Zabuli 136 - KITAWO MALEŊ

Wer ma foyo

¹ Miy win foyo ri Rwoth, kole go ber, kole mar pere makiwire bedo cil gi cil.

² Miy win foyo ri Were pa werin, kole mar pere makiwire bedo cil gi cil.

³ Miy win foyo ri Rwoth pa rwodhe, kole mar pere makiwire bedo cil gi cil.

⁴ Go won kende ma timo gir'aura madongo, kole mar pere makiwire bedo cil gi cil.

⁵ Go ma gi rieko ocweyo polo, kole mar pere makiwire bedo cil gi cil.

⁶ Go m'oyaro piny wi pi, kole mar pere makiwire bedo cil gi cil.

⁷ Go m'ocweyo talin madongo, kole mar pere makiwire bedo cil gi cil,

⁸ waŋceŋ dhumo odieceŋ, kole mar pere makiwire bedo cil gi cil,

⁹ dwe gi micalin dhumo wor, kole mar pere makiwire bedo cil gi cil.

¹⁰ Go m'oneko nyithindho makayo ma Misir, kole mar pere makiwire bedo cil gi cil,

¹¹ to wodho Joisiraili wok i dier jo, kole mar pere makiwire bedo cil gi cil,

¹² gi cinge matek kodi bade ma meni, kole mar pere makiwire bedo cil gi cil.

¹³ Go m'opoko pi i diere, kole mar pere makiwire bedo cil gi cil,

¹⁴ omiyo Joisiraili luwo i diere, kole mar pere makiwire bedo cil gi cil,

¹⁵ to kengila Farawo gi jolweny pere i Nam M'obokere, kole mar pere makiwire bedo cil gi cil.

¹⁶ Go m'otelo ji pere i thim, kole mar pere makiwire bedo cil gi cil.

¹⁷ Go m'oneko kerin madongo, kole mar pere makiwire bedo cil gi cil,

¹⁸ to neko kerin m'oŋeyere, kole mar pere makiwire bedo cil gi cil,

¹⁹ Sihon, kere pa Joamor, kole mar pere makiwire bedo cil gi cil

²⁰ Og, kere pajo Basan, kole mar pere makiwire bedo cil gi cil,

²¹ to miyo lowo pajo paka gir'alunja, kole mar pere makiwire bedo cil gi cil,

²² gir'alunja ri Isiraili ŋeca pere, kole mar pere makiwire bedo cil gi cil.

²³ Go am'opoyo wan ma wasisiri, kole mar pere makiwire bedo cil gi cil,

²⁴ to botho wan kwoŋ jokwor mawan, kole mar pere makiwire bedo cil gi cil.

²⁵ Go m'amiyo cemo ri gima kwo je, kole mar pere makiwire bedo cil gi cil.

²⁶ Awi, miy foyo ri Were ma i polo, kole mar pere makiwire bedo cil gi cil.