Zabuli 79 - KITAWO MALEŊ

Kwayo ri both ma piny

¹ Awi Were, nonin jotieko bino iy'alunja perin; jotieko koco ot perin maleŋ; jotieko thango Yerusalem i gunda.

² Jotieko miyo delkwoŋ ŋecin perin ri winyin ma koyo acama, riŋo pa jogenirok perin ri ogwaŋe ma piny.

³ Jotieko oyo remo pajo paka pi, i Yerusalem parom, to ngoye ŋat'oyiki jo.

⁴ Watieko lokirok gi nyero pa joger mawan, jonyero wan to jotero wan pa gim'ongoye kony.

⁵ Awi Rwoth, inomaki nge gi wan cil gi cil? Keme ma nge perin omedere liel paka mac?

⁶ Konji nge perin kwoŋ nonin ma jokuya in gi kwoŋ kerin ma jokilamin.

⁷ Kole jotieko cuto woko Yakobo, to jothango kabedo pere,

⁸ Ikir'imiy wan gir'acula ro reco pa kwarere mawan; weyi wor perin wobin piyo romo gi wan, kole odwoki wan piny tektek.

⁹ Kony wan, Awi Were ma jaboth mawan, ro dwoŋ ma nyingin; gony wan aka icwaki reco mawan, ro dwoŋ ma nyingin.

¹⁰ Raŋo nonin jowopenji ni, “Nikune Were pajo?” Weyi wanen k'imiyo gir'acula ri nonin ro oyo remo pa ŋecin perin.

¹¹ Weyi ywak pa ji ma jonitie i twec wotundi bongin. Gi meni perin madwoŋ gony jono, m'otiek thumo rijo banja ma tho.

¹² Awi Rwoth, cul nonin man ca dibirio ro yet ma joyetin gine.

¹³ Nyaka wan ji perin, mwendi m'ibedo jakwath pajo, walafoyin cil gi cil; to wapakin i luse je.