Zabuli 2 - KITAWO MALEŊ

Kere ma Were oyero

¹ Raŋo piny jocano lweny? Raŋo ji jotimo can ma bukony?

² Kerin jolwenyo, jodhum jotimo can kanyacel lweny gi Rwoth, gi kere pere m'oyero.

³ Jowaco ni, “Weyi wagonyere win kwoŋ dhum pajo, aka wabol woko adhum pajo.”

⁴ Rwoth nyero gi kom pere ma dhum i polo, aka pelo jo.

⁵ Kenyo Rwoth luwo gi jo i keme pere aka bwoko jo gi nge pere.

⁶ Rwoth waco ni, “Atieko ketho kere paran wi got maleŋ Zayon.”

⁷ Kere waco ni, abino tuco cik pa Rwoth. Rwoth owaco ran ni, “Ibedo wodan, konon me atieko bedo benin.

⁸ Kwayan, aka abino miyin lunjo piny je, kisi thengi piny bino bedo aperin.

⁹ Ibino turo jo gi luth ma nyweny, ibino ŋinyo jo paka dak m'ocwey gi lowo.”

¹⁰ Onyo riameno kerin, bedi win mariek gwokere win jodhum ma piny.

¹¹ Tiyi win ri Rwoth gi lworo kodi kirin,

¹² aka kule win piny gi bwonirok rigo. Kakameno winyalo kwinyo nge pere piyo, to witho abwap. 2 Kole nge pere gaga piyo. Josilwany a jono ma jopondo i go.