Zekaria 6 - KITAWO MALEŊ

Menyirok ma cawilin aŋwen

¹ Awire t'atiŋo waŋan malo, aŋiyo, aka neni, cawilin aŋwen jowok i dier gote ario, aka gote me oyido obedo ma ywel.

² Cawila marapena oyido nitie gi kayinin m'obokere, aka mar'ario oyido nitie gi kayinin macol.

³ Cawila mar'adek oyido nitie gi kayinin matar, aka cawila mar'aŋwen oyido nitie gi kayinin makicin manyakwoyokwoyo, ma jotek.

⁴ Apenjo malaika m'oyido luwo kodan ni, “Me ginaŋo rwoth?”

⁵ Malaika odwoko to waco ran ni, “Me koyin aŋwen ma polo, ma jowok nyaka ruwaŋ Rwoth ma piny gibe.

⁶ Cawila manitie gi kayinin macol kadho i piny ma yumalo, aka manitie gi kayinin matar oluwo jo; cawila manitie gi kayinin makicin manyakwoyokwoyo okadho i piny ma yupiny.”

⁷ Kayinin matek jowok, aka jodwaro kadho woth thoko piny. Malaika owaco ni, “Kadhi wiwoth thoko piny.” To jowotho thoko piny.

⁸ Kenyo go oywakere ran ka waco ni, “Neni, jono ma jokadho i piny ma yumalo jomiyo Cunyan kwe i piny ma yumalo.”

Or ma ruko ri Yosuwa sangaria

⁹ Wac pa Rwoth obino ran ka waco ni,

¹⁰ “Kwany mic wok kwoŋ jotwec, Heldai, Tobia, kodi Yedaya, ma jotieko tundo wok i Babilon, aka ikadhi i ndelo no won, i ot pa Yosia wod Zefania.

¹¹ Kwany bongi jo feza gi zahabu, itimi sangaria aka ikethi i wi Yosuwa, wod Yehozadak jadwoŋ pa jocway ri Were i wi migam.

¹² Iwaci rigo ni, Rwoth pa lwak jolweny waco ni, ‘Neni, jal ma nyinge obedo Jangi yath; kole go ladongo i kabedo pere to geto Ot pa Rwoth.’

¹³ Go ama lageto Ot pa Rwoth, go latiŋo dwoŋ, go labedo to dhumo i kom ma dhum pere, go labedo jacway ri Were i wi migam i kom ma dhum pere, aka rieko ma siem labedo i dier j'ario.

¹⁴ Sangarin labedo paka rapoy i Ot pa Rwoth ri Heldai, Tobia, Yedaya, kodi Yosia wod Zefania.”

¹⁵ “Ji ma jonitie bor jolabino geto Ot pa Rwoth, aka wilaŋeyo nike Rwoth pa lwak jolweny ooran bongi win. Gime latundo i kare, ka winowinji gi gwokirok, dwondi Rwoth Were mewin.”