Zabuli 145 - KITAWO MALEŊ

Wer ma pak

¹ Alatuco dwoŋ perin, Were paran gi Kere paran, t'apako nyingin cil gi cil

² Kisi ndelo alafoyin, t'apako nyingin cil gi cil.

³ Rwoth dwoŋ, aka iripo pako go gi pak ma malo, aka dwoŋ pere kiniaŋere.

⁴ Luse acel lapako tic perin ri luse man, aka latito tim perin ma meni.

⁵ Alaluwo kwoŋ dwoŋ gi meni perin, t'aparo kwoŋ tic perin ma gir'aura.

⁶ Ji jolatuco meni ma tim perin ma kiwacere, t'atito dwoŋ perin.

⁷ Jolaluwo kwoŋ bero perin je, to jowero gi dwondi jo ma malo kwoŋ timo ŋono perin.

⁸ Rwoth obedo jamar aka timo ŋono, kimaki nge piyo aka opoŋ gi mar makiwire.

⁹ Rwoth ber ri ji je, aka nyutho mar ri gimoro je ma go ocweyo.

¹⁰ Tic perin je lafoyin, Awi Rwoth, aka ji perin je lapakin!

¹¹ Jolaluwo kwoŋ dwoŋ ma ker perin, to joluwo kwoŋ meni perin,

¹² m'amiyo ji ŋeyo tim perin ma gir'aura, gi dwoŋ ma ker perin.

¹³ Ker perin obedo ker ma cil gi cil, aka dhum perin bedo i luse je. Rwoth genere i wac pere je, aka jawor i tim pere je.

¹⁴ Rwoth thielo ji ma jopodho je, to tiŋo malo jom'ofodere piny.

¹⁵ Waŋ kisi gimoro ŋiyin, aka iŋat'imiyo jo cemo pajo i hongo ma ripo.

¹⁶ Iyawo cingin, t'iyeŋo mito pa kisi gima kwo je.

¹⁷ Rwoth otire i tim pere je, aka jakisa i gimoro je ma go timo.

¹⁸ Rwoth bedo cegin gi ji je ma jolwoŋo go, ri joje ma jolwoŋo go iy'adieri.

¹⁹ Go ketho i kare mito pa ji ma lworo go je, go bende winjo ywak pajo, to botho jo.

²⁰ Rwoth botho jom'omaro go je; to jokidakana je go lareyo woko.

²¹ Dhokan laluwo kwoŋ pak pa Rwoth, aka weyi cwec pere je jowopaki nyinge maleŋ cil gi cil.