1 Pẽẽtũrũ 3 - ꞌBuuk cĩ Thõõth cĩ Nyekuci

Ngaaĩ hĩ maaccwa

¹ Nẽẽthĩ, má ĩĩnĩ ngaa cĩ eeto, adiim athihi thõõth cĩ maac cunni. Tananga abũrĩ nẽẽ nyeemuut cĩnaang, aaꞌnyihi hatĩ nii ĩnõõnnõ hikia hĩĩ lemmioohit ꞌgõõlaa ꞌcĩ adĩmanĩĩ thooꞌthiok ꞌcĩg abũnnaa. Iittiõõ hatĩ eet umwaa ꞌcĩ occa aduhaak ĩnõõnnõ thõõth ꞌcĩ aku ĩĩnnĩ nẽẽ Lemmioohit tõõ,

² hĩnĩngĩtĩ acĩn hatĩ nẽẽ ꞌgõõl ꞌcĩ adĩkꞌthĩ nii Nyekuc nẽ aau ꞌgõõlaa ꞌcĩ aũlanĩ.

³ Ma haallaku ꞌlẽẽmĩth ꞌcĩ aaĩ hĩcĩ ĩma ꞌcĩg ẽhẽnytĩ helleemito, hode ngaatĩ ahimittu hẽbbẽẽn cĩg ꞌrianĩĩthak ꞌcĩg ĩĩn ꞌdaab, hode ceremwa ꞌcĩg uuttiaa ꞌrabbẽẽtĩĩ ꞌcĩg mẽẽlĩg ĩcĩg aaꞌnyuung elleemit.

⁴ Aꞌnyĩĩk ꞌlẽẽmĩth ꞌcĩ aku ꞌthinneetinii cugguung haaꞌnyuung ngagiit aaut lõꞌngõõc nẽ iittu tarbalĩg. Ĩĩn ciee ꞌlẽẽmĩth ꞌcĩ aalla ĩꞌthõng nẽ accamana Nyekuci gẽrrẽẽt.

⁵ Baa gõõng ꞌgõõl ꞌcĩ aattiyyi ngaaĩ ꞌcĩg ala Nyekuc nẽ aarrik ꞌthinneeti cĩggĩĩng hĩ ĩnõõnnõ cieeni, baa aaꞌnyĩk nẽẽg eleeti cĩggĩĩng helleemito ꞌgõõlaa ꞌcĩ athĩknĩ maaccwa cĩggĩĩng.

⁶ Baa athĩhĩ Thaara Abũrahaamõ nẽ ũtũvvũ ĩnõõnnõ ĩnnĩk makayyioohit cĩnnĩ. Iiginnu niig lõhõlĩ cĩgĩnnĩg dĩdĩ, hatĩ adĩmannu thõõth ꞌcĩ aũlanĩ nẽ hõllõngaa iꞌngoliinnu thõõth umwa.

⁷ Nẽ niig maaccwaana ꞌgõõlaa ꞌcĩ aduhõõ thõng, ũrũmtĩ hĩ ngaaĩ cugguung jurrung, itingolli ĩhõõggõ hĩ ꞌgoonogu ꞌcĩg hõllõngaa attiran haauto hĩ niiga, hĩcĩ othollu ꞌbaaninit cĩ rũgẽt ꞌcĩ ĩĩn ngeju, ĩdĩmanit ĩhõõggõ jurrung, hátĩ hiittiõõ ꞌgii ꞌcĩ occa alaam laiinit cunuung tõõ.

ꞌCannan hĩnĩngĩtĩ thõõth ꞌcĩ abũnnaa

⁸ Dtuurnatta, aaut niig vẽlẽk hõdẽĩ lõꞌngõõc, ĩĩtõ tarbalĩg nẽ atamaattik ꞌgoonogu buúk, ĩmmĩnanit ꞌgotoonogu hĩ ngoonogu nẽ ma hathĩngõõnyannu.

⁹ Ma haruhaannu oolo thooꞌthiohĩĩ ꞌcĩg abathĩ, hode ma hodommu ꞌgoonogu ꞌcĩg odoommuung ngagiita. Nẽẽthĩ hinnianĩ, aggatanit eet ꞌcĩg odoommuung thõng. Thõõth baa avvaannuung Nyekuci ngagiit ĩdĩmanit cieeni nẽ aggatannuung hatĩ nẽẽ, hĩnĩngĩtĩ thõõth icci.

¹⁰ Hĩnĩngĩtĩ aduha ꞌBuuhi cĩ Nyekuci aĩ, “Ammĩnannu ꞌthẽk niig rũgẽt dĩdĩ? Adiimmu ꞌthẽk niig accamanoothiku? Ma thĩ nga hothooꞌthu thooꞌthiok ꞌcĩg abathĩ nẽ ma nga hothooꞌthu thooꞌthiok ꞌcĩg ĩĩn õlõng.

¹¹ Adiim uunniku thooꞌthiok ꞌcĩg ĩĩn ꞌriiring nẽ ĩdĩmattu thooꞌthiok ꞌcĩg abũnnaa; hĩcĩ adiimmu nẽ unuyyu ꞌgõõl ꞌcĩ ammũdaannu ganõn.

¹² Hĩnĩngĩtĩ ẽbẽk Makayyioohiti eet ꞌcĩg abũnnaa nẽ ĩthĩk laiinit cĩnĩĩng, abũrĩ Makayyioohiti eet ꞌcĩg adĩman thooꞌthiok ꞌcĩg abathĩ.”

¹³ Nganĩ ꞌcĩ occa adĩmannuung ngagiit ꞌbuth hatĩ abũraneeku ngaatĩ adĩmannu thõõth ꞌcĩ abũnnaa?

¹⁴ Nẽẽthĩ, má occa accananiinnu niig, hĩnĩngĩtĩ adĩmannu thõõth ꞌcĩ abũnnaa, adũmannuung hatĩ Nyekuci, hĩnĩngĩtĩ thõõth tĩho. “Ma hapuppuddu hode hiꞌngollinnu thooꞌthiok ꞌcĩg occa adĩmaneekuung nẽẽg ngagiita.”

¹⁵ Itingolli Krĩstõ nẽ aanytĩhu hĩĩ Makayyioohit rũgẽtaa cunuung. Má ajinnuung eet umwaa thõõth cĩ lemiinit cunuung, ũkũmattoothĩk hõdõõkõthĩ, hátĩ attacanit, nẽẽthĩ, ĩdĩmanit thõõth icci tarbalꞌthẽẽta hĩ ngaatĩ iꞌngoliinnu ĩnõõnnõ.

¹⁶ Attacanit ĩhõõggõ ꞌthinneetinii ꞌcĩg alalĩ nẽ aanytĩk muhẽẽnĩt cĩ ꞌthinneeti cugguung hĩĩ tẽlla. Má othooꞌthuung eeta ꞌbuth, aggam hatĩ ĩhõõggõ ngaaoni hatĩ acĩn rũgẽt cunuung ꞌcĩ abũnnaa, hĩnĩngĩtĩ iiginnu niig cĩg Krĩstõ.

¹⁷ Mẽẽn ngaatĩ accananiinnu, hĩnĩngĩtĩ adĩmannu thõõth ꞌcĩ abũnnaa, hatĩ adiim Nyekuci haau noho, hĩllõõan ngaatĩ accananiinnu, hĩnĩngĩtĩ adĩmannu thõõth ꞌcĩ abathĩ.

¹⁸ Hĩnĩngĩtĩ baa adaahĩ Krĩstõ tabattĩ hõdẽẽthõng, hĩnĩngĩtĩ ꞌthẽccanẽẽt cĩggaac. Baa nga hẽꞌthẽcan nẽẽ thõõth umwa ũdũt, nẽẽthĩ, baa adaahĩ nẽẽ, hĩnĩngĩtĩ ꞌthẽccanniook, hátĩ huukuung ngagiit hĩ Nyekuc. Baa aruhi nẽẽ hadaak, nĩngĩtĩ aaꞌnyĩkĩ Nyekuci ĩnõõnnõ hũrũga Loriia.

¹⁹ Ma ho, aaꞌnyĩk Nyekuci Krĩstõ hũũk hirrioonĩk loriẽẽt ꞌcĩg aattĩg baabuutha,

²⁰ loriẽẽt cĩg eet baag hõllõngaa athĩhĩ Nyekuc baangaani, baa ẽrẽ Nyekuci hũtũngteek ꞌthẽccanẽẽt cĩggĩĩng waathinnioohĩĩ baag nga ẽhẽnytĩ Nõõa haahũl thõng. Baa eet turkiyyio thõng, ꞌcĩg baag eelliaa tawaanaa ĩbaa maka gẽrrẽẽt.

²¹ Ĩthakꞌthoothĩk maama cĩg tawaanak ko, baattithimo ꞌcĩ ꞌyioko ẽẽlannuung ngagiit ko. Nẽẽthĩ, ĩllõõan baattithimo tũũnyẽnĩt cĩ ꞌriiring cĩg ẽllaak. Ĩĩn baattithimo ꞌgõõl ꞌcĩ õbõdaanĩ eeta hĩ Nyekuc ꞌthinneetinii ꞌcĩg abũnnaa, hĩnĩngĩtĩ baa ũrũga Yeesu Krĩstõ daahĩtha.

²² Nẽẽthĩ ꞌyioko, ũũk Krĩstõ hẽẽtahujjieen. Iccioloongan nẽẽ ꞌyioko bulẽẽtta attiaa cobbi ĩcĩ Nyekuci nẽ ẽlẽmĩ aajĩlẽẽta hĩ makayyiook hĩ makaaꞌthĩt vẽlẽk cĩ hẽẽtkujjieen, ngaatĩ ĩĩnnĩ nẽẽ Makayyioohit cĩnĩĩng.