Zabuli 139 - KITAWO MALEŊ

Ŋeyo pa Were makicutho gi kur pere

¹ Awi Rwoth, itieko menyan t'iŋeyan!

² Iŋeyo k'abedo piny gi k'acungo; imenyo paro paran gi bor.

³ Imenyo woth paran gi k'anindo, aka iŋeyo tim paran je.

⁴ Mafodi lewan k'otuco wac, neni, Awi Rwoth, iŋeyo joje.

⁵ Ithokan i kisi thenge, aka ipanan i cingin.

⁶ Nger niaŋ no obedo ma gir'aura swa ran, oŋawere swa, yombo niaŋ paran.

⁷ Anopondi kune kwoŋ cunyin, kosa anoringi kune ruwaŋin!

⁸ K'aidho i polo, initie kenyo, k'anindo i piny pa jom'otho, initie kenyo.

⁹ K'adwire woko yombo yuwok ceŋ, kosa abedi kamabor loyo yupodho ceŋ,

¹⁰ kiri kenyo je cingin latelan, to cingin maracuc makan.

¹¹ K'awaco ni, “Weyi mudho kende wouman, to lero m'othokan bedo wor,

¹² kiri mudho kicol rin, wor ler paka odieceŋ, kole mudho rom gi lero rin.”

¹³ Kole iŋat'icweyo kisi adec ma delkwoŋan, iŋat'ikwoyan kanyacel i iy mama.

¹⁴ Apakin, kole iŋat'iripo alwora aka itimo gir'aura. Tic perin obedo ma gir'aura, iŋat'iŋeyan maber swa.

¹⁵ Munyo icweyo cokin paran, m'oketh kanyacel maber i iy mama munyo adongo kenyo nyaliŋliŋ, iŋeyo ni oyido anitie kenyo.

¹⁶ Inenan mafodi k'onywolan. Ndelo je m'imiyan oyido otiek ndiko i kitawo perin, mafodi jo k'ocakere.

¹⁷ Awi Were, nga tek ran niaŋ paro perin! Je rom nedi!

¹⁸ Bedi akwan jo, di joloyo kwoyo, k'acew, fodi anitie bongin.

¹⁹ Awi Were neni paka akwayo swa ni ineki ran jokidakana! Nga akwayo ni jogwayo joweyere kendan!

²⁰ Jono ma joluwo gikidakana kwoŋin, joluwo reco kwoŋ nyingin.

²¹ Awi Rwoth nga dak jono ma jodakin! Nga acayo jono ma jogwenyere kwoŋin!

²² Adaki jo kicutho, atero jo paka jokwor paran.

²³ Menyan, Awi Were, aka iŋey cunyan! Teman aka iŋey paro paran!

²⁴ Neni ka nitie tim moro ma kidakana kwoŋan, aka itelan i yo ma cil gi cil.