1 Tẽꞌthaloonika 3 - ꞌBuuk cĩ Thõõth cĩ Nyekuci

Ummuk Paaulo heeroni cĩ Tẽꞌthaloonika

¹ Ma baa ũũppanneet thõõth ꞌcĩ hẽꞌngẽrõõnĩ ho gẽrrẽẽt, hiita hummukta hĩĩtta, ĩꞌnya hidiongatta naag dioo ẽmmẽn ꞌtaaũnaa cĩ Aathẽnĩ,

² nẽ hĩꞌthooyyiahuung ꞌgotooneet Timotteeo hikia hicinuunga. Ĩĩn nẽẽ ꞌgotooneet ꞌcĩ hadticanoothĩka Nyekuc hõdẽĩ, thõõthaa ꞌcĩ hallimannuung nyeemuut ꞌcĩ abũnnaa cĩ Krĩstõ. Baa hĩꞌthõõanna naag ĩnõõnnõ hikia hũkũtanuung ngagiit, hátĩ hokomit ꞌthinneeti cugguung lemiitta.

³ Hõllõngaa hadiimma naag eet umwa hũtũngeek thõõth cĩ Nyekuci, hĩnĩngĩtĩ thooꞌthiok ꞌcĩg abathĩ baag hammũdaanna naaga. Baa agayyu niig buúk jurrung ngaatĩ hatĩ haccananiini naaga.

⁴ Nẽ dĩdĩ, baa gõõng haduhaakuung naag ngagiit baa nga harũmĩ hĩ ngagiit hanneekuung, haccananni hatĩ naaga. Nẽ ꞌyioko, hiita haccanattĩ dĩdĩ hĩcĩ ꞌthẽk agayyu niig buúk ko.

⁵ Ĩnõõ ꞌcĩ hõllõngaa hẽmmẽẽꞌthĩ naa thõõth cĩ heeroni icci ho nẽ hĩꞌthõõa Timotteeo, haĩ hikia hũmmũda hatĩ nga aꞌthuunnu lemiinit cunuung hĩ Nyekuc. Baa hiꞌngolli haini, ikia mõnõ lũllũũmannioohiti ꞌThĩttaanĩ ũlũllũũmanuung ꞌgõõlaa umwaanĩ nẽ hatĩ ikia dtiici baa naang ko, ĩĩ olongit haaga.

Aꞌnyaha Timotteeo nyeemuut ꞌcĩ abũnnaa

⁶ Ma baa õbõda Timotteeo õdõlaneet ngagĩĩt ngaati, ikia aꞌnyahaaheet nyeemuut ꞌcĩ abũnnaa ꞌcĩ aku hĩ ngagiit ꞌcĩ aĩ, nga aꞌthuunnu niig lemiinit hĩ mĩnnan cunuung cĩ Nyekuci gẽrrẽẽt noho. Nẽ tarĩ ĩĩ, accamanoothiku gẽrrẽẽt, hatĩ ammuhaanneetu ngagĩĩt ammuku ainnu, hommottio occa! Haau hĩcĩ hammuka naag buúk ngaatĩ haĩnna, hommottio occa!

⁷ Nẽẽthĩ, ꞌgotoonoga hĩ ngoonoga, aaꞌnyeetu niig ngagĩĩt hĩĩtõ ꞌthinneeti ꞌtiee, hĩnĩngĩtĩ nga aꞌthuunnu lemiinit cunuung hĩ Nyekuc, tananga haꞌnyaka pĩĩrnanĩt cobbi hĩ ukẽẽnĩt cĩ ꞌyioko ho.

⁸ Aaĩ nyeemuut ꞌcĩ nga aꞌthuunnu niig lemiinit cĩ Makayyioohit Yeesu jurrung ko, hĩcĩ aaꞌnyeet ngagĩĩt haꞌnyakta rũgẽt ꞌcĩ ĩĩn ngeju.

⁹ Hanneeka occa hatĩ Nyekuc ĩlaallẽ hutuno, hĩnĩngĩtĩ taliinit ꞌcĩ aꞌnyahaakeetu niig ngagĩĩt muumaa cĩ Nyekuc cĩnaac ko?

¹⁰ Halaiinna naag waathĩn hĩ baalin hõdõõkõthĩ ꞌthinneetinii cĩggaang dĩdĩ, hátĩ haaꞌnyeet Nyekuci hommottio tarĩ, hátĩ hiita haanytuung ngagiit thooꞌthiok ꞌcĩg nga aitiõõ lemiittaa cunuung ĩcĩ Nyekuci.

¹¹ Nẽẽthĩ ꞌyioko, aꞌnyĩĩk nuun Nyekuc Baangeet cĩnaac hĩ Makayyioohit Yeesu Krĩstõ, hubbuktĩheet ꞌgõõl ꞌcĩ haau hacinnuung ngagiit hĩdĩĩkoothong.

¹² Aꞌnyĩĩk nuun Makayyioohit, hĩttõõr mĩnnan hõrggẽẽnaa cunuung, hĩ cĩ eet vẽlẽk hĩtĩlĩth hĩĩ maka gẽrrẽẽt, haau hĩcĩ hammĩnannuung naag ngagiita.

¹³ Halayyi naa haini, aꞌnyĩĩk ꞌthinneeti cugguung hokomit, hátĩ hĩĩtõ tẽllĩg muumaa cĩ Nyekuc Baangeet cĩnaac, kõr ꞌcĩ hatĩ akuuni Makayyioohiti cĩnaac Yeesu Krĩstõ, hĩ eet cĩgĩnnĩg vẽlẽk ꞌcĩg ẽllẽẽmĩthĩ.