Zekaria 8 - KITAWO MALEŊ

Rwoth ciko dwoko Yerusalem

¹ Wac pa Rwoth pa lwak jolweny obino ran ka waco ama:

² Rwoth pa Lak Jolweny waco ama: Amako nyeko ri Zayon gi nyeko madwoŋ, aka gi keme madwoŋ, amako nyeko rigo.

³ Me apaka Rwoth waco: Aladwoko i Zayon, aka alabedo i Yerusalem; Ilalwoŋo Yerusalem ni tindi madwoŋ ma genere, aka got pa Rwoth pa lwak jolweny, ilalwoŋo ni, got maleŋ.

⁴ Rwoth pa lwak jolweny waco ama: Jodongo kodi mondongo m'oti jolabedo kam'othangere kendo i Yerusalem, kisi dhano gi luth pere i cinge ma ndelo ma tegino.

⁵ Aka yac kodi nyir jolapoŋ tuko kam'othangere ma tindi madwoŋ.

⁶ Rwoth pa lwak jolweny waco ama: K'obedo gimatek ruwaŋ ji me ma joboth i ndelo me je, bende obedi gimatek ruwaŋan, Rwoth pa lwak jolweny penjo?

⁷ Rwoth pa lwak jolweny waco ama: Neni, acegin botho ji paran wok i piny ma yuwok ceŋ kodi wok i piny ma yupodho ceŋ;

⁸ alakelo jo bedo i Yerusalem, jolabedo ji paran, aka alabedo Were pajo, iy'adieri kodi i tiro.

⁹ Rwoth pa lwak jolweny waco ama: Weyi cingi win wobedi matek, win ma wiwinjo wac m'owok i dhok jotuci wac Were i ndelo me je, wok cuka i ndelo m'ocak'iye misingi ma Ot pa Rwoth pa lwak jolweny, ŋey wonyali geto kendo Ot pa Were.

¹⁰ Kole mafodi ndelo no je, cul pa dhano kosa ogwaŋ oyido ongoye, aka siem oyido ongoye ri ŋata kadho woko, kosa ri ŋata donjo. Kole awiro kisi dhano kwoŋ nyawote.

¹¹ To pama akilatiyo gi joma joboth kwoŋ ji me paka i ndelo macon je, Rwoth pa lwak jolweny waco.

¹² Kole ilacwoyo kodhi ma siem; vini lanyak olemo mere, lowo lanywolo ranyak, polo lamiyo thoyo pajo, aka alamiyo joma joboth kwoŋ ji me lunjo gigipiny me je.

¹³ Aka paka oyido wibedo lam i dier nonin, Awi ot pa Yuda kodi ot pa Isiraili, ameno alabotho win aka wilabedo silwany. Wikiri wibwoki, to weyi cingi win wobedi matek.

¹⁴ Kole Rwoth pa lwak jolweny waco ama: Paka acano timo riwin raco, munyo jokwinyo keme paran, aka akiwiro paro paran, Rwoth pa lwak jolweny waco;

¹⁵ ameno awiro can paran i ndelo me je timo bero ri Yerusalem kodi ot pa Yuda; wikiri wibwoki.

¹⁶ Me a gigipiny ma wiripo timo, luwo adieri kisi dhano ri nyawote, thum win banja mar'adieri aka siem wobedi i waŋkace mewin.

¹⁷ Wongoye ŋata wobedi gi can marac i cunye ri nyawote, ongoye maro kwoŋirok ma nono, kole adaki twodo, ngoye pa tiro kodi akaka, Rwoth pa lwak jolweny waco.

¹⁸ Wac pa Rwoth pa lwak jolweny obino ran ka waco ama:

¹⁹ Rwoth pa lwak jolweny waco ama: Riyo kec ma dwe mar'aŋwen, ma dwe mar'abic, ma dwe mar'abirio kodi ma dwe mar'apar, lalokere ri ot pa Yuda kisangala kodi kalima m'oyik, bero, adieri, siem, kodi mar.

²⁰ Rwoth pa lwak jolweny waco ama: Ji ma tindin madongo kweth jolabino kendo;

²¹ ji ma tindi madwoŋ acel jolakidho bongi man ka jowaco ni, “Weyi wakadhi piyo kwayo ruwaŋ Rwoth, kodi rango Rwoth pa lwak jolweny: An bende alakidho.”

²² Ji kweth kodi nonin matek jolabino rango Rwoth pa lwak jolweny i Yerusalem, kodi kwayo ruwaŋ Rwoth.

²³ Rwoth pa lwak jolweny waco ama: I ndelo no je, cwo apar wok i dhodhok kweth ma nonin jolamako rinda pa Jayuda ka jowaco ni, “Weyi wakadhi kodin, kole watieko winjo nike Were nitie kodin.”