Zabuli 18 - KITAWO MALEŊ

Wer pa Daudi ma loyo

¹ Amarin, Awi Rwoth! Ibedo meni paran.

² Rwoth obedo tele paran, kapondo paran aka jaboth paran. Were paran obedo tele paran, i go a kapondo paran. Kwot paran, aka meni paran ma both, kapondo paran.

³ Alwoŋo Rwoth, aka bothan kwoŋ jokwor paran Pak win Rwoth!

⁴ Asur ma tho oswana an, asur ma rerok othokan,

⁵ lworo ma piny ma tho othokan, aka bwo ma tho ocomere kodan.

⁶ I kidamba paran alwoŋo Rwoth, aywak ri Were paran wokonyan. I Ot pa Were owinjo dwondan, aka ywak paran owinjere i ithe.

⁷ Kenyo piny okirin to yengere, kindi gote bende okirin, to yengere, kwoŋbedo Were oyido omako nge.

⁸ Yiro owok i yore ume, mac ma reyo jo owok i dhoke, cuk mac m'odheth owok bonge.

⁹ Oyeco polo to loro piny, gi pondeponde m'opoto i par tiende.

¹⁰ Ogweyo cwec manitie gi bwombe, m'ilwoŋo ni kerubim, aka oay gi bwombe paka koyo.

¹¹ Oloko mudho gium pere thoko go, pondeponde m'opoto, m'opoŋ'iye pi othoko go.

¹² Pe gi menyin ma mac, owok kwoŋ lithkoth ruwaŋe, aka okedho woko pondeponde macol.

¹³ Kenyo Rwoth omor wok i polo, aka dwondi Were madwoŋ loyo owinjere.

¹⁴ Ocelo aserin pere, aka okedho woko jokwor pere; omiyo jo ŋwec gi menyin ma lithkoth.

¹⁵ Kenyo pendi nam odoŋ maler, aka kindi piny oyawere, munyo Rwoth obwoko jokwor pere, t'ohola rijo gi nge.

¹⁶ Rwoth otundo piny wok malo aka omakan, to ywayan wok i pi maluth.

¹⁷ Obothan kwoŋ jokwor paran ma jotek, kodi kwoŋ jono ma jodakan, kole oyido jotek swa ran.

¹⁸ Jomonjan munyo oyido anitie i teko, to Rwoth okwonga an.

¹⁹ Okonyan wok i teko obothan kwoŋbedo owinjo kodan maber.

²⁰ Rwoth miyan kemba cungo kwoŋ tiro paran, go miyan silwany kwoŋbedo abu banja.

²¹ Kole atieko kuro yo pa Rwoth, aka akiwire kwoŋ Were paran timo kidakana.

²² Atieko kuro cik pere je aka akiweyo or pere.

²³ Oyido angoye g'apuse ruwaŋe, aka angoye gi komo.

²⁴ Riameno Rwoth miyan kemba cungo kwoŋ tiro paran, kole oŋeyo ni alony ruwaŋe.

²⁵ Awi Rwoth, itimo adieri ri jono ma jotimo rin adieri, aka ikipusa ji ma jongoye g'apuse.

²⁶ Inyutho cilo ri jono ma cuny jo cil, to igeri ri jokidakana.

²⁷ Ibotho ji mamwol, t'imwolo jonoro.

²⁸ In Rwoth, ibedo tala paran aka iloko mudho paran lero.

²⁹ Imiyan meni ma monjo jokwor paran, kodi dwoŋ maloyo kwot pajo.

³⁰ Were me, tim pere otire, cikirok pa Rwoth tundo i kare, Go cal kwot, ri ji je ma jopondo i go.

³¹ Rwoth kende a Were Were kende a tele mawan.

³² Go Were ma lokan matek, aka kwonga yo paran.

³³ Otimo tiendan m'ocwiny paka tiendi amudhe, aka kethan gi geno wi gote.

³⁴ Go tieko cingan ri lweny, ŋey anyal oro kwot asere m'otimi gi ywel.

³⁵ Awi Rwoth, ikwonga an t'ibothan, ithielan gi cingin maracuc, aka kony perin omiyan bedo ŋatadwoŋ.

³⁶ Igwokan wokiri womakan, aka tiendan k'ocer.

³⁷ Ariemo jokwor paran aka aneko jo; akiwire gik cuka asika woko jo.

³⁸ Aredho jo piny, aka jokinyal ay malo; akengila jo aka joriere ruwaŋan.

³⁹ Imiyan meni ma lweny, kodi loyo kwoŋ jokwor paran.

⁴⁰ Imiyo jokwor paran ŋwec kwoŋan aka asika woko ji ma jodakan.

⁴¹ Joywak ri kony, to ngoye ŋat'okony jo; jolwoŋo Rwoth, to Rwoth kidwoki jo.

⁴² Aŋinyo jo to jolokere paka fukefuke ma koyo kudho. Anyono jo paka cwodho i royo.

⁴³ Ibothan gwenyirok gi ji, aka imiyan dhumo nonin kweth; ji m'oyido akuya ama nyo adhumo.

⁴⁴ Jopath jobino bwonirok ruwaŋan aka tekin jowinjo kwoŋan, joluwo cik paran.

⁴⁵ Miseni pajo rumo, aka jobino gi kirin wok i kapondo pajo.

⁴⁶ Rwoth kwo! Kwot paran wopak! Tuci dwoŋ pa Were matek ma bothan!

⁴⁷ Go miyan loyo kwoŋ jokwor paran; aka ketho nonin i dhum paran,

⁴⁸ to bothan kwoŋ cwo ma jomaker. Awi Rwoth, imiyan loyo kwoŋ jokwor paran, aka ikwonga an kwoŋ cwo ma jomaker.

⁴⁹ Am'omiyo apakin, Awi Rwoth i dier nonin je, awero wer ma pakin.

⁵⁰ Were miyo loyo madongo ri kere pere, go nyutho mar makiwire ri ŋata go oyero, ri Daudi gi nyikwaye cil gi cil.