Zabuli 34 - KITAWO MALEŊ

Bero pa Were

¹ Abino foyo Rwoth noknok, alapako go noknok.

² Abino pako go ro gima go otieko timo, weyi jono je m'idiyo jowinji aka jowosangala.

³ Langa kanyacel kodan dwoŋ pa Rwoth, weyi wapaki nyinge kanyacel!

⁴ Akwayo Rwoth, aka odwokan, ogonyan kwoŋ lworo paran je.

⁵ Ji m'idiyo joŋiyo Rwoth, aka josangala, go kilaredho jo.

⁶ Jacandi me oywaki, aka Rwoth owinjo go, to botho go kwoŋ teko pere je.

⁷ Malaika pa Rwoth thoko jono ma jolworo go, to botho jo kwoŋ teko.

⁸ Apa tem neno nger ma Rwoth ber'iye. Josilwany a jono ma jopondo bonge.

⁹ Bwonere win ri Rwoth, ji pere je, jono ma jowinjo go jonitie gi gima joyenyo je.

¹⁰ Kiri simbwore jobedo kec ro ongoye pa cemo, to jono ma jowinjo Rwoth jobedo gi gimaber je.

¹¹ Biye win, merin paran ma soye, aka wiwinjan, abino fonjo win lworo Rwoth.

¹² Imito winjo kwo maber? Imito bedo gi kwo mabor gi kisangala?

¹³ Gwok lewin kwoŋ luwo raco, gi luwo twodo.

¹⁴ Weyi timo raco, aka itimi bero, dwar siem gi cunyin je.

¹⁵ Rwoth kwonga jono ma jotimo gim'otire, aka winjo ywak pajo,

¹⁶ to go kwero jono ma jotimo raco, ŋey ka jotho kipoy jo kendo.

¹⁷ Ka ji ma jotimo gim'otire joywak ri kony, Rwoth winjo, aka gonyo jo wok i teko pajo je.

¹⁸ Rwoth bedo cegin gi jono ma cuny gin otur, go botho jono ma jongoye gi geno.

¹⁹ Jomaber joluwo i litho kweth, to Rwoth botho jo wok i je.

²⁰ Rwoth deda jo kicutho, m'ongoye coko pajo kad'acel ma tur.

²¹ Raco bino neko jokidakana, ibino miyo gir'acula ri jono ma jodak joma timo gim'otire.

²² Rwoth botho kwo pa ŋecin pere, kilathumo banja ri jono ma jopondo i go.