Zabuli 138 - KITAWO MALEŊ

Kwayo ma foyo

¹ Amiyin foyo, Awi Rwoth, gi cunyan je, ruwaŋ werin awero pak perin.

² Akule piny yu ot perin maleŋ, t'amiyo foyo ri nyingin, ro mar perin makiwire gi genirok perin. Kole iŋat'itiŋo malo nyingin gi wac perin loyo kisi gimoro.

³ I ndelo m'alwoŋin, idwokan, idwoko meni ma cunyan.

⁴ Kerin je ma i piny jolapakin, Awi Rwoth, kole jotieko winjo wac ma wok i dhokin

⁵ Jolawero kwoŋ tim pa Rwoth, Kole dwoŋ pa Rwoth nimalo.

⁶ Kole kada Rwoth oŋawere, go paro kwoŋ ji masisiri, to ŋeyo jodelok gi bor.

⁷ Makada nende awotho i dier teko, iŋat'ikuro kwo paran, iŋat'iyaro cingin kwoŋ keme pa jokwor paran; aka cingin maracuc bothan.

⁸ Rwoth laketho i kare atoŋa pere ran, mar perin makiwire, Awi Rwoth, bedo cil gi cil, ikir'ijwangi tic ma cingin.