3 Yõaannẽ 1 - ꞌBuuk cĩ Thõõth cĩ Nyekuci

ꞌThaainit ꞌcĩ õkõ hĩ ꞌGaio

¹ Waraga ꞌcĩ heheedi naa Yõaannẽ makayyioohiti cĩ lothippit cĩ lemmioohu cieeni. Heheedihi waraga ꞌgõõna ꞌGaio eet ꞌcĩ hammĩnani gẽrrẽẽt thõõthaa ꞌcĩ ĩĩn dĩdĩ.

² Ẽlẽ ꞌgõõna, hammuhi aaĩ lõꞌngõõc nẽ hummuha hĩĩna attirani ẽlla haau hĩcĩ attirani loriia.

³ Baa haccamanoothihi gẽrrẽẽt ngaatĩ hathĩknĩ hĩ ꞌgotoonogeet ũgĩ ꞌcĩg au aduhaaka anneeka, aꞌthũũnnĩ nii thõõth cĩ Nyekuci jurrung nẽ unuu thõõth ꞌcĩ ĩĩn dĩdĩ.

⁴ Aitiõõ taliiniti umwaa ꞌcĩ haꞌnyahi naa hĩllõõan ngaatĩ hathĩknĩ aĩ, aꞌthũũnnĩ lohollia cĩgannĩg thõõth ꞌcĩ ĩĩn dĩdĩ tõõ.

ꞌGõõl ꞌcĩ haꞌthũũnnĩ dticcianniook cĩg Makayyiooktak

⁵ ꞌGõõna cĩ ꞌthĩnĩtõ, abũnna nii gẽrrẽẽt ngaatĩ aꞌthũũnnĩ thõõth cĩ Nyekuci hõdõõkõthĩ ꞌgõõlaa ꞌcĩ ẽẽlĩ nuyyiook ũgĩ cĩg Makayyiooktak, tananga ĩĩn nẽẽg tahan hĩ nganiita.

⁶ Uduktaak nẽẽg lothippit cĩ lemmioohu mĩnnan cunni. Athithan nẽẽg aĩ, baa abũnna nii gẽrrẽẽt ngaatĩ aaꞌnyĩkĩĩ ĩhõõggõ hiita halangatõõ cunni nẽ ĩꞌthooihuu ĩhõõggõ hõõt dtiicaa cĩnĩĩng ꞌgõõlaa ꞌcĩ occa ĩꞌthooini dticcianniooha cĩg Nyekuci.

⁷ Ma baa ĩtĩngaacõ nẽẽg õõt uduktaak eet ũgĩ thõõth cĩ Makayyiookto, baa abũrĩ nẽẽg ngaatĩ ẽlẽmmĩ eliinit umwa hĩ eet ꞌcĩg hõllõngaa ĩĩn lemmiook cĩg Nyekuci.

⁸ Adiim occa ngagĩĩt ꞌcĩg hẽẽl eet ꞌcĩg aattĩg hĩ nẽẽgĩ, hátĩ hidticattõ hõdẽĩ hĩ ĩhõõggõ ꞌgõõlaa ꞌcĩ hallimanẽẽkĩ eet thõõth cĩ Nyekuci ꞌcĩ ĩĩn dĩdĩ.

⁹ Baa heteheedĩha naa lothippit cĩ lemmioohu waraga, nẽẽthĩ hinnia, baa accamana Diotereve ngaatĩ adiim ĩĩnnĩ makayyioohit nẽ hõllõngaa adiim occa athĩkneet ngagĩĩta.

¹⁰ Má hikia naana, hakuu hatĩ haduha thooꞌthiok ũgĩ ꞌcĩg baag adtican nẽẽnĩ, hĩ thooꞌthiok ꞌcĩg abathĩ ꞌcĩg adĩmanneet nẽẽ ngagĩĩt ꞌbuth. Nẽ baa hõllõngaa abũrĩ nẽẽ ngaatĩ ẽlẽmmĩ lemmiook thõng diooni, baa alaam nẽẽ eet ũgĩ buúk, hiittiõõ hõllõngaa ẽẽl ĩhõõggõ. Nẽ tarĩ, alaam lemmiook ꞌcĩg adiim ẽẽl ĩhõõggõ nẽ itiggia ĩhõõggõ lothippitaa cĩ lemmioohu.

¹¹ ꞌGõõna cĩ ꞌthĩnĩtõ, ma hĩthakꞌtha thooꞌthiok ꞌcĩg abathĩ ꞌcĩg adĩman eeta ũgẽẽgĩ! Nũũ terethiinit cĩ eet ꞌcĩg adĩman thooꞌthiok ꞌcĩg abũnnaa diooni. Gaooth ĩĩ, eeta ꞌcĩg adĩman dtiicanĩ ꞌcĩg abũnnaa, ẽtẽrꞌtha nẽẽg ngaatĩ ĩĩnnĩ lõhõlĩ cĩg Nyekuci. Nẽ eeta ꞌcĩg adĩman thooꞌthiok ꞌcĩg abathĩ, ẽtẽrꞌtha nẽẽg ngaatĩ nga hagayyi nẽẽg Nyekuc.

¹² Athithan eeta vẽlẽk bũnnai cĩ Demetirio nẽ aduha thõõth ꞌcĩ ĩĩn dĩdĩ ho buúk. Hothoothi naa buúk ĩnõõnnõ jurrung nẽ agayyu niig ngaatĩ ĩĩnnĩ thõõth ꞌcĩ haduhaanna naag ko dĩdĩ.

ꞌThaainit ꞌcĩ adtuurna

¹³ Haꞌnyahi thõõth cobbi gẽrrẽẽt ꞌcĩ haĩ huduhaahuunga, nẽẽthĩ hinnia, hõllõngaa hadiimi hẽhẽẽdakuung waragaawa.

¹⁴ Hammuhi hakuu hatĩ hacinnuung hĩdĩĩkoothong nẽ thĩ hatĩ hiita hothooꞌthio hõdẽĩ.

¹⁵ Halayyi naa haini, aꞌnyĩĩk Nyekuc haggatanuung ganõõna! Ĩꞌthaayyuung ꞌgoonogu ꞌcĩg aattĩg ngaati. Ĩꞌthaayyihaangu ꞌgoonogeet nĩĩca hõdẽĩ hõdẽĩ.