2 Timotteeo 1 - ꞌBuuk cĩ Thõõth cĩ Nyekuci

¹ Nganĩĩt Paaulo ꞌthooyyiahit cĩ Yeesu Krĩstõ. Baa Nyekuc ꞌcĩ ẽbẽraanna nganĩĩt nẽ aaꞌnya rũgẽt baa aduha nẽẽ aĩ, aku hĩ Yeesu Krĩstõ.

² Timotteeo, ĩĩnĩ nii loholeec caannĩ cĩ ꞌthĩnĩtõ. ꞌNyaak bũnnai hĩ tamaati hĩ authet ꞌcĩ aayyi lõꞌngõõc, ꞌcĩ aku hĩ Nyekuc Baangeet hĩ Makayyioohit cĩnaac Yeesu Krĩstõ.

Ma haꞌngaaoni Makayyioohit Yeesu Krĩstõ

³ Hanneehi naa Nyekuc ꞌcĩ hadticanoothihi ꞌthĩnĩtaa ꞌcĩ tẽllĩ ho ĩlaallẽ, hĩ baa anneek nyakangaaꞌnya cĩggaac ĩnõõnnõ ĩlaallẽ. Hammuhaannii naa nganiit baalin hĩ waathĩn hiriiri, hatĩ hala Nyekuc.

⁴ Hammuhoothi kõr baa adhukiaanĩ nganiit tilaalõ nẽ hadiimi gẽrrẽẽt ngaatĩ hakuu hacinni tarĩ. Haccamanoothihi hatĩ gẽrrẽẽt kõr ꞌcĩ hõmmõtõõnĩ.

⁵ Hummuhootha lemiinit cunni ꞌcĩ ĩĩn dĩdĩ, baa aꞌnyak morwahit cunni Yunitha, hĩ morwahit cunni cobbi Loiꞌtha nẽ ꞌyioko hagawa jurrung, aꞌnyahi nii buúk lemiinit tĩho.

⁶ Nẽ thõõthaa cĩ, hanneekii dticcianõõĩ ꞌbaaninit baa aaꞌnyi Nyekuci nganiit kõr baa hataadiki naa nganiit athĩn cĩgannĩg nẽ halaooyyiina.

⁷ Hĩnĩngĩtĩ hõllõngaa aaꞌnyeet Nyekuci lori cĩ hiteelini thõng. Aaꞌnyeet nẽẽ ngagĩĩt lori cĩ ꞌtirriaanõ hĩ cĩ mĩnnaanõ hĩ ꞌgõõl ꞌcĩ hilõõtĩ eleeti jurrung.

⁸ Ma haꞌngaaoni ngaatĩ aduhaakĩ eet thõõth cĩ Makayyioohit cĩnaac, hode ma haꞌngaaoni, hĩnĩngĩtĩ nganĩĩt buúk, tananga haaĩ baabuutha, hĩnĩngĩtĩ hadticanoothihi Krĩstõ. Dticcianõõĩ ꞌtirrian baa aaꞌnyi Nyekuci nẽ hotholit hĩ nganĩĩt pĩĩrnanĩt ꞌcĩ hammũda naag, hatĩ haduhaak eet nyeemuut ꞌcĩ abũnnaa.

⁹ Baa ẽẽlaeet ngagĩĩt Nyekuci nẽ ẽbẽraaeet hĩĩtõ eet cĩgĩnnĩg ꞌcĩg haattĩg authetaa ꞌcĩ ẽllẽẽmĩthĩ. Adĩman Nyekuci hoti, hõllõngaa, hĩnĩngĩtĩ thõõth ꞌcĩ hadĩman naaga, adĩman nẽẽ noho, hĩnĩngĩtĩ bũnnai cĩnnĩ. Baa aaꞌnyeet Nyekuci ngagĩĩt bũnnai, ꞌthaarĩĩ cĩg Yeesu Krĩstõ, baa nga heteheꞌnyiaa lõõcĩ.

¹⁰ Nẽẽthĩ ꞌyioko, ikia eteretheeheet ngagĩĩt Ellioohiti cĩnaac Yeesu Krĩstõ tarbalꞌthẽẽt cĩ Nyekuci. Ĩllõõan nẽẽ daahĩth nẽ eteretheeheet lanyit cĩ rũgẽt ꞌcĩ aalla ooo jurrung, nyeemuutaa ꞌcĩ abũnnaa.

¹¹ Nẽ baa ẽbẽraanna nganĩĩt Nyekuci hĩĩ ꞌthooyyiahit cĩnnĩ ꞌcĩ hakuu hallimaneehi eet thõõth cĩnnĩ ꞌcĩ ĩĩn ngeju.

¹² Ĩnõõ ꞌcĩ happĩĩrnanĩĩ naa hĩ ꞌyioko ho. Nẽ hõllõngaa haꞌngaaoni, hĩnĩngĩtĩ haga naa Krĩstõ ꞌcĩ helemi naa dĩdĩ nẽ õkõmĩ nganĩĩt ꞌthĩnĩt haini, ĩnõõnnõ ꞌcĩ occa aꞌthũũnna nganĩĩt dtiicaa cĩnnĩ, ĩꞌthõng kõr ꞌcĩ hatĩ õbõdaanĩ nẽẽnĩ.

¹³ ꞌThũũtĩ thõõth baa hallimaneekii naa, lemiitta nẽ ĩmmĩnanuu Yeesu Krĩstõ.

¹⁴ ꞌThũũtĩ thõõth cĩ Nyekuci baa aaꞌnyĩhoothikii nganiit, eliittaa cĩ Lori ꞌcĩ Ẽllẽẽmĩthĩ, ĩcĩ aaĩ eleetinitõõ cĩggaac.

¹⁵ Aga nii buúk, ũtũngteeha nganĩĩt eeta ũgẽẽgĩ cĩg looc cĩ Aaꞌthia, tananga Vijeelo hĩ Hermojeno buúk ũtũngteehaanĩ.

¹⁶ Aꞌnyĩĩk Nyekuc hatamaatĩk Onethivoro hĩ halang cĩnnĩ, hĩnĩngĩtĩ ĩnõõnnõ ꞌcĩ baa aaꞌnya hõkõm ꞌthĩnĩt, baa hõllõngaa aꞌngaaõn nẽẽ ngaatĩ aku acĩnna nganĩĩt, baa haaĩ baabuuthatõõ.

¹⁷ Ma baa uppwaanna ꞌRoomattĩ ho, aku adiimma nganĩĩt lõkõrẽẽt vẽlẽk ĩꞌthõng hũmmũdaawaanĩ.

¹⁸ Aꞌnyĩĩk Makayyioohit Yeesu Krĩstõ hatamaatĩk ĩnõõnnõ, kõr ꞌcĩ hatĩ ẽttẽẽdĩ nẽẽ thooꞌthiok cĩg lootu. Aga nii buúk gẽrrẽẽt, ngaatĩ baa ẽẽlla nẽẽ nganĩĩt ꞌgoolliohĩĩ ꞌcĩg mẽẽlĩg, baa haaĩ ꞌtaaũnaa cĩ Eevvetho.