Zabuli 21 - KITAWO MALEŊ

Pak ma loyo

¹ Kere fore i meni perin, Awi Rwoth, aka yodere kwoŋbedo imiyo go loyo.

² Imiyo go gima cunye mito, t'idwoko kwac pere.

³ Ibino bonge gi silwany madwoŋ, t'ijengo sangaria ma zahabu i wiye.

⁴ Go okwayin kwo, t'imiyo go, kwo mabor ma cil gi cil.

⁵ Ikonyo go bedo ŋatadwoŋ, imiyo go ŋeyirok gi dwoŋ.

⁶ Silwany perin nitie gi go cil gi cil aka bedo perin cegin gi go miyo go kisangala.

⁷ Kole kere ketho geno pere i Rwoth, aka ro mar pa Rwoth makiwire, go k'oyengere.

⁸ Kere bino mako jokwor pere je, go bino mako ji je ma jodak go.

⁹ Go bino reyo woko jo paka mac maliel, ka onenere. Rwoth bino reyo woko jo i keme pere, aka mac lakisika woko jo.

¹⁰ Ongoye nyikway jo ma jolaboth, kere laneko woko joje.

¹¹ Jotimo can pajo, aka jociko go, to jokibino nyalo.

¹² Go bino celo asere pere kwoŋ jo, to miyo jo wirok ringo.

¹³ Wapakin Rwoth, ro meni perin madwoŋ! Wabino wero ka wapako meni perin.