Zabuli 27 - KITAWO MALEŊ

Wer ma pak

¹ Rwoth obedo lero paran aka bothi paran, anolwor ŋa. Rwoth obedo kapondo ma kwo paran, ŋa m'obwokan.

² Ka ji mareco jomonjan to jotemo nekan, jocer aka jopodho.

³ Makada nende jolweny gibe jothokan, akibino bwok, makada nende jokwor jomonjan, kucel abino cungo m'acwiny.

⁴ Gimoro acel m'atieko kwayo Rwoth, aka gino abino dwaro, ni anyal bedo i Ot pa Rwoth i kwo paran je, neno bero pere, gi kwayo go wotelan.

⁵ Go bino kanan i kabwok pere i hongo ma teko, go bino panan i wema pere, go kilathangan wi got mabor.

⁶ Ameno abino kikengila jokwor paran ma jothokan. Abino miyo cowirok i wema pere gi koko ma siemirok, abino wero, abino pako Rwoth.

⁷ Winji ywak paran rin, Awi Rwoth, maki wor kodan aka idwokan.

⁸ Munyo iwaco ni, “Biye laman,” Adwokin ni, “Alabino, Rwoth.”

⁹ Ikir'ipondi ran! Ikir'imaki kodan nge, ikir'iriem ŋeca perin, iŋati oyido ibedo jakony paran, ikir'iweyan, ikir'ijwangan, Awi Were, jaboth paran.

¹⁰ Kole baba gi mama jonyalo jwangan, to Rwoth bino kuran.

¹¹ Fonjan yo perin Awi Rwoth, aka itelan i yo m'otire, kwoŋbedo athothi gi jokwor.

¹² Ikir'ijwangan ri jokwor paran, ma jomonjan gi twodo g'atise.

¹³ Ayeyo ni abino neno bero pa Rwoth i piny pa ji makwo.

¹⁴ Kuri Rwoth, bedi matek, aka weyi cunyin wobedi matek, ey kuri Rwoth.