1 Pẽẽtũrũ 4 - ꞌBuuk cĩ Thõõth cĩ Nyekuci

ꞌGõõl ꞌcĩ hathĩknĩ Nyekuc

¹ Nẽẽthĩ hoti ho, hĩ baa accananni Krĩstõ loota nĩnga, adiim akũmanoothiku, hátĩ agaac ngaatĩ hatĩ accananiinnu niig buúk hĩ baa nẽẽnĩ. Hĩnĩngĩtĩ ẽtẽrꞌtha ꞌcannani ngaatĩ ũtũngteehu niig ꞌthẽccan.

² Ẽtẽrꞌtha thõõth ciee aĩ ũtũngteehu niig hẽlẽggĩ ꞌcĩg ĩĩdĩ ꞌthinneeti cugguung nẽ idiimtu ithiktu thõõth cĩ Nyekuci rũgẽtaa cunuung vẽlẽk.

³ Baa unuuktihu niig ngaatĩ aattiyyu hĩ eeta ꞌcĩg hõllõngaa aga Nyekuc. Baa iiginnu niig ꞌthẽccanniook nẽ unuyyu thooꞌthiok ꞌcĩg abathĩ ꞌcĩg abũraneeku niiga. Baa adaku karramẽẽt ꞌcĩg adĩmannu thooꞌthiok ꞌcĩg ĩĩn ꞌriiring nẽ tarĩ, uhuddieeu ũdũũtĩt tahatak. Nẽ dĩdĩ, alayyu hẽlẽggĩ ꞌcĩg aar eeta hĩĩtõ nyekuꞌnya nẽ iittiõõ hõllõngaa aꞌngaonnu buúk.

⁴ Nẽ ꞌyioko, ukullieek ꞌgoonogu baag gõõng ookorru ꞌjieen, hĩnĩngĩtĩ iittiõõ hõllõngaa ookorru niig hĩ ĩhõõggõ, ngaatĩ adĩmannu thooꞌthiok ꞌcĩg abathĩ nẽ odoomtuung nẽẽg ngagiit, hĩnĩngĩtĩ thooꞌthiok iccig.

⁵ Nẽẽthĩ, attacan hatĩ nẽẽg Nyekuc ꞌcĩ aga ngaatĩ ẽttẽẽdĩ thõõth cĩ eet ꞌcĩg arũgĩ hĩ ꞌcĩg adaahito.

⁶ Baa illimanoothĩk nyeemuut ꞌcĩ abũnnaa eet ꞌcĩg adaahito, hátĩ má etteedoothĩk ĩhõõggõ thõõth, hĩnĩngĩtĩ thooꞌthiok ꞌcĩg baag ĩdĩmanit nẽẽg rũgẽtaa cĩ, arũmĩ hatĩ loriẽẽta cĩggĩĩng hĩ Nyekuc.

⁷ Õbõhĩ decciaanĩtĩ cĩ lootu. Nẽẽthĩ hoti ho, uꞌthuutti eleeti nẽ ĩrrĩcattaau laiinit jurrung.

⁸ Hĩllõõan vẽlẽk, ĩmmĩnattõ gẽrrẽẽt, hĩnĩngĩtĩ ũũny mĩnnanĩ ꞌthẽccanẽẽt ꞌcĩg mẽẽlĩg ꞌrĩng.

⁹ Aanytĩk hẽẽrõn ꞌcĩg au olooyyiohĩĩ cugguung, nĩngĩtĩ ũꞌnyaahu hĩ ꞌgẽẽn ꞌcĩ adahĩ nẽ ma hongoongoeeku ĩhõõggõ.

¹⁰ Aꞌnyĩĩk eet hõdẽĩ hõdẽĩ hidticattõõĩ ꞌbaaninit ꞌcĩ baa aaꞌnyĩk Nyekuci ĩhõõggõ heelli ꞌgõõnõgĩ. Idticattõõĩ bũnnai cĩ Nyekuci ꞌcĩ maka gẽrrẽẽt ꞌgõõlaa ꞌcĩ abũnnaa.

¹¹ Má aꞌnyahi ꞌbaaninit ꞌcĩ õthõõthĩ, duhaak eet thõõth cĩ Nyekuci. Má aꞌnyahi ꞌbaaninit ꞌcĩ ẽẽlĩ eeta, dticcian ꞌthẽk noho ꞌtirriaanaa ĩbaa aaꞌnyi Nyekuci. Adiim occa adticanni hẽlẽggĩ vẽlẽk ꞌgõõlaa ꞌcĩ occa aꞌnyahaakĩ Nyekuc bulẽẽnĩt, hĩnĩngĩtĩ Yeesu Krĩstõ ꞌcĩ abuli nẽ ittiran irkiꞌnyia hĩ irkiꞌnyia. Aamẽn.

ꞌCannan cĩ lemiitto

¹² ꞌGotoonoga hĩ ngoonoga, ma hakuleeku ꞌjieen hode ma habarrittu hatĩ attĩmaniinnu ꞌgõõlaa ꞌcĩ abathĩ, haau hĩcĩ adhukiaakuung daahĩthĩ.

¹³ Accamattoothĩk ngaatĩ accananiinnu hĩ baa Krĩstõ. Akũmaneekuung hatĩ ꞌcannani ciee ngagiit umuddia taliinit ꞌcĩ maka, hatĩ õbõda nẽẽ bulẽẽttaa cĩnnĩ.

¹⁴ Nẽẽthĩ hoti ho, accamattoothĩk hatĩ odoommuung eeta, hĩnĩngĩtĩ ĩĩgĩnnu Lemmiook, hĩnĩngĩtĩ aaĩ bulẽẽnĩtĩ cĩ Lori cĩ Nyekuci hĩ ngagiita.

¹⁵ Má accananiinnu niiga, occa hõllõngaa accananiinnu hĩnĩngĩtĩ aruku eet, hode hĩnĩngĩtĩ ĩgõr, hode hĩnĩngĩtĩ ĩkõõthannu thooꞌthiok ꞌcĩg abathĩ, hode aduknoothĩku thooꞌthiok cĩg eet ũgĩ.

¹⁶ Nẽẽthĩ, aitiõõ hõllõngaa ĩĩn ngaaoni hatĩ accananiinnu niig, hĩnĩngĩtĩ iiginnu Kristiaanĩta. Ĩdĩhĩthĩt Nyekuc, hĩnĩngĩtĩ iiginnu eet cĩgĩnnĩg.

¹⁷ Iꞌthianaaĩ Nyekuci ẽttẽẽd thooꞌthiok cĩg eet cĩgĩnnĩg ẽlẽk. Má iꞌthianaanĩ hĩ ngagĩĩt, aaĩ occa hinnia hatĩ hĩ eet ꞌcĩg abũrĩ nyeemuut cĩnnĩ ꞌcĩ abũnnaa hutuno?

¹⁸ Eheeddi ꞌBuuhaa cĩ Nyekuci aĩ nẽẽ, “Má õkõmĩ hĩ eet ꞌcĩg abũnnaa ngaatĩ eellianĩ, aaĩ occa hinnia hatĩ hutuno hĩ eet ꞌcĩg hõllõngaa iꞌngolli Nyekuc hĩ ꞌthẽccanniook?”

¹⁹ Nẽẽthĩ hoti ho, má accananniinnu niig ꞌgõõlaa ꞌcĩ aaꞌnyĩk Nyekuc haccamanoothĩk, aallattia ĩdĩmanit thooꞌthiok ꞌcĩg aũlan nẽ akattu Nyekuc baa ẽhẽnytaannuung hẽbẽrĩ rũgẽtaa cunuung, hĩnĩngĩtĩ aitiõõ hatĩ nẽẽ hõllõngaa ũũnnikuunga.