Zabuli 29 - KITAWO MALEŊ

Dwondi Were ma dimeni

¹ Pak win Rwoth cwec ma i polo, pak win dwoŋ gi meni pere.

² Pak win nyingi Rwoth madwoŋ, lam win go ka onenere.

³ Dwondi Rwoth winjere i nam, ka Rwoth ma nigi dwoŋ, mor paka koth, aka derino ma dwonde winjere i wakawaka madongo.

⁴ Ka Rwoth oluwo, nyutho meni pere, ka Rwoth oluwo, nyutho dwoŋ pere.

⁵ Ka Rwoth oluwo derino ma dwonde turo yen m'ilwoŋo ni sida, kiri yen sida ma Lebanon.

⁶ Go miyo gote ma Lebanon por paka nyithindhi dhok, aka miyo got Hamon por paka rwath.

⁷ Dwondi Rwoth miyo lithkoth menyere.

⁸ Dwondi Rwoth miyo thim yengere, aka go yengo thim ma Kades.

⁹ Dwondi Rwoth miyo yen olwa yengirok, aka oyo boke yen ma lul, kareno kisi nyatoro koko i Ot pere, “Dwoŋ wobedi ri Were.”

¹⁰ Rwoth dhumo pi je maluth, go dhumo paka kere cil gi cil.

¹¹ Weyi Rwoth womiy ji pere meni! Weyi Rwoth womiy ji pere silwany gi siem!