Zabuli 74 - KITAWO MALEŊ

Kwayo ma botho piny

¹ Awi Were, raŋo ijwango wan ama cil gi cil? Raŋo nge perin oliel kwoŋ rombo m'ipidho?

² Poyi ji perin, m'iyero ri in won wok con, m'itieko botho ni jowobedi nono perin alunja! Poyi got Zayon, kam'itieko bed'iye.

³ Woth i wi gundin makicutho me, jokwor mawan jotieko reyo gimoro je i Ot pa Were!

⁴ Jokwor perin jotieko kihola i dier Ot perin; jojengo bendera pajo kenyo pa ranyuth ma turo lweny.

⁵ Jocale gi jobar yen, ma jotoŋo piny yen gi le pajo.

⁶ Aka nyaka yen mere m'oban je joŋinyo piny gi le kodi nyundin pajo.

⁷ Jocwinyo Ot pa Were gi mac; jokoco kam'ibed'iye.

⁸ Wegi jowaco ni, “Walaŋinyo jo mathindho thindho.” Jowaŋo Kabedo Maleŋ pa Were je i piny.

⁹ Wakinen ranyuth ma leŋo kendo, ongoye jatuci wac Were man kendo, aka ongoye ŋat'oŋeyo ni gime otimere kiri keraŋo.

¹⁰ Kiri keraŋo, Awi Were, ma jokwor mawan jonyer, to joyeto nyingin cil gi cil?

¹¹ Raŋo ilwogo cingin, Raŋo ipano cingin maracuc yuŋeyin?

¹² Itieko bedo kere mawan wok i cako, Awi Were; itieko botho wan dikweth.

¹³ Iŋat'ibaro nam gi meni perin; ituro wic bulirere i pi.

¹⁴ Iŋat'iŋinyo wic bulir Leviathan imiyo delkwoŋe paka cemo ri cwec ma thim.

¹⁵ Iŋat'itimo waŋ pi ma mol gi jwombe, t'imiyo malawin thwo.

¹⁶ Odieceŋ gi wor jobedo aperin; iŋat'iketho dwe gi waŋceŋ i kabedo pajo.

¹⁷ Iŋat'iridho kew ma i piny; Iŋat'itimo ndir ma lietho gi ndir ma cwir.

¹⁸ To poyi gime, Awi Rwoth, ni jokwor perin jonyerin, aka ji ma bu Were jocayo nyingin.

¹⁹ Ikir'imiy cuny ji perin ma bu gimoro ri ogwaŋe mager; wiyin wokiri wowil gi kwo pa jocandi perin cil gi cil.

²⁰ Poyi cikirok perin m'itimo gi wan; kole kama dimudho je i piny, jopoŋ'iye akaka.

²¹ Ikir'iyey jom'idiyo wokethi jo i wickwot; weyi jocandi gi ji ma bu gimoro jowopaki nyingin.

²² Ay malo, Awi Were, aka ithiel tim perin; poyi paka ji ma bu Were jonyerin kisi ndelo!

²³ Wiyin wokiri wowil gi koko ma nge pa jokwor perin, kihola pa jokwor perin ma medere amedere.