Zabuli 60 - KITAWO MALEŊ

Kwayo ma loyo lweny

¹ Awi Were, itieko kwero wan, t'ikengila wan; itieko mako nge gi wan, to pama wire bongi wan.

² Itieko miyo piny oyengere t'iyeco m'oyawere; onyo pama cangi adholin mere, rupiri jokedhere.

³ Itieko miyo ji perin candirok madwoŋ; itieko miyo wan madho vini m'omiyo watangatanga paka jomero.

⁴ Itieko gwoko jono ma jolworin, ŋey jowobothi rerok.

⁵ Both wan gi meni perin, aka idwoki kwayo mawan, ŋey ji m'imaro jowonyal both.

⁶ Were otieko luwo gi i Kabedo Maleŋ pere: “Gi loyo alapoko Sekem t'apoko milelo ma Sukoth ri ji paran.

⁷ Giliad gi Manase jobedo aparan, Efrayim obedo junga ma aumo gine wiyan; Yuda obedo luth paran ma dhum.

⁸ Mowab obedo kalaya paran ma lwoki, alabolo war paran kwoŋ Edom, paka ranyuth ni aŋat'abedo won mere. Kwoŋ Filistia, akoko i loyo lweny.”

⁹ Ŋa, Awi Were, m'oteran i tindi madwoŋ m'ogoy'iye cel? Ŋa m'otelan tundo Edom?

¹⁰ Itieko kwero wan adieri, Awi Were? Ikikidhi ŋanjo Awi Were, gi jolweny mawan?

¹¹ Apa miy wan kony kwoŋ jokwor, kole kony pa dhano sisiri.

¹² Gi Were i thenge mawan walatimo gi maker; go lakikengila jokwor mawan.