Zabuli 76 - KITAWO MALEŊ

Were jaloyo

¹ Were oŋeyere i Yuda, nyingi go dwoŋ i Isiraili.

² Go nigi peco pere i Yerusalem, go bedo i got Zayon.

³ Kenyo go turo aserin ma nyweny, kwot, abor, gi gilweny.

⁴ Idwoŋ, inigi meni, loyo gote cil gi cil.

⁵ Jolweny pajo ma jomiseni, omay jo kisi gimoro je m'oyido jonigine, aka onyo pama jopodho m'otho; meni pajo gi ndijo pajo oyido ongoye kony.

⁶ Munyo itisa jo, Awi Were pa Yakobo, kayinin pajo gi joma gweyo jopodho to jotho.

⁷ To in, Rwoth, ji je jolworin, ongoye ŋata nyalo cungo ruwaŋin ka nge omakin.

⁸ Ithumo banja wok i polo; lworo omako piny to liŋ nisi,

⁹ munyo Were oay ma thumo banja, ma botho jom'odiy piny je ma i piny.

¹⁰ Adieri, kiri keme pa dhano, timo nyaka tic ma pakin. Jono ma joboth wok i lweny, jolatimo kalima perin.

¹¹ Tim cikirok perin ri Rwoth Were perin, t'itimo jo; weyi nonin m'othoko go je, jowokeli mic rigo ma ripo wolwor.

¹² Go ama mwolo jodhum, go ama kelo lworo kwoŋ kerin ma i piny.