Ebereei 1 - ꞌBuuk cĩ Thõõth cĩ Nyekuci

Othoothĩkeet Nyekuci ꞌthaarĩĩ cĩg Ngeerĩnĩ

¹ Baangaani, baa gõõng othoothĩk Nyekuci hĩbaangĩ utugeetinii cĩg põrõvẽtaaꞌnyanu tabattĩ mẽẽlĩg ꞌgoolliohĩĩ cũũmõ cũũmõ.

² Nẽ ꞌyioko waathinnioohĩĩ ꞌcĩg adtuurna ho, ikia othoothĩheet Nyekuci ngagĩĩt ꞌthaarĩĩ cĩg Ngeerĩnĩ baa ẽhẽnytaanĩ nẽẽ looc, baa ẽbẽra Nyekuci ĩnõõnnõ hikia hirigith hẽlẽggĩ vẽlẽk baag ẽhẽnyta nẽẽnĩ.

³ Ĩĩn Ngeerĩnĩ lanyit cĩ bulẽẽnĩt cĩ Nyekuci nẽ aduhõõ nẽẽ hĩ Nyekuc ꞌgiiaa vẽlẽk. Aggam nẽẽ looc vẽlẽk kõmĩĩthaa cĩ thõõth cĩnnĩ. Ma baa ũtũũny nẽẽ ꞌthẽccanẽẽt cĩg eetuk ẽlẽk, ũũk iccioloongan hẽẽtahujjieen attiaa cobbi makaaꞌthĩtaa cĩ Nyekuci.

⁴ Ikia ĩĩ maka nẽẽ ĩllõõan aajĩlẽẽt makaaꞌthĩtaa cĩnnĩ, hĩnĩngĩtĩ akattioothĩk ĩnõõnnõ ꞌthaara ꞌcĩg ĩllõõan ꞌthaarriok vẽlẽk cĩg aajĩleetu.

Maka Ngeertĩ Nyekuci ĩllõõan aajĩlẽẽt

⁵ Baa nga hĩĩnnĩk Nyekuci aajĩlõ umwa, “Iini nii Loholeec caannĩ, nẽ ꞌyioko kõr nicci, hĩĩna naa Maaꞌnyu.” Hode anneek, “Hĩĩnĩ hatĩ naa Maaꞌnyĩ nẽ ĩĩn hatĩ nẽẽ Loholeec caannĩ.”

⁶ Ma baa ĩꞌthõõa Nyekuci Ngeerĩnĩ ꞌcĩ odoyyii hikia loota nĩnga, ikia õthõõth Nyekuci ĩĩ, “Aꞌnyĩĩk aajĩlẽẽt cĩgannĩg vẽlẽk hakattieek Loholeec caannĩ huruꞌnyia nẽ ubuluthit ĩnõõnnõ.”

⁷ Ma baa ho, ikia õthõõth Nyekuci thõõth cĩ aajĩleetu ĩĩ, “Haaꞌnyĩha naa aajĩlẽẽt cĩgannĩg haauto hĩ ngõõtĩ nẽ haaꞌnyĩha dticcianniook cĩgannĩg haauto hĩ lanyit cĩ ꞌgwoyyio.”

⁸ Nẽ uduha Nyekuci thõõth cĩ Ngeerĩnĩ ĩĩ, “Iini nii Nyekuc nẽ aggami hatĩ looc ĩĩ habu ooo nẽ tarĩ, aꞌnyahaak hatĩ makaaꞌthĩt cunni eet bũnnai loota nĩnga.

⁹ Baa ammĩnani nii thõõth ꞌcĩ abũnnaa nẽ aaburreehu thooꞌthiok ꞌcĩg abathĩ, nẽẽthĩ, hẽbẽraaii naa Nyekuci cunni nganiit ꞌlõõan ꞌgoonogu vẽlẽk, nẽ hiniibii ngõõrraa cĩ taliitto.”

¹⁰ Baa aduhaak Nyekuci Ngeerĩnĩ anneek, “Makayyioohit, baa ꞌthianaatta, nganiit ꞌcĩ baa ẽhẽnyta looc hĩ hẽẽtkujjieen athĩnĩĩ cugunnig.

¹¹ Aꞌnginoothi hatĩ hẽẽtkujjieen kĩ looc vẽlẽk nẽ uduktoothĩk hĩ ceremwaana ꞌcĩg ũnũũhĩtõ nẽ aalla hatĩ nii ooo.

¹² Appũrcca hatĩ nii hẽẽtkujjieen kĩ looc hĩ cẽrẽm gõõng happũrcca nẽ hudhukteek tuu, nẽ hõllõngaa hatĩ adtuurnik irkiꞌnyia cugunnẽẽgĩ, aalla hatĩ nii ooo nẽ hõllõngaa ahaanyi ũdũt.”

¹³ Baa nga hĩĩnnĩk Nyekuci aajĩlõ umwa, “Au attiaa caannĩ ĩcobbi ĩꞌthõng hĩllõõan naa mĩrõk cugunnig.”

¹⁴ Nẽẽthĩ hoti ho, ĩĩn aajĩlẽẽta loriẽẽt haaga ꞌcĩg ĩꞌthooyyiaa, hiita hidticattoothĩk eet ꞌcĩg hatĩ eelliaa.