2 Tẽꞌthaloonika 2 - ꞌBuuk cĩ Thõõth cĩ Nyekuci

Kõr ꞌcĩ hatĩ õbõdaanĩ Yeesu

¹ Nẽẽthĩ ꞌyioko, ꞌgotoonoga hĩ ngoonoga, hummuddia da jurrung ꞌgõõl ꞌcĩ hatĩ õbõdaanĩ Makayyioohiti cĩnaac Yeesu Krĩstõ, hĩ ꞌgõõl ꞌcĩ hatĩ halũttiaanĩ naag hõõt hommottio hĩ ĩnõõnnõ. Nẽ hanneekuung naag ngagiit nẽẽ,

² ma haaꞌnyiku eet ꞌcĩg aĩ, “hĩĩgĩnna põrõvẽtaaꞌnya” higgoolluung hĩĩttĩhuung, ikia Makayyioohiti ẽlẽk. Horoong iggoolluung hatĩ nẽẽg anneekuung ĩĩn thõõth ciee, ꞌcĩ hathĩknaanna cũrũmũũm hĩ Lori ꞌcĩ Ẽllẽẽmĩthĩ, hode hĩ eet umwa hode aĩ, haggiilanna waragẽẽtĩĩ baag heheedi naa Paaulo.

³ Ma haaꞌnyiku eet umwa higgooluung ũdũt, hĩnĩngĩtĩ hõllõngaa hatĩ aku kõrra niccia nga hedeeꞌnyia jõrẽẽĩ. Nẽ tarĩ hõllõngaa aku kõrra niccia nga hedeeꞌnyia ẽẽtĩ ꞌcĩ abũrĩ thõõth cĩ Nyekuci, nẽẽthĩ, eet ꞌcĩ hatĩ aruk Nyekuci ho niccia.

⁴ Irrian hatĩ ẽẽtĩ tĩho nẽ ũtũbũr hẽlẽggĩ vẽlẽk ꞌcĩg ẽllẽẽmĩth hode ꞌcĩg aꞌngirannii. Nẽẽthĩ tarĩ, iccioloongan hatĩ nẽẽ ꞌCieetõõ cĩ Nyekuci nẽ uduha ĩĩ hĩĩnĩ Nyekuc.

⁵ Hõllõngaa ammuhooꞌthu niig thõõth baa haduhaakuung naa baa nga harũmĩ hõdẽĩ ho?

⁶ Nẽẽthĩ ꞌyioko, agayyu niig ꞌgii ꞌcĩ alaam eet ꞌcĩ abũrĩ thõõth cĩ Nyekuci ho, hatĩ ũttũbanoothĩk kõrra ꞌcĩ akuuni nẽẽnĩ.

⁷ Hĩnĩngĩtĩ adticaniini hatĩ nẽẽ ꞌtirrian cĩnnĩ ꞌcĩ ammiꞌthi cĩ ꞌthẽccaanõ. Nẽẽthĩ, ẽẽtĩ ꞌcĩ ꞌyioko alaam ꞌtirrian cĩ eet ꞌcĩ aĩ hĩĩnĩ Nyekuc ko, aalla hatĩ alaam ĩꞌthõng hẽꞌnyẽẽhĩ ꞌgõõla.

⁸ Nẽ ma edeeꞌnyia ẽẽtĩ ꞌcĩ abũrĩ thõõth cĩ Nyekuci ho, aruk hatĩ Makayyioohiti Yeesu ĩnõõnnõ ꞌlaũhẽẽnnĩĩ cĩgĩnnĩg nẽ tarĩ, uruk bulẽẽttaa ꞌcĩ õbõdaanĩ nẽẽnĩ.

⁹ Ma ikia ẽẽtĩ ꞌcĩ abũrĩ thõõth cĩ Nyekuci ho, aku hatĩ adtican dtiic cĩ ꞌThĩttaanõ nẽ ĩdĩman thooꞌthiok ꞌcĩg ĩnaat eeta hĩ terethiinit ꞌcĩ ĩĩn õlõng.

¹⁰ Aku hatĩ ĩggõõl nẽẽ eet cĩg iꞌngittõõthĩ, hĩnĩngĩtĩ thooꞌthiok cĩgĩnnĩg ꞌcĩg abathĩ. Uuk hatĩ Nyekuci eet ꞌcĩg ĩggõõl ꞌThĩttaanĩ ho, hĩnĩngĩtĩ baa abũrĩ nẽẽg ngaatĩ ammĩnanĩ thõõth ꞌcĩ ĩĩn dĩdĩ, ꞌcĩ occa baa aaꞌnyĩk Nyekuc hẽẽla ĩhõõggõ.

¹¹ Hĩnĩngĩtĩ thõõth icci, ĩꞌthõõak hatĩ Nyekuci ĩhõõggõ õlõng ꞌcĩ attiran gẽrrẽẽt, hátĩ helemit nẽẽg õlõng.

¹² Uuk hatĩ Nyekuci ĩhõõggõ vẽlẽk, hĩnĩngĩtĩ ẽlẽmĩ nẽẽg thõõth ꞌcĩ hõllõngaa ĩĩn dĩdĩ nẽ accamatta ꞌthẽccan.

Ĩbĩlĩt okomit

¹³ Nẽẽthĩ, hadiimma naag hanneeka Nyekuc hõdõõkõthĩ ĩlaallẽ ꞌgotoonoga hĩ ngoonoga, hĩnĩngĩtĩ ammĩnannuung Makayyioohiti Yeesu ngagiita nẽ ẽbẽraauung Nyekuci ngagiit dtiicaa cĩ Lori ꞌcĩ Ẽllẽẽmĩthĩ hĩ ngaatĩ elemmu thõõth ꞌcĩ ĩĩn dĩdĩ.

¹⁴ Avvaannuung nẽẽ ngagiit nyeemuutaa ꞌcĩ abũnnaa ĩcĩnaang, hátĩ otholit bulẽẽnĩt cĩ Makayyioohit cĩnaac Yeesu Krĩstõ.

¹⁵ Nẽẽthĩ, ꞌgotoonoga hĩ ngoonoga, ĩnõõ ꞌcĩ hanneekuung, ĩbĩlĩt okomit nẽ uꞌthuuttu thooꞌthiok baag hallimaneekuung naag jurrung, hode haduhaakuung ũtũũgaa hode hẽhẽẽdakuung waragaawa.

¹⁶ Aꞌnyĩĩk Makayyioohit cĩnaac Yeesu Krĩstõ hĩ Nyekuc Baangeet cĩnaac ꞌcĩ ammĩnanneet ngagĩĩt bũnnaiitta cĩnnĩ nẽ aaꞌnyeet kũttan ꞌcĩ aalla ooo hĩ muhẽẽnĩt ꞌcĩ abũnnaa,

¹⁷ hũkũtattuung hokomit ꞌthinneeti nẽ eelluung hõdõõkõthĩ ĩdĩmanit thooꞌthiok ꞌcĩg abũnnaa nẽ uduktaau thooꞌthiok ꞌcĩg ĩĩn dĩdĩ.