1 Pẽẽtũrũ 5 - ꞌBuuk cĩ Thõõth cĩ Nyekuci

Tilooinit hĩ makayyiook hĩ nyahaappanĩta

¹ Nẽ ꞌyioko, haꞌnyahi thõõth ꞌcĩ hadiim haduhaakuung ngagiit makayyiook cĩg lothippit cĩ lemmioohu. Hĩĩnĩ naa buúk makayyioohit nẽ hĩĩna hebereec cĩ ꞌcannan cĩ Krĩstõ nẽ hõthõlla hatĩ naag buúk hĩ ĩnõõnnõ bulẽẽnĩt cĩnnĩ, hatĩ ikia õbõda nẽẽ loota nĩnga. Halayyuung ngagiit hĩ makayyioohiti ꞌcĩ haduhõõ hĩ ngagiit thõng.

² Ũtũhaac eet ꞌcĩg aaꞌnyuung Nyekuci ngagiita. Idticattoothĩk ĩhõõggõ jurrung, hõllõngaa hĩnĩngĩtĩ attĩnganoothikuung thõng, nẽẽthĩ, hĩnĩngĩtĩ accamanaannu ngaatĩ adticanoothiku Nyekuc, hõllõngaa hĩnĩngĩtĩ hátĩ ummuddia ꞌrabbẽẽta.

³ Ma harratannu eet ꞌcĩg aggammu niiga, nẽẽthĩ, etereꞌthieek ĩhõõggõ hillimatta thõõth ꞌcĩ abũnnaa hĩ ngagiita.

⁴ Ma õbõda Krĩstõ tũhayyioohiti ꞌcĩ ĩĩn habu, ammũdaanu hatĩ dũman cĩ bulẽẽnĩt ꞌcĩ hõllõngaa edecciaa ũdũt.

⁵ ꞌGõõlaa ꞌcĩ aaĩ hoti, niig nyahaappanĩta, itingolli eet ꞌcĩg ĩĩtõ makatĩg hĩ ngagiita, ĩthĩhĩt thõõth cĩnĩĩng. Nẽ idticattoothĩk niig vẽlẽk ꞌgoonogu ꞌthĩnneetinii ꞌcĩg tarbalĩg, hĩnĩngĩtĩ, “Abũrĩ Nyekuci eet ꞌcĩg athĩngõõnyanĩ nẽẽthĩ, aaꞌnyĩk nẽẽ eet ꞌcĩg hõllõngaa athĩngõõnyan bũnnai.”

⁶ Ĩĩtõ tarbalĩg muumaa cĩ Nyekuc ꞌcĩ aꞌnyak makaaꞌthĩt ꞌcĩ ĩllõõan vẽlẽk, hátĩ hodonguung nẽẽ kõr ꞌcĩ adiim nẽẽnĩ.

⁷ Aanytĩk puppudi cunuung vẽlẽk Nyekuc, hĩnĩngĩtĩ ĩnõõnnõ ꞌcĩ aꞌthuunnuung ngagiita.

⁸ Uꞌthuutti eleeti nẽ aauttu dĩkĩĩm. Awanĩt mirohiti cunuung habuui cĩ loriẽẽt ꞌcĩg abathĩ looc hĩ ꞌmaa ꞌcĩ arruuk adiim eet ꞌcĩ aruhi.

⁹ Aꞌnyamanit ĩnõõnnõ nẽ okomtu lemiittaa cunuung, hĩnĩngĩtĩ agayyu niig ngaatĩ accananiini lemmiooha ũgẽẽgĩ buúk looc nicci vẽlẽk hĩ ꞌyioko niig ko.

¹⁰ Tarbalꞌthẽẽtaa cĩnnĩ, baa ũtũvvaauung ngagiit Nyekuci, hátĩ otholit bulẽẽnĩt cĩnnĩ ꞌcĩ aalla ũdũt, hĩnĩngĩtĩ Yeesu Krĩstõ. Nẽẽthĩ, urutaa ꞌcĩ accanatteeu hĩdĩhĩdĩĩc, ẽẽlannuung hatĩ nẽẽ ngagiit nẽ aaꞌnyuung okomit lemiittaa cunuung.

¹¹ Aꞌnyĩĩk haau ꞌtirrianĩ hĩ ĩnõõnnõ irkiꞌnyia hĩ irkiꞌnyia. Aamẽn.

ꞌThaainit ꞌcĩ adtuurna

¹² Ẽẽlla ꞌThĩĩla nganĩĩt hẽtẽhẽẽdahuung waraga icci huturi ho, ĩĩn nẽẽ nuyyioohit ꞌcĩ aꞌthũũnnĩ thõõth cĩ Makayyiookto jurrung. Hadiimi hakũtannuung nẽ huduhaahuung ꞌgõõl ꞌcĩ ĩĩnnĩ Nyekuci tarbal dĩdĩ, hátĩ aallattia aꞌnyahit lemiinit hĩ ĩnõõnnõ.

¹³ Ĩꞌthaayyuung nuyyiooha ꞌcĩg Makayyiooktak ꞌcĩg aattĩg Babiloonnia. Ĩĩn nẽẽg eet ꞌcĩg ẽbẽra Nyekuci. Nẽ ĩꞌthaayyuung Maarko ꞌcĩ aaĩ hĩ loholeec caannĩ buúk ngagiita.

¹⁴ Ĩꞌthaayyio gẽrrẽẽt mĩnnaniitta. Aꞌnyĩĩk ganõn haau hĩ ngagiit vẽlẽk ꞌcĩg ĩĩgĩnnu eet cĩg Krĩstõ.