Zabuli 57 - KITAWO MALEŊ

Kwayo ri kony

¹ Tim ran ŋono, Awi Were, tim ran ŋono, kwoŋbedo i in cunyan nwaŋo kapondo; alapondo i tipo ma bwombin, cuka asur ma rerok orum.

² Aywak ri Were ma jamalo swa, ri Were ma ketho i kare atoŋa pere je ran.

³ Go ladwokan wok i polo to bothan; go lakikengila ji ma diyan. Were lanyuthan mar pere makiwire g'adieri pere.

⁴ Jokwor paran jothokan, jocale simbwore ma kec neko jo ri riŋo dhano. Lak jo cale tonge g'aserin; lew jo cale abore mabith.

⁵ Nyuthi dwoŋ perin i pondeponde, Awi Were, weyi dwoŋ perin wobedi i piny paka rom.

⁶ Jokwor paran joyaro bwo ma makan; kidamba omayan meni. Jokunyo bur i royo paran, to wegi jopodh'iye.

⁷ Adundo paran oridhere, Awi Were, adundo paran oridhere, alawero t'apakin!

⁸ Alacew gi tongol gi milowe paran, alacewo keko.

⁹ Alafoyin, Awi Rwoth i dier ji, alapakin i dier nonin.

¹⁰ Mar perin makiwire dwoŋ kiri i polo; adieri perin tundo i pondeponde.

¹¹ Lim dwoŋ Awi Were i polo, weyi dwoŋ perin wobedi i piny gibe.