩg lõhõtaak ꞌcĩg aaꞌnyeet ngagĩĩt helleemit. Arannĩ nẽẽg biyyi cĩg lõhõtaak, haau hĩcĩ hõllõngaa ẽllẽẽmĩth nẽ tarĩ, odoomito Lori ꞌcĩ Ẽllẽẽmĩth ꞌcĩ aꞌnyahaakeet ngagĩĩt tamaati cĩ Nyekuci.

³⁰ Hĩnĩngĩtĩ haga naag Nyekuc baa aduha aĩ, “Nganĩĩt Nyekuc, ꞌcĩ occa haruha oolo.” Nẽ tarĩ uduha ĩĩ, “Ẽttẽẽd hatĩ Makayyioohiti thooꞌthiok cĩg eet cĩgĩnnĩg.”

³¹ Ahuci ukẽẽnĩtĩ gẽrrẽẽt athĩnĩĩ cĩg Nyekuc ꞌcĩ arũgĩ.

³² Ma hataarroꞌthu waathinniook baag oou, baag athiknu niig thõõth cĩ Yeesu, ummukta tarĩ ꞌgõõl baa elemmu niig thõõth cĩnnĩ, tananga baa hĩĩ maka pĩĩrnanĩtĩ cunuung gẽrrẽẽt.

³³ Baa gõõng odoommuung eeta ngagiit lothippita waathinnioohĩĩ ũgẽẽgĩ nẽ uuktuung thõng buúk. Nẽ tarĩ, baa eelliou nyaagwaana waathinnioohĩ ũgẽẽgĩ ĩcĩg pĩĩrnattiaak.

³⁴ Baa ippiiriau niig hõdẽĩ hĩ eet baag aarĩhoothiku baabuuthatõõ. Ma baa ootti eeta ijjio cugguung vẽlẽk, baa ẽlẽmaaku taliitta. Baa agayyu niig ngaatĩ ereeyyuung ngagiit hẽlẽggĩ cugguung ꞌcĩg abũnnaa ꞌcĩg aalla ũdũt.

³⁵ Ĩnõõ ꞌcĩ haĩ, ma hadhuheeku kõmĩĩth cĩ lemiinit cunuung tuu, hĩnĩngĩtĩ õbõdaakuung hatĩ ngagiit ꞌbaaniniti cobbiẽẽnĩ.

³⁶ Adiim emmeꞌthu thooꞌthiok, hátĩ idticanit tabiinit cĩ Nyekuci. Nẽẽthĩ hatĩ ummuddiaau thõõth baa aduha nẽẽnĩ.

³⁷ Hĩnĩngĩtĩ, “Õbõhĩ ikia ẽẽtĩ ꞌcĩ hatĩ aku nẽ hõllõngaa hatĩ aayyiaa ĩꞌthõng.

³⁸ Nẽẽthĩ, arũgĩ hatĩ ẽẽtĩ caannĩ ꞌcĩ abũnnaa, hĩnĩngĩtĩ lemiinit. Nẽ aitiõõ hatĩ naa hõllõngaa haccamanoothihi, hatĩ aaĩ ẽẽtĩ umwaa ꞌcĩ abũrra nganĩĩta.”

³⁹ Hõllõngaa haattĩg naag hĩ eeta baag ũtũbũrĩt ĩnõõnnõ ho, haꞌnyak naag lemiinit cĩ daahĩth cĩ Yeesu baa aku ẽẽlanneet ngagĩĩta.