Zabuli 32 - KITAWO MALEŊ

Pusirok gi cwako reco

¹ Jasilwany a ŋat'ocwaki reco pere, gi komo pere.

² Jasilwany a ŋata Rwoth kisegeya timo reco, aka kitwodi i cunye.

³ Munyo fodi akituco reco paran, oyido aol ro ywak ndelo gipi.

⁴ Imiyan gir'acula wor g'odieceŋ, Rwoth, meni paran je orumo, paka ŋico thwo gi lietho i ndir ma ceŋ.

⁵ Kenyo atuco reco paran rin, akimuŋo komo paran. Amiyere tuco jo rin, aka icwako reco paran je.

⁶ Riameno weyi kisi ŋata winjin, wokwayin i hongo je ma kidamba, ka mikula madwoŋ ma teko oredi donjo, kilatundo bongi jo.

⁷ Ibedo kapondo paran, ibino bothan kwoŋ teko. Awero malo bothi perin, kwoŋbedo ikwonga an.

⁸ Rwoth waco ni, “Abino nyuthin yo m'iripo luwo, abino fonjin aka abino miyin rieko.”

⁹ Ikir'ibedi mamiŋ paka kayina kosa punda, m'itweyo gimoro i dhok gin kosa thol ogwaŋ, ma miyo jo mwolok.

¹⁰ Jokidakana jobino candirok, to jono ma jogeno Rwoth, mar pere makiwire kwonga jo.

¹¹ Win ma witimo gim'otire, sangala win aka fore win, ro gima Rwoth otieko timo. Win ma cuny win ler, koki win ri kisangala.