Zabuli 31 - KITAWO MALEŊ

Kwayo ma geno i Were

¹ Abino pondo bongin Rwoth, ikir'iwey wokengila an, In itimo gi tiro, bothan, akwayin!

² Winjan, ibothan pama! Bedi ran tele ma pondo, kwot paran ma bothan.

³ In ibedo tele paran aka kapondo paran, telan aka inyuthan yo paka iciko.

⁴ Gwokan kwoŋ bwo m'ociki ran, kole ibedo kapondo paran.

⁵ Aketho kwo paran i cingin. Ibino bothan Rwoth, Ibedo Were ma timo adieri.

⁶ Idaki jono ma jolamo cal ma bukony, t'aketho geno paran i in.

⁷ Abino kisangala t'asiemere, ro mar perin makiwire. Ineno litho paran, iŋeyo teko paran.

⁸ Ikijwangan i cingi jokwor paran, aka imiyan thwolo ma kidho kama ayenyo.

⁹ Maki wor kodan, Awi Rwoth, kole anitie i kidamba, waŋan ool gi ywak, ajony kicutho.

¹⁰ Kole kwo paran gipi nitie rem, aka kwo paran olokere macek ro ywak. Angoye gi meni ro teko paran, ma kiri cokin paran je ojony.

¹¹ Jokwor paran je, tektek mere joger paran, joteran gi cay, jono ma joŋeyan jolworan, ka joromo kodan i royo joringo.

¹² Kisi dhano wiye owil kodan, acalo gim'otho.

¹³ Awinjo jokwor paran jomwoŋo, teko othokan i kisi thenge, jotimo ran can, ma nekan.

¹⁴ To, aketho geno paran kwoŋin, Awi Rwoth, ibedo Were paran.

¹⁵ Iŋat'idewo kwoŋan noknok, bothan kwoŋ jokwor paran, kwoŋ jono ma jocandan.

¹⁶ Ŋiy ŋeca perin gi wor, bothan i mar perin makiwire.

¹⁷ Alwoŋin, Rwoth, ikir'iweyan asewere. Weyi wickwot omaki jokidakana, weyi jowotho manyaliŋliŋ.

¹⁸ Miy jotwodo liŋ, jonoro je gi jodhaw ma joluwo gi cay kwoŋ jono ma jotimo gim'otire.

¹⁹ Gigipiny maber m'ikano ri jono ma joworin, obedo ma gir'aura! Kisi dhano oŋeyo bero perin, gi nger m'ikwong'iye jono ma joketho geno pajo kwoŋin.

²⁰ Ibedo kabwok pajo, kwoŋ can pa joman, Ikwonga jo, kwoŋ pokopoko marac.

²¹ Pak win Rwoth! Onyuthan mar pere ma gir'aura munyo oyido othokan, aka omonjan.

²² Oyido abwok aka aparo, ni orieman woko ruwaŋe. To munyo alwoŋo go ri kony, owinjo ywak paran.

²³ Mar win Rwoth, ji pere ma jotimo adieri. Rwoth kwonga joma timo adieri, to miyo jonoro gir'acula.

²⁴ Bedi win matek, bedi win jomiseni, jono je ma joketho geno pajo kwoŋ Rwoth.