Zabuli 42 - KITAWO MALEŊ

Kitawo mar'ario Zab 42—72 Rembo pa ŋata nitie woko ma piny pere

¹ Paka apol hamo ri jwom ma mol gi pi maŋic, apaka adundo paran rangin, Awi Rwoth.

² Adundo paran nitie gi riyo ri Were, ri Were makwo. Anobin keraŋo lamo ruwaŋin Rwoth?

³ Aywak wor g'odieceŋ, aka pigi waŋan a cemo paran kende; sawa je jokwor paran jopenjan ni, “Nikune Were perin?”

⁴ Cunyan podho, k'apoyo gigipiny me, nger m'oyido atel'iye lwak ji kadho i Ot pa Were, gi koko ma kisangala gi wer ma foyo, kadho i kalima maleŋ.

⁵ Adundo paran, raŋo iŋedhere? Raŋo irembo? Kethi geno i Were; kole alapako go kendo, jakony paran,

⁶ aka Were paran. Adundo paran oŋedhere, riameno apoyin, wok i piny Yordan gi Hamon, wok i got Mizar.

⁷ Asur perin mager oyweyan, paka wakawaka ma nge omako.

⁸ Rwoth nyuthan mar pere makiwire odieceŋ, aka wor awero, kwayo Were ma won kwo paran.

⁹ Awaco ri Were, tele paran ni, “Raŋo wiyin owil kodan? Raŋo amedi candirok kwoŋbedo jokwor paran jodiyan?”

¹⁰ Aŋinyere gi yet pajo, kareno jomedo penjan ni, “Nikune Were perin?”

¹¹ Adundo paran raŋo iŋedhere? Raŋo irembo? Kethi geno i Were; kole alapako go kendo, jakony paran aka Were paran.