1 Tẽꞌthaloonika 5 - ꞌBuuk cĩ Thõõth cĩ Nyekuci

Ũkũmattoothĩk, õbõda hatĩ Yeesu

¹ ꞌGotoonoga hĩ ngoonoga, ma ĩĩn kõr ꞌcĩ hatĩ õbõdaanĩ Makayyioohiti tarĩ, hõllõngaa occa adiim hẽhẽẽdakuung waraga thõng buúk,

² hĩnĩngĩtĩ agayyu niig buúk jurrung ainnu, adhukiaakeet hatĩ kõrra ꞌcĩ õbõdaanĩ Makayyioohiti hĩ gõõng anĩhaakeet igorriaahiti baal.

³ Ma ammuk eeta aĩ, “Haattiyyia lõꞌngõõc ꞌlẽẽmĩtha,” adhukiaak hinnia hatĩ pĩĩrnanĩtĩ ꞌcĩ ĩꞌthaan ĩhõõggõ haau hĩ gõõng alubaak ngaa huciithi ꞌcĩ atturi ꞌgoonnia. Nẽ aitiõõ hatĩ nẽẽg hõllõngaa alĩĩta.

⁴ Nẽ niig ꞌgotoonoga hĩ ngoonoga ꞌcĩg hõllõngaa aattiyyu muguratõõ ho, ma haaꞌnyiku kõr ꞌcĩ hatĩ õbõdaanĩ Yeesu ho, hukuleehuung ꞌjieen hĩ igorriaahiti ꞌcĩ aku baal.

⁵ Iittu niig vẽlẽk lõhõlĩ cĩg lanyitaak nẽ iittu lõhõlĩ cĩg waathĩnaak nẽ hõllõngaa hĩĩgĩn naag cĩg baalinu hode cĩg muguurak.

⁶ Nẽẽthĩ hoti ho, occa hõllõngaa hattumanni naag hoogin hĩ eeta ꞌcĩg oogin ko, hĩcĩttĩ nẽ haauto dĩkĩĩm huꞌthuutti eleeti.

⁷ Nẽ eeta ꞌcĩg oogini, oogin baal nẽ eeta ꞌcĩg adũũtĩ, adũũtĩ baal.

⁸ Nẽ naag eeta ꞌcĩg haattĩg lanyita ho, haꞌnyahit muhẽẽnĩt ꞌcĩ tẽllĩ nẽ eteiinneet hilib cĩ lemiitto hĩ cĩ mĩnnaanõ nẽ hitihimit naꞌngaala cĩ eliinit cĩnaac.

⁹ Baa hõllõngaa ẽbẽranneet ngagĩĩt Nyekuci hatĩ huukeet lĩĩlĩẽẽttaa cĩnnĩ, baa adiim nẽẽ hiita hummuddia naag eliinit hĩ Makayyioohit cĩnaac Yeesu Krĩstõ.

¹⁰ Baa adaahĩ nẽẽ, hĩnĩngĩtĩ ngagĩĩta, hátĩ hõõt hũrũmtĩ hĩ ĩnõõnnõ ũdũt, tananga nga harũgĩ hode hadaahito ẽlẽk.

¹¹ Nẽẽthĩ hoti ho, ũkũtanit ꞌgoonogu ngaatĩ eelonnu nyaagwaana, irrioottĩk, hátĩ hokomit ĩhõõggõ ꞌthinneeti, haau hĩcĩ ꞌthẽk adĩmannu ꞌyioko ho.

Ẽdẽcaak Paaulo ꞌrioon

¹² Hõlõ, halayyuung ꞌthinneeti cugguung, itingolli makayyiook cugguung ꞌcĩg ũũhayyuung nẽ idticattõõ gẽrrẽẽt hõrggẽẽnaa cunuung nẽ illimatteehuung ngagiit thõõth cĩ Makayyioohit Yeesu ho.

¹³ Itingolli nẽ ĩmmĩnattu ĩhõõggõ gẽrrẽẽt, hĩnĩngĩtĩ dtiic ꞌcĩ adtican nẽẽg ko. Nẽ niig buúk hõrggẽẽnaa cunuung, aaut hĩ ꞌgoonogu lõꞌngõõc.

¹⁴ Haduhaakuung thõõthaa ꞌcĩ õkõmĩ gẽrrẽẽt hõlõ, itilooc eet ꞌcĩg ĩĩn nyamuttiook hidticattõõ hĩ eeta vẽlẽk, uduktaak teelliak hokomit ꞌthinneeti, eelit pĩĩrnattiaak nẽ ĩdĩhattu thooꞌthiok hõrggẽẽnaa cunuung.

¹⁵ Ĩcĩnĩt jurrung, ma haruhaannu oolo, ĩĩtõ tarbalĩg hĩ lemmiook hõdõõkõthĩ hĩ eet vẽlẽk.

¹⁶ Accamattoothĩk hõdõõkõthĩ.

¹⁷ Alayyio hõdõõkõthĩ.

¹⁸ Ĩĩttĩk Nyekuc ĩlaallẽ hõdõõkõthĩ, hĩnĩngĩtĩ ꞌgõõl ꞌcĩ adiimmuung nẽẽ ngagiit aautti hĩ lemmiooha ho cieeni, niig eeta ꞌcĩg elemmu Yeesu Krĩstõ.

¹⁹ Ma hadiittu Lori ꞌcĩ Ẽllẽẽmĩthĩ,

²⁰ ma habbeeku thooꞌthiok ꞌcĩg aduha põrõvẽtaaꞌnya cĩg Nyekuci õlõng,

²¹ ĩttĩmanit hẽlẽggĩ vẽlẽk. Nẽ akatti hẽbẽrĩ thooꞌthiok iccig jurrung nẽ uꞌthuutti thõõth ꞌcĩ abũnnaa diooni.

²² Ũtũbũrĩt thooꞌthiok vẽlẽk ꞌcĩg abathĩ.

Alaõõĩ Paaulo lemmiook

²³ Aꞌnyĩĩk Nyekuc cĩ ganõõnõ ꞌcĩ aaꞌnyeet ngagĩĩt vẽlẽk haaut lõꞌngõõc, haaꞌnyuung hĩĩtõ tẽllĩg loriẽẽta cugguung hĩ eleeti cugguung thooꞌthiohĩ vẽlẽk nẽ aaꞌnyuung ngagiit vẽlẽk aaut hiꞌthihi ꞌthẽccan umwa ũdũt, ĩꞌthõng hõbõda Makayyioohiti cĩnaac Yeesu Krĩstõ.

²⁴ Nẽ Nyekuci baa ẽbẽraannuung ngagiit ĩĩtõ lõhõlĩ cĩgĩnnĩg ko, aꞌnyak lemiinit dĩdĩ ꞌthĩnĩta nẽ adĩman ꞌthẽk hatĩ thõõth icci.

²⁵ Hõlõ, ꞌgotoonoga hĩ ngoonoga, alayyiooyyieetu niig buúk ngagĩĩta.

²⁶ Ĩꞌthaac ꞌgotoonogu hĩ ngoonogu nĩngaata vẽlẽk gẽrrẽẽt ũdũt ꞌthaaittaa cĩ mĩnnaanõ.

²⁷ Nẽ haduhaakuung naa ngagiit komiitta ꞌthaarĩĩ cĩg Makayyiookto, itigiillik waraga icci lemmiook vẽlẽk.

²⁸ Aꞌnyĩĩk bũnnai cĩ Makayyioohit cĩnaac Yeesu Krĩstõ haau hĩ ngagiit vẽlẽk.