1 Tẽꞌthaloonika 2 - ꞌBuuk cĩ Thõõth cĩ Nyekuci

Dtiic cĩ Paaulo ꞌtaaũnaa cĩ Tẽꞌthaloonika

¹ ꞌGotoonoga hĩ ngoonoga, baa agayyu niig aĩ, baa hõllõngaa hẽhẽẽrõnaakuung naag ngagiit haaga.

² Baa hippiirriawa naag nẽ hodoomtea ꞌtaaũnaa cĩ eet cĩg Pilippi, nẽẽthĩ, eliittaa cĩ Nyekuci, iita okomit ꞌthinneeti cĩggaang nẽ hillimattuung ngagiit nyeemuut cĩnnĩ ꞌcĩ abũnnaa, tananga baa abũrreet eeta ꞌcĩg mẽẽlĩg ngagĩĩta.

³ Hõllõngaa haaunna naag hallimannuung ngagiit, hátĩ hõmmõdattuung hode hallabtuung thõng.

⁴ Baa accamanoothĩk Nyekuci ngaatĩ aaꞌnyeet ngagĩĩt nyeemuut cĩnnĩ ꞌcĩ abũnnaa nẽ baa hõllõngaa hõthõõꞌtha naag, hátĩ haccamattoothĩk eeta, Nyekuc dioo ꞌcĩ aga thõõth cĩ ꞌthinneeti cĩggaang, ĩnõõnnõ ꞌcĩ hadiimma naag haccamanoothĩk.

⁵ Agayyu niig buúk nga hĩttĩmatta naag ngaatĩ hĩggõõlla eet umwa. Aga Nyekuci buúk ngaatĩ aitiõõnnĩ thõõth baa hadĩmanna naag, hõllõngaa ĩĩn ꞌgii ꞌcĩ hammũtta lõbõlõbẽẽꞌthĩt cĩnaang.

⁶ Baa hõllõngaa hadiimma naag dĩhĩthẽẽnĩt cĩ eetu nẽ hõllõngaa hadiimma hĩ ngagiit hode hĩ eet umwa. Nẽẽthĩ, hĩ ꞌthooyyiaha cĩg Krĩstõ, occa hinnia baa hau hajinnuung ngagiit eliinit.

⁷ Nẽ haaunna hinnia hĩĩgĩnna tarbalĩg hõrggẽẽnaa cunuung, haautta hĩ morwahit gõõng aꞌthũũnnĩ lõhõlĩ cĩgĩnnĩg ꞌcĩg kidicig.

⁸ Baa hammĩnannuung naag ngagiit gẽrrẽẽt nẽ haccamattoothĩha ngaatĩ haattiyyia jurrung, hõllõngaa hĩnĩngĩtĩ hõthõl nyeemuut ꞌcĩ abũnnaa cĩ Nyekuci hĩ ngagiit diooni, haccamanoothĩka hĩnĩngĩtĩ hõthõl rũgẽt cĩnaang buúk.

⁹ Nẽ dĩdĩ ꞌgotoonoga hĩ ngoonoga, occa nẽẽꞌthẽk ammuhooꞌthu pĩĩrnanĩt baa harayya naag dtiic ꞌcĩ õkõmĩ waathĩn hĩ baalin, hátĩ hiittiõõ hõllõngaa haꞌnyahaaka eet umwa heciinit nga hallimannuung nyeemuut ꞌcĩ abũnnaa cĩ Nyekuci.

¹⁰ Iiginnu niig vẽlẽk hĩ Nyekuc hẽbẽrĩ cĩggaang, ꞌcĩg agayyu ainnu, hĩĩgĩnna naag eet ꞌcĩg ẽllẽẽmĩthĩ nẽ tẽllĩg ꞌthinneeti, hiꞌthihi thõõth umwa ꞌcĩ abathĩ hĩ ngagiit lemmiook cĩg Makayyiooktak.

¹¹ Agayyu niig buúk ngaatĩ haꞌthuunnuung naag ngagiit hõdẽĩ hõdẽĩ jurrung, hĩgõõng aꞌthũũnnĩ nyakangaan hĩ morwahit lõhõlĩ cĩggĩĩng.

¹² Baa haduhaakuung naag ngagiit hanneekuung aaut jurrung nẽ hiittihuung ũnnẽẽc thõõth cĩ Nyekuci, hĩ ngaatĩ hamammaayannuung ngagiit aaut ꞌgõõlaa ꞌcĩ accamana Nyekuci, hĩnĩngĩtĩ ĩnõõnnõ ꞌcĩ ẽbẽraannuung ngagiit aĩ iita otholit hĩ ĩnõõnnõ bulẽẽnĩt cĩ habuccieet cĩ õlõ cĩnnĩ.

¹³ Hanneeka naag Nyekuc hõdõõkõthĩ ĩlaallẽ, hĩnĩngĩtĩ elemtu niig thõõth cĩnnĩ baa hallimannuung naaga. Baa aku thõõth ciee hĩ ĩnõõnnõ nẽ baa hõllõngaa aku thõõth ciee hĩ eet cĩ holli õõ haaga. Nẽẽthĩ ꞌyioko, hĩ baa elemtu niig thõõth cĩnnĩ ho, idticanõõ nẽẽ hĩ ngagiit ꞌcĩg iiginnu lothippit cĩ lemmiook cĩgĩnnĩg.

¹⁴ Nẽẽthĩ hoti ho, ꞌgotoonoga hĩ ngoonoga, baa accanattuung ngagiit eeta cĩg looc cunuung ẽmmẽn. ꞌGõõlaa cĩ, ĩyahiꞌthu niig lothippiꞌnya cĩg lemmiook cĩg Nyekuci looccaa cĩ ꞌJudeea, baag accanan ꞌJudeei cĩggĩĩng ẽmmẽn, hĩnĩngĩtĩ ẽlẽmĩ nẽẽg Yeesu Krĩstõ.

¹⁵ ꞌJudeei tĩko baag aruk Makayyioohit Yeesu hĩ põrõvẽtaaꞌnya nẽ itiggiayyieeheet ngagĩĩt buúk mõrõ. Aitiõõ thooꞌthioha cĩggĩĩng ko, hõllõngaa aaꞌnyĩk Nyekuc haccamanoothĩk nẽ tarĩ, iitiõõ ẽẽtĩ ꞌcĩ ẽlẽmĩ thõõth cĩnĩĩng ko tõõ.

¹⁶ Alaammeet nẽẽg ngagĩĩt ngaatĩ hallimaneeka eet ꞌcĩg hõllõngaa ĩĩn ꞌJudeei thõõth cĩ Krĩstõ, hátĩ heellia nẽẽgĩ. Nẽ ꞌgõõlaa cĩ, aalla eeta cĩg ꞌJudeei ꞌcĩg hõllõngaa ĩĩn lemmiook cĩg Yeesu, ittoorothi ꞌthẽccanẽẽt cĩggĩĩng noho. Nĩngĩtĩ hatĩ aku alĩĩlĩkĩ Nyekuci ĩhõõggõ uruta.

Õkõ acĩn Paaulo lemmiook cĩg Tẽꞌthaloonika

¹⁷ ꞌGotoonoga hĩ ngoonoga, baa nõõ heꞌngerrio naag hĩ ngagiit hĩdĩhĩdĩĩc. Nẽẽthĩ hinnia, nga hatarrioꞌthuung naag ngagiit ꞌthinneetinii cĩggaang. Hammuka gẽrrẽẽt ꞌgõõl ꞌcĩ haau hacinnuung ngagiit tarĩ, ĩnõõ ꞌcĩ hattĩmanna gẽrrẽẽt ꞌgõõl ꞌcĩ hõbõdaanna ho.

¹⁸ Baa hadiimma ngaatĩ haau hacinnuung dĩdĩ nẽ baa hattĩmani naa Paaulo dẽẽdẽ tabattĩ hiriiri ngaatĩ hakuuni, alaammeet hinnia ngagĩĩt ꞌThĩttaanĩ ngaatĩ hauunna.

¹⁹ Ma uppwaanna Makayyioohiti Yeesu, ngagiit hatĩ dioo ꞌcĩg aaꞌnyeetu ngagĩĩt muhẽẽnĩt ꞌcĩ abũnnaa hĩ taliinit nẽ aauttu hĩ bulẽẽnĩtĩ cĩnaang.

²⁰ Eei, ngagiit dioo ꞌcĩg aaꞌnyeetu hirriatta bulẽẽtta nẽ haccamattoothĩha.