Zabuli 73 - KITAWO MALEŊ

Kitawo mar'adek Zab 73—89 Tiro pa Were

¹ Adieri Were ber ri jomaber, ri jono ma cuny gin cil,

² To ri paka an, tiendan oyido obothi cer, kam'anyono je oyido foth.

³ Ato oyido amako nyeko gi jogero, munyo aneno jokidakana jotimo maber.

⁴ Kole jokiwinji litho; delkwoŋ jo ocwiny kendo leny.

⁵ Jongoye gi teko paka ji man, jongoye gi teko ma jomegi jonigine.

⁶ Riameno delok obedo thiwino pajo; akaka umo jo paka ruk.

⁷ Waŋ gin opoŋ gi noro, adundin pajo poŋ oy gimienirok.

⁸ Jonyero joman to joluwo gigipiny mareco; jobedo to jotimo can ma diyo joman.

⁹ Joluwo gigipiny mareco kwoŋ Were ma i polo, to jowodho cik ma gero ri kisi dhano ma i piny.

¹⁰ Riameno ji jowire to jopako jo; to joyeyo piyo kisi gima jowaco.

¹¹ To jopenjere ni, “Were nyalo ŋeyo nedi? Ŋeyo bende nitie bongi Jamalo swa?”

¹² Neni, me jokidakana; noknok jobedo moth, to jomedere ŋaŋo

¹³ To ri an, je obedo gipilok ni atieko kuro cunyan m'olony, t'alwoko cingan m'ongoye apuse.

¹⁴ Kole ndelo je Were otieko miyan candirok, to miyan gir'acula kisi odikin.

¹⁵ Bedi oyido aluw paka jokidakana, dinyo abedo ma kigenere ri luse pa ji pa Were.

¹⁶ To munyo aparo nger ma niaŋ gime, to cal ran tic ma olo m'oyim ran,

¹⁷ cuka akidho i Ot pa Were; nyaka t'aniaŋ gima latimere ri jokidakana.

¹⁸ To Were laketho jokidakana kamafoth, lamiyo jo podho i rerok.

¹⁹ Paka ireyo jo piyo, to jokadho i gike malith.

²⁰ Jocale lek ka moro ocew, k'icew, Awi Rwoth, to joleny.

²¹ Munyo cunyan timo nge, munyo ocwow cunyan,

²² oyido amiŋ aka akuya gimoro, oyido acalo ogwaŋ rin.

²³ To kad'ameno amedere bedo kodin, iŋat'imako cingan maracuc.

²⁴ Iŋat'ithielan gi fonji perin, aka rumacen ibino jolan gi dwoŋ.

²⁵ Ŋa ma nitie gine i polo kwanyo woko in? Aka ongoye gim'agomba i piny kwanyo woko in.

²⁶ Delkwoŋan gi cunyan podho, to Were a meni ma cunyan gi gimoro je m'ayenyo cil gi cil.

²⁷ Adieri, jono ma jobor kodin jolakisika; ilareyo woko ji ma jongoye g'adieri rin.

²⁸ To ri an ber bedo cegin gi Were; atieko loko Rwoth Were kapondo paran, ŋey anyal luwo kwoŋ tic perin je.