2 Tẽꞌthaloonika 1 - ꞌBuuk cĩ Thõõth cĩ Nyekuci

¹ Nganĩĩt Paaulo ꞌcĩ hẽhẽẽdakuung waraga icci ho, hẽhẽẽdakuung ngagiit lothippit cĩ lemmiook cĩg ꞌtaaũn cĩ Tẽꞌthaloonika, ꞌcĩg iiginnu eet cĩg Nyekuc Baangeet cĩnaac hĩ Makayyioohit Yeesu Krĩstõ. Ĩꞌthaayyuung ꞌThĩĩla hĩ Timotteeo buúk ngagiita.

² Aꞌnyĩĩk bũnnai cĩ Nyekuc Baangeet cĩnaac hĩ Makayyioohit Yeesu Krĩstõ, haggatanuung ngagiit aaut lõꞌngõõc.

Kũttan korrioohĩĩ cĩg ꞌcannaanak

³ ꞌGotoonoga hĩ ngoonoga, hẽbẽaneeka naag hõdõõkõthĩ ngaatĩ hanneeka Nyekuc ĩlaallẽ, hĩnĩngĩtĩ ngagiita. Hĩnĩngĩtĩ alĩthĩ lemiiniti cunuung ꞌcĩ elemmu Nyekuc hĩ mĩnnan ꞌcĩ ammĩnannu niig ꞌgoonogu hõdõõkõthĩ.

⁴ Ĩnõõ ꞌcĩ hirriannuung naag ngagiit hĩ lothippiꞌnya cĩg lemmiook cĩg Nyekuci loonyini vẽlẽk. Haduhaaka naag ĩhõõggõ thõõth ꞌcĩ emmeeꞌthu niig pĩĩrnanĩt hĩ thõõth ꞌcĩ aallannu niig elemmu Nyekuc, tananga aꞌnyaku ꞌcannan hĩ pĩĩrnanĩt cobbi gẽrrẽẽt.

⁵ Ĩĩn ciee vẽlẽk thõõth ꞌcĩ ẽtẽrꞌtha aĩ, aũlan thõõth ꞌcĩ ẽttẽẽd Nyekuci nẽ ũkũmaneehuung nẽẽ ngagiit eliitta, ngaatĩ othollu hĩ Nyekuc habuccieet cĩnnĩ, hĩnĩngĩtĩ ꞌcannan ꞌcĩ emmeeꞌthu niig ꞌyioko ho.

⁶ Aũlan hatĩ thõõth cĩ Nyekuci ꞌcĩ hatĩ uuki nẽẽ eet ꞌcĩg aaꞌnyuung ngagiit ippiirria ꞌyioko ho,

⁷ nẽẽthĩ, õõgannuung hatĩ nẽẽ ngagiit ꞌcannaanaa cunuung. Nẽ õõganneet hatĩ ngagĩĩt buúk, hatĩ õbõda Makayyioohiti Yeesu hẽẽtahujjieen, ookorria hĩ aajĩlẽẽt cĩgĩnnĩg ꞌcĩg attiranĩ,

⁸ ꞌcĩg aꞌnyak ꞌgwoo ꞌcĩ alanyĩtĩ. Uuk hatĩ Makayyioohiti cĩnaac Yeesu, eet ꞌcĩg hõllõngaa aga Nyekuc nẽ hõllõngaa athĩhĩ nyeemuut cĩnnĩ ꞌcĩ abũnnaa.

⁹ Uuk hatĩ Nyekuci ĩhõõggõ nẽ aaꞌnyĩk haccanattĩ ooo, nẽ hatĩ ũꞌnyũũgtothoothĩk nẽẽg battaala hĩĩtõ ꞌrẽẽttĩg hĩ Makayyioohit, hiittiõõ hõllõngaa acĩn ĩnõõnnõ hĩ bulẽẽnĩt hĩ ꞌtirrian cĩnnĩ.

¹⁰ Ma õbõda Yeesu kõr niccia, abuluth hatĩ nẽ ĩdĩhĩthĩt ĩnõõnnõ eeta cĩgĩnnĩg ꞌcĩg ẽllẽẽmĩthĩ. Aattiyyu hatĩ niig buúk tõõ kõr tĩho, hĩnĩngĩtĩ elemtu niig thõõth cĩnnĩ baa hallimaneekuung naaga.

¹¹ Ĩnõõ ꞌcĩ halaiinnuung naag ngagiit hõdõõkõthĩ haĩnna, aꞌnyĩĩk Nyekuc haaꞌnyuung eet baag ẽbẽraauung nẽẽ ẽlẽk ko, uꞌthuutti thõõth cĩnnĩ authetaa ꞌcĩ aattiyyu. Aꞌnyĩĩk ĩnõõnnõ heeluung ngagiit ꞌtirriaanaa cĩnnĩ ũbũttaath nẽ elemtu thõõth cĩnnĩ.

¹² Halaiinna naag haĩnna aꞌnyĩĩk ꞌthaar cĩg Makayyioohit Yeesu hubuluꞌthi hĩ ngagiita nẽ aꞌnyaktaau niig buúk bulẽẽnĩt cunuung hĩ ĩnõõnnõ, hĩnĩngĩtĩ tarbalꞌthẽẽt cĩ Nyekuci, hĩ cĩ Makayyioohit cĩnaac Yeesu Krĩstõ.